Read Samoan Old Version Bible – O LE TUSI PAIA MAREKO, 3 Bible Online

MAREKO, 3 - Samoan Old Version Bible – O LE TUSI PAIA bible

MAREKO, 3

¹Ua toe ulu atu ia i le sunako, sa i ai foi le tagata ua gase lona lima.

²Ona latou lamalama lea ia te ia, pe na te faamaloloina o ia i le sapati, ina ia latou molia o ia.

³Ua fetalai atu ia i le tagata ua gase lona lima, Ina tulai mai ia i totonu.

⁴Ona fetalai atu lea o ia ia te i latou, Pe sa ea le agalelei i le sapati, po o le agaleaga; o le faaola, po o le fasioti? A ua latou faalologo.

⁵Ua ia silasila solo ia te i latou ma le toasa, ina ua tiga o lona finagalo, auā o latou loto ua maaa, ona fetalai atu lea o ia i le tagata, Ina faaloaloa ia lou lima. Ona faaloaloa ai lea e ia, ona toe lelei ai lea o lona lima, ua pei o le tasi.

⁶Ona o i fafo lea o le au faresaio, ua taupulepule loa i latou ma le au Herotiano ia te ia, ina ia latou fasioti ia te ia.

⁷A o Iesu, ua maliu atu ia ma ona soo e latalata ane i le vai; ua mulimuli atu foi ia te ia le motu o tagata e toatele mai Kalilaia, ma Iutaia,

⁸ma Ierusalema, atoa ma Itumaia, ma tala atu o Ioritana, atoa ma i latou mai le itu o Turo ma Saitonu, e toatele lava ua o mai ia te ia, ina ua latou faalogo i ia mea sa na faia.

⁹Ua fetalai atu foi o ia i ona soo ia faatali mai se vaa laitiiti ia te ia, auā o le motu o tagata ina ne‘i fetaomi mai i latou ia te ia.

¹⁰Auā e toatele na ia faamaloloina, o lea ua fetaomi mai ai ia te ia e na maua e ma‘i tiga, ina ia latou papai mai ia te ia.

¹¹O agaga leaga foi, ua latou iloa mai o ia, ona faapauu lea o latou i ona luma, ma latou alalaga, ua faapea mai, O oe lava o le Alo o le Atua.

¹²A ua matuā vavao atu o ia ia te i latou, aua ne‘i latou faaalia o ia.

¹³Ua maliu ae ia i le mauga, ona valaau atu lea o ia i e ua ia finagalo i ai; ona latou o mai lea ia te ia.

¹⁴Ona tofia lea e ia le toatinoagafulu ma le toalua, ina ia latou faatasi ma ia, ia na aauina atu foi i latou e tala‘i i le tala lelei;

¹⁵ina ia tuuina atu foi le pule ia te i latou, latou te faamalolo ai ma‘i, ma tutuli ai temoni.

¹⁶Ua ia faaigoa ia Simona o Peteru;

¹⁷ma Iakopo le atalii o Sepetaio, ma Ioane le uso o Iakopo; ua ia faaigoa foi ia te i laua o Poaneki, o lona uiga, O tagata faititili;

¹⁸ma Aneterea, ma Filipo, ma Patolomaio, ma Mataio, ma Toma, ma Iakopo le atalii o Alefaio, ma Tataio, ma Simona o le Kanana,

¹⁹ma Iuta le Sekara, o le na faalataina o ia.

²⁰Ua o atu i latou i le fale; ona toe potopoto mai lea o le motu o tagata, ua le mafai ai i latou ona aai.

²¹Ua faalogo ai lona aiga, ona latou o atu ai lea e pue ia te ia; auā na latou faapea ane, Ua valea o ia.

²²A o le au tusiupu e na o ifo mai Ierusalema, ua faapea ane i latou, O ia te ia Pelesepulo, o le alii foi o temoni, e tuli ai e ia o temoni.

²³Ua valaau atu ia ia te i latou, ona fetalai atu lea ia te i latou i faataoto, E mafai faapefea e Satani ona tulia o Satani?

²⁴Afai foi e fevaevaeai se malo, e le mafai ona tumau o lena malo.

²⁵Afai foi e fevaevaeai se aiga, e le mafai ona tumau o lena aiga.

²⁶Afai foi e tetee atu Satani ia te ia lava, ma fevaevaeai o ia, ona le mafai ai lea ona tumau o ia, a e oo i lona iuga.

²⁷E leai se na te mafaia ona ulu atu i le fale o le tagata malosi, ma vete ana mea, seai lua‘i noanoatia le tagata malosi, i le vete ai lona fale.

²⁸E moni, ou te fai atu ia te outou, E faamagaloina agasala uma a tagata, atoa ma upu leaga uma latou te upu leaga ai;

²⁹a o lē upu leaga i le Agaga Paia, e le faamagaloina o ia, a le tu a le tu lava; a e peitai e tatau ia te ia le sala e faavavau.

³⁰Na ia faapea atu, auā na latou fai mai, O ia te ia le agaga leaga.

³¹Ona o mai ai lea o ona uso ma lona tinā, ua tutū i fafo, ma feau atu ia te ia, ma valaau atu ia te ia.

³²Ua nonofo vagavagai ia te ia le motu o tagata, ua latou fai ane foi ia te ia, Faauta, o lou tinā ma ou uso o i fafō, o saili ia te oe.

³³Ona tali atu lea o ia te i latou, ua faapea atu, O ai ea lo‘u tinā? O ai foi o‘u uso?

³⁴Ona silasila solo ai lea o ia i e nonofo vagavagai ia te ia, ua faapea atu, Faauta i lo‘u tinā ma o‘u uso.

³⁵Auā o lē faia le finagalo o le Atua o lo‘u uso lea, ma lo‘u tuafafine, ma lo‘u tinā.