Read Samoan Old Version Bible – O LE TUSI PAIA MAREKO, 11 Bible Online

MAREKO, 11 - Samoan Old Version Bible – O LE TUSI PAIA bible

MAREKO, 11

¹Ua faalatalata atu i latou i Ierusalema, ua oo i Petefake ma Petania, i le mauga o Olive, ona aauina atu lea o ia ona soo e toalua,

²ua faapea atu foi ia te i laua, O ia oulua i le aai lua te lumanai; a oo i ai, lua te maua loa ai le tamai asini o loo noatia, e leai se tagata na tietie i ai; lua te tatalaina ma au mai.

³Afai foi e fai ane se tasi ia te oulua, Se a le mea lua te fai ai lea mea? ia oulua fai atu, E manao i ai le Alii; ona tuuina mai loa lea e ia.

⁴Ona o ai lea o i laua, ua maua le tamai asini o noatia i le faitotoa i fafo i le fetaulaiga ala, ona la tatalaina lea.

⁵Ona fai ane lea ia te i laua o isi o e na tutū ai, Se a le mea lua te tatala ai le tamai asini?

⁶Ona la fai atu lea ia te i latou pei ona poloai mai o Iesu; ona latou tuuina mai lea ia te i laua.

⁷Ona la ta‘ita‘iina mai lea o le tamai asini ia Iesu, ua lafo foi o latou ofu i ona luga, ona tietie ai lea o ia.

⁸E toatele ua latou fofolaina o latou ofu i le ala; a o isi ua latou ta ifo la o laau ma fola i le ala.

⁹Ua alalaga foi e na muamua, ma e na mulimuli, ua faapea, Osana! Ia manuia lē afio mai i le suafa o le Alii.

¹⁰Ia manuia le malo o lo tatou tamā o Tavita, e oo mai i le suafa o le Alii; Osana i mea e aupito i luga!

¹¹Ua oo Iesu i Ierusalema, ona maliu ane lea i le malumalu; ua na silasila solo i mea uma; ua oo i le afiafi, ona maliu atu lea o ia i Petania, faatasi ma le toatinogafulu ma le toalua.

¹²O le taeao ua o mai ai i latou mai Petania ua fia taumafa o ia.

¹³Ua silasila atu ia i le mati o mamao atu, ua i ai lau, ona maliu ane lea o ia i ai, pe maua ai sina mea; ua oo i ai, ona leai lava lea o se mea na ia maua, na o lau; auā e lei oo mai ona po o mati.

¹⁴Ona fetalai atu lea o Iesu, ua faapea atu i ai, Aua le toe‘aina lava e se tagata sina ou fua e oo i le faavavau; ua faalogo ai foi ona soo.

¹⁵Ua latou oo i Ierusalema; ua ulufale Iesu i le malumalu, ona tulia lea e ia i fafo o e na fefaatauai i le malumalu, ma fuli i lalo laulau o e na faatau tupe, ma nofoa o e na faatau lupe.

¹⁶Ua ia le mafai foi ina ia ui ane se tasi i le malumalu ma se avega.

¹⁷Ua a‘oa‘o atu foi o ia ia te i latou, ua faapea atu, E le ua tusia ea, E ta‘ua lo‘u fale o le fale tatalo mo nuu uma? a ua faia e outou ma ana o e fao mea.

¹⁸Ua faalogo ai le au tusiupu ma le au faitaulaga sili, ona latou saili ai lea, pe faapefea ona latou fasioti ia te ia; auā ua latou matatau ia te ia, ina ua ofo le motu o tagata uma i lana mataupu.

¹⁹Ua oo i le afiafi, ona maliu atu lea o ia i tua o le aai.

²⁰O le taeao ua ui ane ai i latou, ua iloa le mati ua mago, e oo lava i ona aa.

²¹Ona manatua ai lea e Peteru, ua fai mai ia te ia, Rapi e, faauta i le mati na e tu‘itu‘ia, ua mago.

²²Ona tali atu lea o Iesu ia te i latou, ua faapea atu, Ia outou faatuatua i le Atua;

²³auā e moni, ou te fai atu ia te outou, ai sē fai atu i lenei mauga, Ia siitia oe, ma ia lafoina i le sami, ma le le masalosalo lona loto, a e peitai e faatuatua ia e taunuu lava mea na ia fai atu ai, ona faia lea mo ia o le mea na te fai atu ai.

²⁴O le mea lea ou te fai atu ai ia te outou, o mea uma lava tou te ole mai ai i a outou tatalo, ina faatuatua ia o le a maua e outou, ona faia lava lea mo outou.

²⁵A outou tutū ma tatalo, ai se mea tou te tiga ai i se tasi, ia outou faamagaloina; ina ia faamagaloina foi e lo outou Tamā o i le lagi a outou agasala.

²⁶Afai foi tou te le faamagaloina, e le faamagaloina e lo outou Tamā o i le lagi a outou agasala.

²⁷Ua toe o ane i latou i Ierusalema, ua savali o ia i le malumalu, ona o mai lea ia te ia o ositaulaga sili, ma tusiupu, ma toeaina,

²⁸ua faapea mai ia te ia, O le a ea le pule e te fai ai ia mea? po o ai foi na ia avatu ia te oe lena pule e te fai ai ia mea?

²⁹Ona tali atu lea o Iesu ia te i latou, ua faapea atu, Ou te fesili atu foi se upu e tasi ia te outou, ia outou tali mai ai ia te au; ona ou ta‘u atu ai lea ia te outou le pule ou te fai ai nei mea.

³⁰O le papatisoga a Ioane, pe mai le lagi ea? pe mai tagata? ina tali mai ia ia te au.

³¹Ona latou felafolafoai lea, ua faapea ane, Afai tatou te fai atu, Mai le lagi; ona fai mai lea o ia, Se a foi le mea na outou le talitonu ai ia te ia?

³²A e peitai a tatou fai atu, Mai tagata; ua latou matatau i le nuu; auā ua taofi uma i latou ia Ioane, o le perofeta aiai ia.

³³Ona latou tali mai lea ia Iesu, ua faapea mai, Matou te le iloa. Ona tali atu lea o Iesu ia te i latou, ua faapea atu, Ou te le ta‘u atu foi ia te outou le pule ou te fai ai nei mea.