Read Samoan Old Version Bible – O LE TUSI PAIA MATAIO, 4 Bible Online

MATAIO, 4 - Samoan Old Version Bible – O LE TUSI PAIA bible

MATAIO, 4

¹Ona aveina ae lea o Iesu i le vao e le Agaga, ina ia faaosoosoina e le tiapolo.

²Ua faalaina ia i po e fagafulu ma ao e fagafulu, mulimuli ane ona fia taumafa ai lea o ia.

³Ona alu ane lea ia te ia o lē faaosooso, ua faapea mai, Afai o oe le Alo o le Atua, ina fetalai atu ia ia liu areto nei maa.

⁴Ona tali atu ai lea o ia, ua faapea atu, Ua tusia, E le na o mea e ‘ai e ola ai le tagata, a o afioga uma e tūlei mai i le fofoga o le Atua.

⁵Ona ave ai lea o ia e le tiapolo i le aai paia, ua ia faatuina foi ia te ia i le tumutumu o le malumalu,

⁶ona fai mai lea o ia ia te ia, Afai o oe le Alo o le Atua, oso ia oe i lalō; auā ua tusia, E poloai o ia i ana agelu ia te oe, latou te ave ia te oe i o latou lima, ne‘i tū‘ia lou vae i se maa.

⁷Ua fetalai atu Iesu ia te ia, Ua tusia foi, Aua e te tofotofo i le Alii lou Atua.

⁸Ona toe ave lea o ia e le tiapolo i le mauga matuā maualuga, ua ia faaali foi ia te ia malo uma o le lalolagi ma o latou matagofie;

⁹ona fai mai lea o ia ia te ia, Ou te avatua nei mea uma ia te oe, pe afai e te faapaū ma ifo mai ia te au.

¹⁰Ona fetalai atu lea o Iesu ia te ia, Ina alu ese ia oe Satani; auā ua tusia, E te ifo atu i le Alii lou Atua, ua na o ia lava e te auauna i ai.

¹¹Ona tuua ai lea o ia e le tiapolo, faauta foi, ua o mai agelu ma auauna mai ia te ia.

¹²Ua faafofoga Iesu ua tuuina atu Ioane i le fale puipui, ona maliu atu ai lea o ia i Kalilaia;

¹³ua tuua e ia o Nasareta, ua maliu atu o ia ma nofo i Kapanaumi ua tu matafaga, i le tuaoi o Sepulona ma Nafatali;

¹⁴ina ia taunuu ai le upu a le perofeta o Isaia, ua faapea mai,

¹⁵O le nuu o Sepulona, ma le nuu o Nafatali, o le ala i le vai i tala ane o Ioritana, o Kalilaia o nuu ese,

¹⁶o le nuu sa nofo i le pouliuli, ua latou iloa le malamalama tele; o i latou foi sa nonofo i le nuu ma le ata o le oti ua alu ae le malamalama ia te i latou.

¹⁷Talu mai ai na afua ona tala‘i atu e Iesu, ua faapea atu, Ina salamo ia outou; auā ua latalata mai le malo o le lagi.

¹⁸Ua savali ane Iesu e latalata ane i le vai o Kalilaia, ona silafia lea e ia o le uso e toalua, o Simona ua igoa ia Peteru, ma Aneterea lona uso, ua la lafo le upega i le vai, aua o tagata fai faiva i laua.

¹⁹Ona fetalai atu lea o ia ia te i laua, Ina mulimuli mai ia ia te au, ou te faia oulua ma fai faiva i tagata.

²⁰Ona la tuua loa lea o laua upega, a e mulimuli atu ia te ia.

²¹Ua tuanai foi e ia lea mea, ona silafia lea e ia o le isi uso e toalua, o Iakopo le atalii o Sepetaio, ma Ioane lona uso, ua i le vaa ma lo la tamā o Sepetaio, ua latou fai masae o latou upega; ua ia valaauina atu foi ia te i laua.

²²Ona la tuua loa lea o le vaa ma lo la tamā, a e mulimuli atu ia te ia.

²³Ua faataamilo Iesu i Kalilaia uma, ua ia a‘oa‘o i o latou sunako, ua ia tala‘i atu foi le tala lelei o le malo, ma faamalolo e ia o ma‘i uma ma ma‘i tiga uma o le nuu.

²⁴Ua oo atu ai lona logo i Suria uma, ona latou au mai ai lea ia te ia o e ua mamai atoa uma, o e ua i ai ma‘i eseese, ma e ua puapuagatia, ma e ua uluitinoina e temoni, ma e ua ma‘i māliu, atoa ma e ua mamai i le supa; ona faamaloloina lea o i latou e ia.

²⁵Ona mulimuli atu lea ia te ia o le motu o tagata e toatele mai Kalilaia, ma Tekapoli, ma Ierusalema, ma Iutaia, ma ona tala atu o Ioritana.