Read Samoan Old Version Bible – O LE TUSI PAIA MAREKO, 12 Bible Online

MAREKO, 12 - Samoan Old Version Bible – O LE TUSI PAIA bible

MAREKO, 12

¹Ona fetalai atu lea o ia ia te i latou i faataoto, Na totō e le tasi tagata le tovine, ua ia lotoāina i le āi, ua eli foi le mea e tali ai le suāvine, ua fai foi le ‘olo, ua tuuina atu i e galulue i vine, ona alu malaga lea o ia i le nuu ese.

²Ua fai le fuata, ona auina atu lea e ia le auauna i e galulue i vine, ina ia maua ni fua o le tovine i e galulue i vine.

³A ua latou pue ia te ia, ma sasa, ma aufuaina mai o ia.

⁴Ona toe auina atu lea e ia o le tasi auauna ia te i latou; ona latou fetogi lea ia te ia i maa, ua foa lona ulu, ma auina mai o ia ua agaleagaina.

⁵Ua toe auina atu foi e ia le tasi; ua latou fasiotia lava o ia; o isi foi e toatele, ua latou sasaina nisi, a ua fasioti nisi.

⁶Ona toe lea ia te ia na o lona atalii e toatasi, ua faapelepeleina e ia, ua muliai auina atu o ia ia te i latou, ua faapea ana, Latou te ava mai i lo‘u atalii.

⁷A o ia tagata galulue i vine, ua latou fetautalatala‘i, O le suli lenei; ina o mai ia, tatou fasioti ia te ia, ona fai ai lea o le fanua mo i tatou.

⁸Ona latou pue lea ia te ia, ma fasioti, ma lafo i tua o le tovine.

⁹O lenei, se a se mea e faia e le alii e ona le tovine? E sau o ia, ma faaumatia na tagata galulue i vine, ma tuu ane le tovine i nisi.

¹⁰Ua outou le faitau ea lenei upu a le Tusi, O le maa na lafoaiina e tufuga fai fale, ua fai lea ma maa tulimanu aupitoaluga;

¹¹o le mea lea na faia e le Alii, tatou te ofo ai pe a tatou vaavaai atu i ai?

¹²Ona latou fia pue ai lea ia te ia, a ua latou matatau i le vao tagata; auā ua latou iloa, na ia faatu le faataoto ia te i latou; ua latou tuua o ia, a e o ese.

¹³Ona latou aauina mai lea ia te ia nisi o le au faresaio ma nisi o le au Herotiano, latou te mailei ia te ia i ana upu.

¹⁴Ua latou oo mai, ona faapea mai lea ia te ia, Le a‘oa‘o e, ua matou iloa ua e faamaoi lava, ma ua e le mata‘u i se tasi, auā ua e le faailogaina se tagata; a e peitai ua e a‘oa‘o faamaoni lava i le ala o le Atua; pe sa ea ona avatu le taulaga ia Kaisara pe leai? a matou avatu ea? pe matou te le avatu?

¹⁵A ua silafia e ia lo latou pepelo, ona fetalai atu ai lea ia te i latou, Se a le mea tou te tofotofo mai ai ia te au? ina au mai ia ia te au se tenari, se‘i ou matamata i ai.

¹⁶Ona fetalai atu lea o ia ia te i latou, O ai ea e ona lenei faatagata, ma lenei tusi? Ona latou fai mai lea ia te ia, E o Kaisara.

¹⁷Ona tali atu lea o Iesu ia te i latou, ua faapea atu, Ina avatu ia o mea a Kaisara ia Kaisara; ia avatu foi mea a le Atua i le Atua. Ona latou ofo ai lea ia te ia.

¹⁸Ona o mai lea ia te ia o satukaio, o e taofi, e leai se toe tu; ua latou fesili mai ia te ia, ua faapea mai,

¹⁹Le a‘oa‘o e, ua tusi mai Mose ia te i matou, Pe a oti le uso o le tasi tagata, ma tuu ai lana avā a e leai se fanau, ona fai lea o lana avā ma avā a lona uso, e faatupuina ai se gafa mo lona uso.

²⁰Ia, sa i ai le au uso e toafitu; na fai avā le ulumatua, ua oti foi, ua leai se fanau.

²¹Ona fai avā lea ia te ia o lē aupito ane i ai, ua oti foi ia, ua leai foi sana fanau; ua faapea foi lona toatolu.

²²Atoa uma le toafitu ua fai avā ia te ia, a ua leai lava se fanau. A e muliai oti le fafine.

