Read Samoan Old Version Bible – O LE TUSI PAIA MAREKO, 10 Bible Online

MAREKO, 10 - Samoan Old Version Bible – O LE TUSI PAIA bible

MAREKO, 10

¹Ua tulai o ia nai lea mea, ua oo atu i le laueleele o Iutaia i tala atu o Ioritana; ona toe faapotopoto mai lea o le motu o tagata ia te ia, ua na toe a‘oa‘o atu foi ia te i latou, faapei ona masani ai.

²Ua o mai faresaio, ua fesili ia te ia, o tofotofo ia te ia, E tatau ea ina faatea e le tane lava avā?

³Ona tali atu ai lea o ia ia te i latou, ua faapea atu, Se a le mea ua poloai ai Mose ia te outou?

⁴Ona fai mai ai lea o i latou, Na tuu mai e Mose ia te i matou, ia matou tusia se tusi alei, ma faatea ia te ia.

⁵Ona tali atu lea o Iesu, ua faapea atu ia te i latou, Ona o le maaa o outou loto, na ia tusi atu ai lena poloaiga ia te outou;

⁶a e peitai talu le amataga o mea na faia, na faia i laua e le Atua o le tane ma le fafine.

⁷O le mea lea e tuua ai e le tane lona tamā ma lona tinā, a e faatasi ma lana avā,

⁸ona avea lea o i laua ma tino e tasi; o lea e le toe toalua ai i laua, a e peitai ua tino e tasi;

⁹o lenei, o e ua faatasia e le Atua, aua le faate‘aeseeseina e se tagata.

¹⁰Ua toe fesili ane ona soo ia te ia i lena mea i le fale.

¹¹Ona fetalai atu ai lea o ia ia te i latou, Ai sē faatea i lana avā, a e fai avā i le tasi, ua mulilua o ia e agaleaga atu ai ia te ia.

¹²Afai foi e faatea e le fafine lana tane, a e fai ma avā a se tasi, ua mulilua o ia.

¹³Ona latou au mai lea o tama iti ia te ia, ina ia pa‘i ane o ia ia te i latou; a ua vavao atu le au soo i e na aumaia.

¹⁴A ua silafia e Iesu, ona tiga ai lea o lona finagalo, ua na fetalai atu foi ia te i latou, Ina tuu mai ia o tama iti o e mai ia te au; aua le vavao ia te i latou; auā e faapei o i latou nei o e o i le malo o le Atua.

¹⁵E moni, ou te fai atu ia te outou, Ai se le talia le malo o le Atua faapei o se tama itiiti, e le sao lava ia i ai.

¹⁶Ona siitia lea e ia o i latou i ona lima, ua faaee foi ona aao i luga ia te i latou, ma faamanuia ia te i latou.

¹⁷Ua maliu ane ia i le ala, ona momo‘e mai ai lea o le tasi, ua tootuli ia te ia, ma fesili mai ia te ia, Le a‘oa‘o lelei e, se a se mea ou te faia ina ia ou maua ai le ola e faavavau?

¹⁸A ua fetalai atu Iesu ia te ia, Se a le mea e te ta‘ua mai ai a‘u ua lelei? e leai se tasi e lelei, na o le toatasi lava, o le Atua lea.

¹⁹Ua e iloa tulafono, Aua e te mulilua; aua e te fasioti tagata; aua e te gaoi; aua e te molimau pepelo; aua e te agaleaga; ia e ava i lou tamā ma lou tinā.

²⁰Ona tali mai lea o ia, ua faapea mai ia te ia, Le a‘oa‘o e, ua ou tausia na mea uma, talu ina ou itiiti.

²¹Ua silasila atu Iesu ia te ia, ua alofa atu ia te ia, ua fetalai atu foi ia te ia, E tasi le mea e le o ia te oe. Ina alu ia, faatau atu au mea uma, ma avatu i e ua matitiva, ona e maua lea o le oa i le lagi; i le ē sau ai, ma ave le satauro, a e mulimuli mai ia te au.

²²Ona faanoanoa lea o ia ona o lea upu, ua alu ese foi ma le tiga, auā ua tele ana oloa.

²³Ona silasila solo lea o Iesu, ua fetalai atu i ona soo, E matuā faigata ona sao atu o e mauoa i le malo o le Atua.

²⁴Ona ofo ai lea o le au soo i lana fetalaiga. A ua toe tali atu Iesu ia te i latou, ua faapea atu, La‘u fanau e, e matuā faitaga i e faatuatua i le oa ona sao atu i le malo o le Atua.

²⁵E faigofie i le kamela ona ui atu i le pu o le au, a e faigata i le mauoa ona sao i le malo o le Atua.

²⁶Ona latou matuā taufaiofo ai lea, ua latou felafolafoai foi, ua faapea, Afai o lea, o ai se tasi e mafai ona faaolaina?

²⁷A ua silasila atu Iesu ia te i latou, ua faapea atu, E le mafaia e tagata, na o le Atua; auā e mafaia mea uma e le Atua.

