Read Samoan Old Version Bible – O LE TUSI PAIA MAREKO, 4 Bible Online

MAREKO, 4 - Samoan Old Version Bible – O LE TUSI PAIA bible

MAREKO, 4

¹Ua toe amata o ia ona a‘oa‘o atu e latalata i le vai, ua potopoto mai ai ia te ia le motu o tagata e toatele; o le mea lea na maliu ae ai o ia i le vaa, ua nofo ai i le vai; a o le motu o tagata uma sa i le auvai i latou.

²E tele mea ua ia a‘oa‘o atu ai ia te i latou i faataoto, ua faapea atu foi o ia ina ua a‘oa‘o atu,

³Ina faalogologo mai ia outou; faauta, o le tagata lulu saito, ua alu atu ia e lulu ai saito.

⁴Ua ia lulu saito, ona paū lea isi i le auala, ona o ane lea o manu felelei, ua aai ai.

⁵Ua paū foi isi i le mea papa, e itiiti lava le eleele sa i ai; ona tupu lise lea ia, auā o le eleele ina itiiti.

⁶Ua alu ae le la, ua velasia ai, ona magumagu ai lea, ona ua leai ni aa.

⁷Ua paū foi isi i le vao tuitui, ua tutupu ae le vao tuitui, ona fetinaiina ai lea, e lei fua mai lava.

⁸A ua paū isi i le eleele lelei, ua tutupu ae, ma tupu tele, ua fua mai, e taitolu sefulu i nisi, e taiono sefulu i nisi, a e taiselau i nisi.

⁹Ua ia fetalai atu foi ia te i latou, O le ua i ai taliga e faalogo ai, ina faalogo mai ia o ia.

¹⁰Ua toatasi ia, ona fesili ane lea ia te ia o e ua faatasi ma ia, atoa ma le toatinoagafulu ma le toalua i le faataoto.

¹¹Ona fetalai atu lea o ia ia te i latou, Ua foaiina atu ia te outou ina ia outou iloa mea lilo a le malo o le Atua; a o i latou o i tua, ua fai atu mea uma ia te i latou i faataoto;

¹²ina ia latou le iloa i lo latou matuā vaai; ina ia latou le lagona foi i lo latou matuā faalogologo; ina ne‘i liliuina i latou, ma faamagaloina a latou agasala.

¹³Ua ia fetalai atu foi ia te i latou, Tou te le iloa ea lenei faataoto? Pe faapefea foi ona outou iloa o faataoto uma?

¹⁴O lē lulu saito, e lulu ia i le upu.

¹⁵O i latou ia i le auala e luluina ai le upu; a latou faalogo ai, ona alu ane loa lea o Satani, ma aveeseina le upu na luluina i o latou loto.

¹⁶E faapea foi i latou na luluina i le mea papa, o i latou ia ua faalogo i le upu, ona talia loa lea ma le fiafia.

¹⁷A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea.

¹⁸O i latou foi sa luluina i le vao tuitui, o i latou ia e na faalogo i le upu,

¹⁹a o le loto popole i mea a lenei lalolagi, ma le pepelo o le oa, ma le tu‘inanau i nisi mea, ua oo atu i totonu o le loto, ua fetinaiina ai le upu, ona le fua mai lava lea.

²⁰A o i latou na luluina i le eleele lelei, o i latou ia e ua faalogo i le upu, ma latou talia, ma fua mai e taitolugafulu i nisi, e taiono sefulu i nisi, e taiselau foi i nisi.

²¹Ua fetalai atu foi o ia ia te i latou, E au mai na ea se lamepa ina ia tuuina i lalo o le mea e fua a‘i saito, po o i lalo o le moega? E le faatuina ea i luga o le tuugālamepa?

²²Auā e leai se mea lilo e le faaalia; e leai foi se mea e nātia, a e iu ina faailoa lava.

²³O le ua i ai taliga e faalogo ai, ina faalogo mai ia o ia.

²⁴Ua ia fetalai atu foi ia te i latou, Ia outou i mea tou te faalogo i ai; o le fua tou te fua atu ai, e toe fuaina mai ai ia te outou; o outou o e faalogologo, e faaopoopoina ia te outou.

²⁵Auā o le ua i ai mea, e avatua pea ia te ia; a o le ua leai ni ana mea, e aveeseina le mea ua ia te ia.

²⁶Ua ia fetalai atu foi, O le malo o le Atua ua faapei o le tagata ua na luluina saito i le eleele.

²⁷Ua moe foi o ia i le po, ma ala i le ao; a ua totogo ae le saito, ma tutupu, ua na le iloa pe na faapefea ia;

²⁸auā ua tupu fua ia i le eleele; e muamua ōna lau, ona oo lea i lona fuga mai, mulimuli ane foi ua i ai saito matua.

²⁹A afu le saito, ona selesele loa lea, auā ua oo i ona po e selesele ai.

³⁰Ua fetalai atu foi o ia, Se a se mea tatou te faatusa i ai le malo o le Atua? se a foi se faataoto tatou te faatusaina ai?

³¹E tusa ia ma le fua o le sinapi; a totōina i le eleele, e sili ona laitiiti i fua uma e tutupu i le eleele.

³²Pe a totōina foi, ona tupu ae lea, ua avea foi ma laau tele, ua sili i laau uma e afu, ua fai foi ōna a tetele, e mafai ai manu felelei ona momoe i lalo o lona paolo.

³³Ua ia fetalai atu foi le upu ia te i latou i faataoto faapena e tele, e faatatau i mea ua mafai ona latou lagona.

³⁴Ua na o faataoto na ia fetalai atu ai ia te i latou; a e peitai na ia faamatalatalaina mea uma i ona soo i tua.

³⁵O lea lava aso, ua oo i le afiafi, ona fetalai atu lea o ia ia te i latou, Ina tatou o atu ia i le tasi itu.

³⁶Ua latou tuua le motu o tagata, ua i le vaa o ia, ona latou avea loa lea o ia; ua faatasi foi ma ia isi vaa iti.

³⁷Ona to mai lea o le afā, o le matagi tele lava; ona fati mai ai lea o peau i totonu o le vaa, ua tumu ai.

³⁸A o ia sa i le taumuli, ua tofa i le aluga; ona latou fafagu lea ia te ia, ma fai mai ia te ia, Le a‘oa‘o e, e te le manatu mai ea ia te i matou a fano?

³⁹Ona tulai lea o ia, ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū.

⁴⁰Ona fetalai atu lea o ia ia te i latou, Se a le mea tou te fefefe ai faapea? se a le mea tou te le faatuatua mai ai?

⁴¹Ona matuā matatau lava lea o i latou, ma fetautalatalai i latou, Po o ai lava lenei, ina ua faalogo lava le matagi ma le vai ia te ia?