Read Samoan Old Version Bible – O LE TUSI PAIA MATAIO, 9 Bible Online

MATAIO, 9 - Samoan Old Version Bible – O LE TUSI PAIA bible

MATAIO, 9

¹Ona maliu ae lea o ia i le vaa, ua maliu atu i le tasi itu, ona oo lea i lana lava aai.

²Faauta foi, ua latou au mai ia te ia le tagata supa, ua taoto i le moega; ua silafia foi e Iesu lo latou faatuatua, ona fetalai atu ai lea o ia i le supa, Lo‘u atalii e, ina faalototele ia oe, ua faamagaloina au agasala.

³Faauta foi, ua faapea ifo nisi o le au tusiupu i o latou loto, Ua upu leaga lenei tagata i le Atua.

⁴Ua silafia e Iesu o latou manatunatu, ona faapea atu lea o ia, Se a le mea ua manatunatu leaga ai o outou loto?

⁵auā po o le fea le faigofie? po o le fai atu, Ua faamagaloina au agasala; po o le faiatu, Tulai ia, ina savali?

⁶A e peitai ina ia iloa e outou o i ai i le Atalii o le tagata i le lalolagi le pule e faamagalo ai agasala, (ona fetalai atu ai lea o ia i le supa,) Ina tulai ia, ina ave lou moega, ma alu i lou fale.

⁷Ona tulai ai lea o ia, ua alu i lona fale.

⁸Ua iloa e le motu o tagata, ona taufaiofo ai lea; ua latou vivii atu i le Atua le ua foaiina mai le pule faapena i tagata.

⁹Ua maliu ese Iesu i lea mea, ona silafia ai lea e ia o le tagata ua nofo i le fale e tali ai taulaga, o Mataio lona igoa; ua faapea atu ia te ia, Ina mulimuli mai ia ia te au. Ona tulai ai lea o ia, ua mulimuli atu ia te ia.

¹⁰Ua taoto o ia i le fale e taumafa, faauta foi, o le au telona e toatele ma e ua agasala ua o mai ai, ua latou taooto e aai faatasi ma Iesu ma ona soo.

¹¹Ua iloa e le au faresaio, ona latou fai atu ai lea i ona soo, Se a le mea ua aai faatasi ai la outou a‘oa‘o ma le au telona ma e ua agasala?

¹²A ua lagona e Iesu, ona fetalai atu ai lea o ia ia te i latou, E le aoga le fomai i e malolo, na o e mamai.

¹³Ina o ia, ina a‘oa‘o po o le a le uiga o lea upu, Ou te loto i le alofa, a e le o le taulaga; auā ou te lei sau e valaau i e ua amiotonu, a o e ua agasala ina ia latou salamo.

¹⁴Ona o mai ai lea o soo o Ioane ia te ia, ua faapea mai, Se a le mea ua anapopogi soo ai i matou ma le au faresaio, a o ou soo, e le anapopogi i latou?

¹⁵Ona fetalai atu ai lea o Iesu ia te i latou, E mafai ea ona faanoanoa o aumea a le faatoafaiavā i ona aso o ia te i latou o le faatoafaiavā? A e oo mai ona aso e aveeseina ai ia te i latou o le faatoafaiavā, ona latou anapopogi ai lea.

¹⁶E leai se tasi na te fonoa le matuā ofu i le ie fou; auā e masae le ofu i lona fono, ona atili ai lea ona masae.

¹⁷E le utufia foi le uaina fou i fagu pa‘u tuai; a faapea, ona pāpā ai lea o fagu pa‘u, ona masaa lea o le uaina, e māumau foi fagu pa‘u; a e utufia le uaina fou i fagu pa‘u fou, ona faatau saogalemu ai lea.

¹⁸Ua fetalai atu ia i ia upu ia te i latou, faauta, ua sau le alii, ua ifo mai ia te ia, ua faapea mai, Ua oti nei lava lo‘u afafine; a ia e maliu atu, ma faaee lou aao i luga ia te ia, ona ola ai lea o ia.

¹⁹Ona tulai ai lea o Iesu, ua mulimuli atu ia te ia o ia ma ona soo.

²⁰Faauta foi, o le fafine na i ai le puna toto i tausaga e sefulu ma le lua, ua alu ane ia i ona tua, ua ia pa‘i ane i le tuupao o lona ofu;

²¹auā ua fai ifo ia i lona loto, Afai ou te pa‘i atu tau o lona ofu, ou te ola ai.

²²A ua fāliu Iesu, ua silafia o ia, ona faapea atu ai lea o ia, Lo‘u afafine e, ina faalototele ia oe, ua e ola i lou faatuatua. Ona ola ai lea o le fafine talu lea lava itu aso.

²³Ua ulufale atu Iesu i le fale o le alii, ona silafia ai lea e ia o e ili fagufagu ma le motu o tagata ua pa le lauaitu,

²⁴ua faapea atu o ia ia te i latou, Ina o ese ia; auā e lei oti le teine, ua na ona moe. Ona latou tapisa mai ai lea ia te ia.

²⁵Ua tulia le motu o tagata, ona ulu atu ai lea o ia, ua tago i lona lima, ona tulai ae lea o le teine.

²⁶Ona logo atu lea o lenei mea i lea nuu uma.

²⁷Ua maliu ese Iesu i lea mea, ona mulimuli mai ai lea ia te ia o tauaso e toalua, ua alalaga, ua faapea mai, Le alo e o Tavita, ia e alofa mai ia te i maua.

²⁸Ua ulufale ia i le fale, ua o mai ai ia te ia o ia tauaso; ona fetalai atu ai lea o Iesu ia te i laua, Ua oulua faatuatua mai ea ia te au ou te mafaia lenei mea? Ona la fai mai ai lea ia te ia, Ioe, le Alii e.

²⁹Ona pa‘i atu ai lea o ia i o la mata, ua faapea atu, E pei ona oulua faatuatua, ia faapea lava ona faia ia te oulua.

³⁰Ona pupula ai lea o laua mata. Ona matuā fetalai atu lea o Iesu ia te i laua, ua faapea atu, Ia oulua, ne‘i faailoa atu i se tasi.

³¹A ua la o ma faalauaitele le tala ia te ia i lea nuu uma.

³²Ua la o, faauta, ua latou au mai ia te ia le tagata gūgū, ua uluitinoina e le temoni.

³³Ua tulia le temoni, ona tautala mai ai lea o le gūgū. Ona taufaiofo ai lea o le motu o tagata, ua faapea ane, E lei iloa mai anamua se mea faapena i Isaraelu.

³⁴A ua fai ane le au faresaio, O le temoni sili ua tulia ai e ia e temoni.

³⁵Ua faataamilo Iesu i aai uma ma faoa aai, ua a‘oa‘o i o latou sunako, ma tala‘i i le tala lelei o le malo, ua ia faamalolo foi i ma‘i uma, ma ma‘i tiga uma o le nuu.

³⁶Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.

³⁷Ona fetalai atu ai lea o ia i ona soo, E tele le saito e seleseleina, a o le au fai galuega e toaitiiti ia;

³⁸o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.