Read Samoan Old Version Bible – O LE TUSI PAIA MAREKO, 5 Bible Online

MAREKO, 5 - Samoan Old Version Bible – O LE TUSI PAIA bible

MAREKO, 5

¹Ua oo atu i latou i le tasi itu o le vai, i le laueleele o Katara.

²Ua maliu atu ia nai le vaa, ona fetaiai loa lea ma ia o le tagata mai tuugamau, ua ia te ia le agaga leaga,

³sa mau o ia i tuugamau; e le mafai foi se tasi ona noanoatia o ia i maea uamea lava.

⁴Auā ua atu lasi ona noanoatia o ia i mea e faamau a‘i vae, atoa ma maeā uamea; a ua motumotusia e ia o maea uamea, ua tu‘ipalaina foi mea e faamaū a‘i vae; e leai foi se na ia mafaia ona faalata ia te ia.

⁵Sa i ai pea lava o ia i tuugamau ma mauga i le po ma le ao; sa alaga, ma selei o ia ia te ia i maa.

⁶Ua iloa mamao mai e ia o Iesu, ona momo‘e mai lea, ma ifo ia te ia,

⁷ua alaga mai foi o ia ma le leo tele, ua faapea mai, Se a lau na ia te au nei, Iesu e, le Alo o le Atua silisili ese? ou te fai atu ia te oe ia e tauto mai i le suafa o le Atua, e te le faatiga mai ia te au.

⁸Auā ua fetalai atu o ia ia te ia, Alu ia i fafo i le tagata, o oe na le agaga leaga.

⁹Ua fesili atu foi o ia ia te ia, Po o ai lou igoa? Ona tali mai lea o ia, ua faapea mai, O Lekeono lo‘u igoa; auā e totele i matou.

¹⁰Ua matuā aioi mai foi o ia ia te ia ina ia na le aueseina i latou i lea nuu.

¹¹Sa i ai foi le lafu puaa e tele, ua tataa e lata ane i mauga.

¹²Ua aioi mai foi temoni uma ia te ia, ua faapea mai, Ia e aauina i matou i puaa, matou te uluitino ai.

¹³Ona tuu atu loa lea e Iesu ia te i latou. Ua o i fafo agaga leaga, ona latou uluitino lea i puaa; ona feosofi ifo ai lea o le lafu i le tofē i le vai, pe atoa le lua o afe i latou; ona malelemo ai lea i le vai.

¹⁴Ona sosola lea o e sa fagaina puaa, ma tala atu ai i le aai ma ona faoa aai; ona latou o mai lea e matamata i le mea ua faia.

¹⁵Ua latou o mai foi ia Iesu, ma ua iloa o ia sa uluitinoina e temoni, sa i ai le lekeono, ua nofo i lalo o ia, ua ofu foi, ma ua atamai; ona latou matatau ai lea.

¹⁶O e na iloa, ua latou faamatala atu ia te i latou i le uiga o le mea na faia i le na uluitinoina, atoa ma puaa.

¹⁷Ona latou aioi atu lea ia te ia ina ia maliu ese atu ia i lo latou nuu.

¹⁸Ua maliu ae o ia i le vaa, ona aioi mai lea ia te ia o le na uluitinoina ina ia la faatasi ma ia.

¹⁹A o Iesu ua le mafai, a ua fetalai atu ia te ia, Alu atu ia oe i lou fale, i lou aiga, ma ia e ta‘u atu ia te i latou mea tetele ua faia e le Alii ia te oe, ma lona alofa ia te oe.

²⁰Ua alu foi o ia, ma na tala‘i i Tekapoli o mea tetele ua faia e Iesu ia te ia; ona ofo ai lea o tagata uma.

²¹Ua toe foi atu Iesu i le vaa i le tasi itu, ona potopoto mai lea o le motu o tagata e toatele ia te ia, sa latalata ane o ia i le vai.

