Read Samoan Old Version Bible – O LE TUSI PAIA MAREKO, 14 Bible Online

MAREKO, 14 - Samoan Old Version Bible – O LE TUSI PAIA bible

MAREKO, 14

¹Ua mavae po e lua ona oo lea i le paseka, ma areto e le faafefeteina; ona saili lea e le au faitaulaga sili ma le au tusiupu, pe faapefea sa latou mailei e pue ai ia te ia, ma fasiotia.

²A ua latou faapea ane, Aua le faia i le tausamiga, ne‘i faanunununu ai le nuu.

³Sa i Petania o ia i le fale o Simona le lepela, o taoto i le taumafataga, ona sau lea o le fafine ma le fagu alapasa, ua i ai le uu nato tau tele; ua tatae le fagu, ma liligi ai i luga o lona ao.

⁴Sa i ai nisi na tiga ai o latou loto, ma latou faapea ane, Pe se a le mea ua māumau ai faapea le uu manogi?

⁵auā ana faatauina lena mea, po ua maua ai tenari e tolu selau ma ona tupu, e foaiina atu ai i e matitiva; ona latou muimui lea i le fafine.

⁶A ua fetalai atu Iesu, Tuupea ia ia te ia; se a le mea tou te faalavelave ai ia te ia? o le mea lelei ua faia e ia ia te au nei.

⁷Auā tou te nonofo pea ma e matitiva, o aso uma foi tou te loto i ai ua outou mafaia ona agalelei atu ia te i latou; a o a‘u nei, tatou te le nonofo pea ma outou.

⁸Ua faia e ia le mea ua ia mafai ai; ua na uuina lo‘u tino e fai ma faataimuaga o lo‘u tanuga.

⁹E moni, ou te fai atu ia te outou, o nuu uma lava i le lalolagi e tala‘iina i ai lenei tala lelei, e ta‘ua ai foi lenei mea ua faia e ia, e faamanatu a‘i ia te ia.

¹⁰Ona alu lea o Iuta le Sekara, o le tasi o le toatinoagafulu ma le toalua, i le au faitaulaga sili, e faalataina ai o ia ia te i latou.

¹¹Ua latou faalogo ai, ona fiafia lea, ma latou folafola ni tupe ia te ia; ona lamalama lea e ia o se itu aso e faigofie ai ona faalataina o ia.

¹²O le aso muamua o areto e le faafefeteina, e osi ai le paseka, ua fai mai ai ona soo ia te ia, Po o fea e te finagalo i ai, matou te o e sauni e te taumafa ai le paseka?

¹³Ona aau atu le e ia o ona soo e toalua, ma na fetalai atu ia te i laua, Ina o ia oulua i le aai, tou te fetatai ai ma le tagata o ave le vai omea, lua te mulimuli atu ia te ia;

¹⁴e iloga foi le mea na te ulufale atu i ai, fai ane ia i le matai o le aiga, O loo fai mai le a‘oa‘o, O ifea le afeafe e api ai malo, ou te ‘ai ai le paseka ma o‘u soo?

¹⁵Na te faaali ane ia te oulua le afeafe tele e aupito i luga, ua uma ona teu; lua te sauni ai mo i tatou.

¹⁶Ona o atu ai lea o ona soo, ua oo i le aai, ua iloa atu ai foi e pei ona fetalai atu ai o ia ia te i laua; ona la sauniuni lea o le paseka.

¹⁷Ua oo i le afiafi, ona maliu ane lea o ia ma le toatinoagafulu ma le toalua.

¹⁸O loo taooto i latou ma aai, ona fetalai atu lea o Iesu, E moni, ou te fai atu ia te outou, o le tasi o outou o lē ‘ai faatasi nei ma a‘u, o ia na te faalataina a‘u.

¹⁹Ona tiga lea o i latou, ua latou taitasi ma faapea mai ia te ia, O a‘u ea? ua fai mai foi le tasi, O a‘u ea?

²⁰Ona tali atu lea o ia ia te i latou, ua faapea atu, O le tasi o le toatinoagafulu ma le toalua, o lē fufui faatasi nei o ma lima i le tanoa.

²¹E alu lava le Atalii o le tagata faapei ona tusia ia te ia; a o le tagata na te faalataina le Atalii o le tagata oi talofa ia te ia! e lelei i lea tagata pe ana le fanau mai o ia.

²²O loo aai i latou, a e tago Iesu i le areto, ua faafetai, ona tofitofi lea, ma avatu ai ia te i latou, ua faapea atu, Ina tago ia, ina aai, o lo‘u tino lenei.

