Read Samoan Old Version Bible – O LE TUSI PAIA MAREKO, 1 Bible Online

MAREKO, 1 - Samoan Old Version Bible – O LE TUSI PAIA bible

MAREKO, 1

¹O le amataga o le tala lelei ia Iesu Keriso o le Alo o le Atua.

²E pei ona tusia i le au perofeta, Faauta, ou te auina atu la‘u sāvali e muamua atu i ou luma, na te teuteua lou ala i ou luma.

³O le leo o le ua alaga i le vao, Ina teuteu ia outou le ala o le Alii, ia faalaulelei ona ala.

⁴Sa faia e Ioane lana papatisoga i le vao, ma tala‘i atu ai le papatisoga o le salamo ina ia faamagaloina agasala.

⁵Ua o atu foi le nuu uma o Iutaia ia te ia, atoa ma tagata o Ierusalema, ma ua papatisoina i latou uma e ia i le vaitafe o Ioritana, ua faaali atu a latou agasala.

⁶Ua ofu Ioane i le fulufulu kamela, ma le fusi pa‘u i lona sulugātiti; a o ana mea e ‘ai o sē akerise ma le meli vao ia.

⁷Ua tala‘i atu ia, ua faapea atu, O loo mulimuli mai le tasi, e silisili o ia ia te au, ou te le aoga a‘u e punou ifo ma tatala le nonoa o ona see vae.

⁸O a‘u nei, ou te papatiso atu ia te outou i le vai; a o ia, na te papatisoina outou i le Agaga Paia.

⁹O ona po ia ua maliu atu ai Iesu mai Nasareta o i Kalilaia, ua papatisoina foi o ia e Ioane i Ioritana.

¹⁰Ua maliu ae o ia nai le vai, ona iloa loa lea e ia o le lagi ua masae, ma le Agaga ua afio ifo i ona luga, e peiseai se lupe.

¹¹Ua oo mai foi le siufofoga mai le lagi, ua faapea mai, O lo‘u Atalii pele oe, ou te fiafia ia te oe.

¹²Ona avea loa ai lea o ia e le Agaga i le vao.

¹³Sa i ai foi o ia i le vao i po e fagafulu, ua faaosoosoina e Satani; sa i ai ma manu feai, sa auauna foi agelu ia te ia.

¹⁴Ua tuuina atu Ioane i le fale puipui, ona maliu atu lea o Iesu i Kalilaia, ua tala‘i atu ai le tala lelei i le malo o le Atua, ua faapea atu,

¹⁵Ua oo mai ona po, ua latalata mai le malo o le Atua; ina salamo ia, ma talitonu i le tala lelei.

¹⁶Ua savali ane ia e latalata ane i le vai o Kalilaia, ona silafia lea e ia o Simona ma Aneterea lona uso, ua la lafo le upega i le vai; auā o tagata fai faiva i laua.

¹⁷Ona fetalai atu lea o Iesu ia te i laua, Ina mulimuli mai ia ia te au, ou te faia oulua ma fai faiva i tagata.

¹⁸Ona la tuua loa lea o la upega, a e mulimuli atu ia te ia.

¹⁹Ua tuanai atu teisi lea mea, ona silafia lea e ia o Iakopo le atalii o Sepetaio ma Ioane lona uso, ua i le vaa, ua fai masae o latou upega;

²⁰ua valaau atu loa o ia ia te i laua; ona la tuua lea o lo la tamā o Sepetaio i le vaa faatasi ma auauna, ua la mulimuli atu ia te ia.

²¹Ua o foi i latou i Kapanaumi; ona maliu atu loa lea o ia i le sunako i le sapati, ua a‘oa‘o ai.

²²Ua matuā ofo foi i latou i lana mataupu; auā ua ia a‘oa‘o ia te i latou e faapei o se ua i ai le pule, a e le pei o le au tusiupu.