²²Faauta foi, ua sau le tasi o e pule i le sunako, o Iairo lona igoa; ua na iloa o ia, ona faapaū ai lea i ona vae;

²³ua ia matuā aioi mai foi ia te ia, ua faapea mai, O le a oti nei lava si o‘u afafine, ina e maliu atu, ma ia e faaee ou aao i luga ia te ia e malolo ai, ona ola ai lea o ia.

²⁴Ona la maliu atu lea ma ia; ua mulimuli atu foi ie te ia le motu o tagata e toatele, ma latou fetoami lava ia te ia.

²⁵O le tasi fafine, ua ia te ia le puna toto i tausaga e sefulu ma le lua,

²⁶e tele foi mea na ia tiga ai i fomai e toatele, ua uma atu ai foi ana oloa, a e lei aoga lava ia te ia, a e peitai ua atili ai lona ma‘i,

²⁷ua faalogo o ia ia Iesu, ona alu ane lea i ona tua, i totonu lava o le motu o tagata, ua pa‘i ane i lona ofu;

²⁸auā ua faapea o ia, Afai ou te pa‘i atu tau lava o ona ofu, ona ou malolo ai lea.

²⁹Ona utu loa lea o lona puna toto; ona iloa lea e ia lona tino ua faamaloloina i lona ma‘i tiga.

³⁰Ua silafia loa e Iesu i lona lava finagalo, ua alu atu le mana nai ia te ia, ona fāliu lea o ia i le motu o tagata, ua faapea atu, Po o ai ea na pa‘i mai i o‘u ofu?

³¹Ona fai mai lea o ona soo ia te ia, Ua e silafia le motu o tagata, o loo fetaomi mai i latou ia te oe, a e te fetalai mai ea, Po o ai na pa‘i mai ia te au?

³²Ua silasila solo foi o ia ina ia silafia le na faia lea mea.

³³A o le fafine, ua mata‘u ma gatete, ua na iloa le mea ua faia ia te ia, ua sau ma faapaū o ia i ona luma, ma ta‘utino atu le tonu ia te ia.

³⁴A ua fetalai atu ia ia te ia, Lo‘u afafine e, ua e ola i lou faatuatua; ina alu ia oe ma le manuia, ma ia e malolo i lou ma‘i tiga.

³⁵Ua o mai nisi mai le fale o le ua pule i le sunako, a o fetalai mai o ia, ua faapea mai i latou, Ua oti lou afafine; se a le mea e te faalavelave ai pea i le a‘oa‘o?

³⁶A o Iesu ua faafofoga i le tala ua ta‘uina mai ai, ona fetalai atu loa lea o ia i le ua pule i le sunako, Aua e te mata‘u; tau lava ina e faatuatua.

³⁷Ua le mafai o ia ona ia mulimuli atu se tasi ia te ia na o Peteru, ma Iakopo, ma Ioane le uso o Iakopo.

³⁸Ua oo i le fale o lē pule i le sunako, ona silafia lea e ia o le lauaitu, ma e o taufaitagi, ma e o taufaiaue tele.

³⁹Ua ulufale atu ia, ona faapea atu lea ia te i latou, Se a le mea ua outou pisaō ai, ma outou fetagisi ai? e le oti le teine, ua na ona moe.

⁴⁰Ona latou tapisa ai lea ia te ia. A ua ia tulia i latou uma i fafo, ona ave lea e ia le tamā o le teine, atoa ma lona tinā, ma e na o mai ma ia ua ulu atu foi i le mea ua taoto ai le teine.

⁴¹Ona tago ifo lea o ia i le lima o le teine, ma fetalai atu ia te ia, Talita kumi; (o lona faamatalaga lenei, Funa e, ou te fai atu ia te oe, ia e tulai).

⁴²Ona tulai loa lea o le teine ua savali, auā ua sefulu ma le lua ona tausaga; ona segia lea o latou mauli.

⁴³Ua matuā vavao o ia ia te i latou, ne‘i iloa e se tasi lea mea; ua fetalai atu foi, ia avatua ia te ia sina ana mea e ‘ai.