²³Ua tago foi o ia i le ipu, ua faafetai, ma avatu ai ia te i latou, ua latou inu uma i ai.

²⁴Ua fetalai atu foi o ia ia te i latou, O lo‘u toto lenei, o le toto o le feagaiga fou, ua faamaligiina mo tagata e toetele.

²⁵E moni, ou te fai atu ia te outou, ou te le toe inu lava i le fua o le vine, seia oo i lea lava aso ou te inu ai le uaina fou i le malo o le Atua.

²⁶Ua uma ona faia o a latou pese, ona latou o atu lea i le mauga o Olive.

²⁷Ona fetalai atu lea o Iesu ia te i latou, Tou te tausuai uma ona o a‘u i lenei po; auā ua tusia, Ou te taia le leoleo mamoe, ona faapeape ai lea o mamoe.

²⁸A e peitai a mavae lo‘u toe tu, ona ou muamua atu ai lea ia te outou i Kalilaia.

²⁹A ua fai mai Peteru ia te ia, E ui lava ina tausuai o tagata uma, ou te le faapea lava a‘u.

³⁰Ona fetalai atu lea o Iesu ia te ia, E moni, ou te fai atu ia te oe, O lenei aso, o le po nei lava, a o lei oo i le vivini faalua o moa, e te faafiti faatolu mai ia te au.

³¹Ona atili ai lea ona fai mai o ia, E ui lava ina ta oti faatasi ma oe, ou te le faafiti lava ia te oe. Ua faapea foi ona fai mai o i latou uma.

³²Ua latou oo atu i le fanua, o Ketesemane lona igoa; ona fetalai atu lea o ia i ona soo, Ina nonofo ia outou iinei, se‘i ou tatalo.

³³Ua ō ane foi o ia ma Peteru, ma Iakopo, ma Ioane, ona matautuia lea o ia, ma atuatuvale.

³⁴Ona fetalai atu lea o ia ia te i latou, O loo matuā tiga lava lo‘u loto e oo i le oti; ina nonofo ia outou iinei, ma mataala.

³⁵Ua faaitiiti atu ia i luma, ona faapaū lea o ia i le eleele, ma tatalo ina ia mavae atu lea itu aso ia te ia, pe afai e mafaia.

³⁶Ua faapea atu, Ava, lo‘u Tamā e, e te mafaia e oe mea uma lava; ia e aveeseina lenei ipu ia te au; a e aua le faia lo‘u loto, a o lou finagalo.

³⁷Ona maliu ane lea o ia, ua maua i latou o momoe; ona fetalai atu lea o ia ia Peteru, Simona e, ua e moe ea? e te le lavā ea ona mataala i le itu po e tasi?

³⁸Ina mataala ia, ma tatalo, ne‘i oo mai le faaosoosoga ia te outou; ua manao i ai le loto, a o le tino ua vaivai.

³⁹Ua toe maliu atu o ia, ua toe tatalo, ua fetalai atu le upu lava e tasi.

⁴⁰Ua toe foi mai o ia, ua toe maua i latou o momoe, auā ua maaa o latou laumata; ua latou le iloa foi pe se a latou te tali atu ai ia te ia.

⁴¹Ua toe foi mai o ia ia te i latou, o le atu tolu lea, ua faapea atu foi o ia ia te i latou, Ina momoe pea ia, ma malolo; soia; ua oo mai le itu po; faauta, ua tuuina atu le Atalii o le tagata i lima o tagata agasala.

⁴²Ina tutū ia, ia tatou o. Faauta, ua latalata mai o ia na te faalataina a‘u.

⁴³O loo fetalai o ia a e sau loa Iuta, o le tasi o le toatinoagafulu ma le toalua, ua faatasi mai foi ma ia le motu o tagata e toatele mai le au ositaulaga sili, ma le au tusiupu, ma toeaina, ua ia te i latou o pelu ma uatogi.

⁴⁴Na tuuina atu e le na faalataina o ia le faailoga ia te i latou, ua faapea atu, O lē ou te sogi atu i ai, o ia lea; tou te pue ia te ia, ma ta‘ita‘iina atu, ma taofimauina.

⁴⁵Ua oo mai o ia, ona soso mai loa lea ia te ia, ua fai mai, Rapi e, rapi e; ua sogi ane foi ia te ia.

⁴⁶Ona oo atu lea o latou lima ia te ia, ua latou pue foi ia te ia.

⁴⁷O le tasi o i latou o e na tutū i ai, ua ia toina lana pelu, ua ta le auauna a le ositaulaga sili, ua tipiesea lona taliga.