²³Sa i ai foi i lo latou sunako le tagata ua i ai le agaga leaga;

²⁴ua alaga foi o ia, ua faapea mai, Aue, Iesu e le Nasareta! se a lau na ia i te i matou? ua e maliu mai ea ia fanoia i matou? ua ou iloa oe, o le Paia oe o le Atua.

²⁵Ona vavao atu lea o Iesu ia te ia, ua faapea atu, Ina faalologo ia, ma e alu i fafo nai ia te ia.

²⁶Ona faataafiti lea o le agaga leaga ia te ia, ua alaga foi ma le leo tele, ona alu lea o ia i fafo nai ia te ia.

²⁷Ona taufaiofo ai lea o i latou uma, ua latou fesili ai le tasi i le tasi, ua faapea, Pe se a lenei? se a foi lenei mataupu fou? auā ua pule ia i agaga leaga, ma fetalai atu i ai, ona latou faalogo lava lea ia te ia.

²⁸Ona logo atu loa lea o le tala ia te ia i le nuu uma o Kalilaia.

²⁹Ua latou ulufafo i le sunako, ona o atu loa lea i le fale o Simona ma Aneterea, ua o faatasi ma Iakopo ma Ioane.

³⁰Sa taoto ai foi le tinā o le avā a Simona i le ma‘i vevela; ona latou ta‘uina atu loa lea o ia ia te ia.

³¹Ona sōsō atu lea o ia ia te ia, ua tago ifo i lona lima, ua faatu ia te ia i luga; ona mavae loa lea o lona ma‘i vevela, ona auauna lea o ia ia te i latou.

³²Ua oo i le afiafi i le goto o le la, ona latou au mai lea ia te ia o e mamai uma, atoa ma e ua uluitinoina e temoni.

³³Ua potopoto uma ane foi le aai i le faitotoa.

³⁴Ona ia faamaloloina lea o tagata e toatele na mamai i ma‘i eseese, ua ia tulia foi temoni e toatele, ua ia le tuu atu foi i temoni e tautala, auā ua latou iloa o ia.

³⁵O le taeao ua ala po ai o ia, ona ulufafo lea o ia ma maliu atu i le mea tuufua, ma talotalo ai.

³⁶Ua mulimuli atu foi ia te ia o Simona ma i latou sa ia te ia.

³⁷Ua latou maua o ia, ona latou fai mai lea ia te ia, O loo saili tagata uma ia te oe.

³⁸Ona fetalai atu lea o ia ia te i latou, Ina tatou o atu ia i aai e latalata mai, ia ou tala‘i atu i ai le tala lelei, auā o le mea lea na ou sau ai.

³⁹Ua ia tala‘i foi i o latou sunako i Kalilaia uma, ma tutuli temoni.

⁴⁰Ua sau le lepela ia te ia, ua aioi ia te ia, ma tootuli ia te ia, ma ua faapea mai, Afai ua e finagalo i ai, e te mafaia ona faamamā ia te au.

⁴¹Ona mutimuti vale lea o le alofa o Iesu ia te ia, ua aapa atu lona aao, ua pa‘i atu ia te ia, ma fetalai atu ia te ia, Ou te loto i ai, ina mamā ia oe.

⁴²Ua fetalai atu o ia, ona te‘a loa lea o le ma‘i lepela ia te ia, ona mamā ai lea o ia.

⁴³Ona matuā vavao atu lea o ia ia te ia, ma tuuina atu loa ia te ia e alu.

⁴⁴Ua faapea atu foi ia te ia, Ia oe, ne‘i e ta‘u atu sina tala i se tasi; a ia e alu, ina faaali oe i le ositaulaga; ma avane o mea na poloai ai Mose mo lou faamamāina, e fai ma faailoga ia te i latou.

⁴⁵A ua alu atu ia, ona matuā tala‘i atu lea ma faasalalau le tala, o lea e lei toe mafai ai o ia ona maliu faaali i le aai; a ua nofonofo i mea tuufua, ua latou o ane foi ia te ia mai itu uma.