²⁸Ona fai mai lea o Peteru ia te ia, Faauta, ua matou tuua mea uma, a e mulimuli atu ia te oe.

²⁹Ona tali atu lea o Iesu, ua faapea atu, E moni, ou te fai atu ia te outou, ai se tasi ua ia tuua le fale, po o uso, po o tuafāfine, po o le tamā, po o le tinā, po o le avā, po o le fanau, po o fanua, ona o a‘u ma le tala lelei,

³⁰e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola e faavavau.

³¹A e peitai e toatele o e ua muamua e avea ma mulimuli; o e ua mulimuli foi e avea ma muamua.

³²Sa i le ala i latou, ua o ae o Ierusalema, o muamua foi Iesu ia te i latou; ua ofo i latou, ua latou mulimuli atu foi ma le mata‘u. Ona toe ave lea e ia le toasefulu ma le toalua, ua ta‘u atu ia te i latou mea a oo ia te ia,

³³ua faapea atu, Faauta, a tatou o ae nei i Ierusalema, e tuuina ai le Atalii o le tagata i le au faitaulaga sili, ma le au tusiupu; latou te faasala ia te ia, ia oti, latou te tuuina atu foi o ia i nuu ese,

³⁴e faatauemu i latou ia te ia, e sasa foi ia te ia, e feanu foi ia te ia, ma fasioti ia te ia; a e toe tu mai o ia i le aso tolu.

³⁵Ua o mai ia te ia o Iakopo ma Ioane, o atalii o Sepetaio, ua faapea mai, Le a‘oa‘o e, ua ma manao ina ia e faia mo i maua le mea a ma ole atu ai.

³⁶Ona fetalai atu lea o ia ia te i laua, Se a le mea lua te mananao i ai ou te faia mā oulua?

³⁷Ona la fai mai lea ia te ia, Ia e tuu mai ia te i maua, ma te nonofo o le tasi i lou itu taumatau, ma le tasi i lou itu tauagavale i lou mamalu.

³⁸A ua fetalai atu Iesu i te i laua, Lua te le iloa le mea lua te ole mai ai na. E mafai ea e oulua ona inu i le ipu ou te inu ai; ma ia papatisoina i le papatisoga e papatisoina ai a‘u?

³⁹Ona la fai mai lea ia te ia, Ma te mafaia. Ona fetalai atu lea o Iesu ia te i laua, Lua te inu lava i le ipu ou te inu ai; atoa ma le papatisoga e paaptisoina ai a‘u e papatisoina ai oulua;

⁴⁰a o le nofo i lo‘u itu taumatau ma lo‘u itu tausagavale, e lē o ia te au lea ona avatu, a e tau lava o e ua saunia mo i latou lea mea.

⁴¹Ua faalogo ai le toasefulu, ona tiga ai lea o latou loto ia Iakopo ma Ioane.

⁴²A ua valaau atu Iesu ia te i latou, ona faapea atu lea o ia ia te i latou, Ua outou iloa o alii o nuu ese ua aliitai i latou; o e ua sili foi o i latou, ua pule ia te i latou; a e le faapea outou;

⁴³a o se fia sili ia te outou, ia fai o ia ma a outou auauna;

⁴⁴o sē fia muamua foi ia te outou, ia fai o ia ma tautua a outou uma.

⁴⁵Auā foi o le Atalii o le tagata na le sau o ia ina ia auauna tagata ia te ia, a e peitai ia auauna o ia, ma foaiina atu lona ola o le togiola e sui a‘i tagata e toatele.

⁴⁶Ua oo i latou i Ieriko, o le a tuanai atu foi Ieriko e ia, atoa ma ona soo, ma le motu o tagata e toatele, a ua nofo mai i le auala o Patimaio le tauaso, le atalii o Timaio, o faatoga i mea māna;

⁴⁷ua faalogo o ia o i ai Iesu le Nasareta, ona alaga mai ai lea, ua faapea mai, Iesu e, le alo o Tavita, ia e alofa mai ia te au.

⁴⁸Ona matuā vavao atu lea o tagata e toatele ia te ia, ina ia faalologo ia; a o ia ua atili ai ona alaga, Le alo o Tavita e, ia e alofa mai ia te au.

⁴⁹Ua tu Iesu, ma fetalai atu ia valaauia o ia; ona latou valaau atu lea i le tauaso, ua faapea atu ia te ia, Ia e loto tele, ina tu ia, o loo valaau o ia ia te oe.

⁵⁰Ona tiai lea e ai lona ofu, ua tu i luga, ua sau ia Iesu.

⁵¹Ona fetalai atu lea o Iesu, ua faapea atu ia te ia, Se a se mea e te manao i ai ou te faia ia te oe? Ona fai mai lea o le tauaso ia te ia, Raponi e, ia vaai o‘u nei mata.

⁵²Ona fetalai atu lea o Iesu ia te ia, Ina alu ia; ua e ola oe i lou faatuatua. Ona vaai loa lea o ona mata; ona mulimuli atu ai lea o ia ia Iesu i le ala.