⁴⁸Ona fetalai atu lea o Iesu ia te i latou, ua faapea atu, Ua outou o mai ea ma pelu ma uatogi e pue mai ai ia te au, peiseai se fao mea?

⁴⁹Sa tatou faatasi ma a‘u i le malumalu, sa ou a‘oa‘o atu ai i aso fai soo, tou te lei pueina ai a‘u; a ua faia ina ia taunuu ai Tusi.

⁵⁰Ona tuua ai lea o ia e i latou uma, ua sosola.

⁵¹A ua mulimuli atu ia te ia le tasi taulealea, ua pulupulu lona tino i le ie lino, ua pue atu foi e taulelea ia te ia;

⁵²a ua tuua e ia le ie lino, ua sola ia te i latou ua le lavalavā.

⁵³Ona latou ta‘ita‘i lea ia Iesu i le ositaulaga sili; ua potopoto uma atu foi ia te ia le au faitaulaga sili, ma toeaina, ma le au tusiupu.

⁵⁴Ua mulimuli mamao mai foi Peteru ia te ia, ua oo lava i le maota o le ositaulaga sili; ua nofo ai i lalo faatasi ma auauna, ma mumulu i le afi.

⁵⁵A o le au ositaulaga sili, ma le taupulega uma, ua latou saili i mau ia Iesu, ina ia fasioti ia te ia; a e lei maua lava.

⁵⁶Auā e toatele ua latou molimau pepelo ia te ia, a e le tutusa a latou mau.

⁵⁷Ona tutū lea o isi, ma molimau pepelo ia te ia, ua faapea atu,

⁵⁸Na ma faalogo atu ia te ia, ua faapea mai, Ou te lepetia lenei malumalu na faia e lima, ma ou toe faia se tasi i aso e tolu, e lei faia e lima.

⁵⁹A ua le tutusa a la mau i lea mea.

⁶⁰Ona tu lea o le ositaulaga sili i totonu, ua fesili mai ia Iesu, ua faapea mai, E te le tali mai ea sina upu? Pe se a le mau a nei tagata ia te oe?

⁶¹A ua le fetalai o ia, ua leai foi sana tali. Ona toe fesili mai lea o le ositaulaga sili ia te ia, ua faapea mai ia te ia, O oe ea o le Keriso, o le Alo o Lē viia?

⁶²Ona fetalai atu lea o Iesu, O a‘u lava lea; tou te iloa foi le Atalii o le tagata e nofo i le itu taumatau o Le e ona le mana, e sau foi o ia i ao o le lagi.

⁶³Ona saeia lea e le ositaulaga sili o ona lava ofu, ua faapea ane, Se a ea le toe aoga ia te i tatou o molimau?

⁶⁴Ua outou faalogo i le upu leaga i le Atua. Pe ni a fa outou? Ona fai mai lea o i latou uma, E tatau ona oti o ia.

⁶⁵Ona feanu ai lea o isi ia te ia, ma ufiufi i ona fofoga, ma tu‘i ia te ia, ua faapea mai foi ia te ia, Ina iite mai ia; o le au auauna foi, ua latou taufaipo mai ia te ia.

⁶⁶Sa i lalo Peteru i le maota; ona alu atu ai lea o le tasi auauna teine a le ositaulaga sili;

⁶⁷ua iloa e ia o Peteru o loo mumulu, ua na vaai atu foi ia te ia, ua faapea atu, O oe foi sa oulua faatasi ma Iesu le Nasareta.

⁶⁸A o ia ua faafiti, ua faapea, Ou te lei iloa o ia, ou te le lagona foi le mea ua e fai mai na. Ona alu atu lea o ia i fafo i le faapaologa o le lotoā, ona vivini lea o moa.

⁶⁹Ua toe iloa o ia e le auauna teine, ona fai atu lea o ia i e ua tutū mai, O le tasi lena o i latou. Ona toe faafiti lea o ia.

⁷⁰Ua toe itiiti ona toe fai atu lea o e tutū mai ia Peteru, E moni, o oe lava lo latou; auā o le Kalilaia oe, ua tusa ai lau gagana.

⁷¹Ona augani lea o ia ma tauto, ua faapea, Ou te le iloa lava lea tagata tou te fai mai ai na.

⁷²Ona vivini faalua lea o moa. Ona manatua lea e Peteru o le upu na fetalai atu ai Iesu ia te ia, E le vivini faalua moa, seia e faafiti faatolu mai ia te au. Ua manatunatu ifo ia, ona tagi ai lea o ia.