²³O lenei, a oo i le toe tu, pe a toe tu mai i latou, o ai so latou e ana le avā; auā sa fai avā le toafitu ia te ia?

²⁴Ona tali atu lea o Iesu ia te i latou, ua faapea atu, E le o lenei ea ua outou sese ai, ina ua outou le iloa upu o Tusi, ma le mana o le Atua?

²⁵auā pe a latou toe tutū mai i e ua oti, latou te le fai avā pe nofo tane; a e peitai latou te faapei o agelu o i le lagi.

²⁶A o e ua oti, ma lo latou toe tu, ua outou le faitau ai ea i le tusi a Mose, i le laau talatala, na fetalai mai le Atua ia te ia, ua faapea, O a‘u o le Atua o Aperaamo, o le Atua foi o Isaako, o le Atua foi o Iakopo?

²⁷E le o le Atua ia o e ua oti, a o le Atua o e ola; o lea, ua tele ai lava lo outou sese.

²⁸Ua sau foi le tasi o le au tusiupu, ua faalogo ane i la latou fesilisili, ua na iloa ua mālie ana sa tali atu ai ia te i latou, ona fesili mai lea o ia ia te ia, Po o le fea poloaiga e sili i poloaiga uma?

²⁹Ona tali atu lea o Iesu ia te ia, E sili lenei i poloaiga uma, Faalogo mai ia Isaraelu e; o le Alii lo tatou Atua, o le Alii e toatasi ia.

³⁰Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa. O le poloaiga sili lea.

³¹E faapena foi lona lua, o lenei, Ia e alofa atu i lē lua te tuaoi, ia pei o oe lava ia te oe. E leai lava se tasi poloaiga e sili i na poloaiga.

³²Ona fai mai lea o le tusiupu ia te ia, Mālie a oe le a‘oa‘o e, o le tonu lea ua e fatalai mai na; auā e toatasi lava le Atua; e leai lava se tasi ua na o ia.

³³Ia alofa foi ia te ia ma le loto atoa, ma le manatu atoa, ma le agaga atoa ma le malosi atoa; ma ia alofa i lē la te tuaoi e pei o ia lava ia te ia, e sili lea i taulaga mu atoa, ma taulaga uma.

³⁴Ua silafia e Iesu ua tali mai o ia ma le atamai, ona fetalai atu lea ia te ia, E te le vava mamao oe ma le malo o le Atua. Talu ai ua le toe faamalosi se tasi e fesili ia te ia.

³⁵Ua a‘oa‘o Iesu i le malumalu, ona fetalai atu lea o ia, ua faapea atu, Pe faapefea ona fai mai o le au tusiupu, o le Keriso o le atalii ia o Tavita?

³⁶auā ua fai mai Tavita lava e le Agaga Paia, Ua fetalai mai le Alii i lo‘u Alii, Ia e nofo i lo‘u itu taumatau, seia ou faia e ua ita mai ia te oe ma mea e tu ai ou vae.

³⁷O lenei, ua ta‘ua o ia e Tavita lava, o le Alii; pe faapefea ona avea o ia mona atalii? Ua faalogo foi ma le fiafia le motu o tagata e toatele ia te ia.

³⁸Ua fetalai atu foi o ia ia te i latou i lana a‘oa‘o atu Ia outou i le au tusiupu, o e ua fia evaeva ma ofu tatapuvae, ma ia alofaina i latou i malae,

³⁹atoa ma nofoa sili i sunako, ma mea sili e taoto ai i faigaai.

⁴⁰Ua latou faauma fale a fafine ua oti a latou tane, ma faalevaleva le tatalo e fai ma ufiufi, e atili ai ona faasalaina o i latou.

⁴¹Sa nofo Iesu e feagai ma le mea e teu ai tupe, ua silafia foi e ia le vao tagata o lafo tupe i le mea e teu ai tupe; e toatele foi o e mauoa, ua tele a latou ua lafo i ai.

⁴²Ua alu ane foi le tasi fafine mativa ua oti lana tane, ua lafo ane ai tupe iti e lua, o le kotane e tasi ia.

⁴³Ona valaau atu lea o ia i ona soo, ua fetalai atu ia te i latou, E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai;

⁴⁴auā o i latou uma, ua latou lafo nisi mea mai a latou mea ua tele; a o ia ua mativa ua ia lafo ana mea uma sa ia te ia, o ana mea uma e ola ai.