Read Samoan Old Version Bible – O LE TUSI PAIA MAREKO, 6 Bible Online

MAREKO, 6 - Samoan Old Version Bible – O LE TUSI PAIA bible

MAREKO, 6

¹Ua tuua e ia lea mea, ona maliu atu lea i lona lava nuu; ua mulimuli atu foi ona soo ia te ia.

²Ua oo i le sapati, ona a‘oa‘o atu lea e ia i le sunako, e toatele o e na faalogo ai, ua ofo i latou, ua faapea atu, Maifea na maua ai e lenei tagata ia mea? se a foi lenei poto ua tuuina atu ia te ia, ina ua faia e ona lima vavega e faapena ona tele?

³E le o le tufuga ea lenei, le tama a Maria, o lona uso foi o Iakopo, ma Iose, ma Iuta, ma Simona? e le o iinei foi ea ia te i tatou ona tuafāfine? Ona latou tausuai ai lea ia te ia.

⁴A ua fetalai atu Iesu ia te i latou, E leai se perofeta e le mamalu, ua na o lona lava nuu, ma lona aiga, ma lona fale e le mamalu ai.

⁵Ona le mafaia lea e ia ona fai o se vavega i lea mea, na o nai tagata mamai e toaitiiti ua ia faaee ai ona lima, ma faamaloloina.

⁶Ua ofo foi o ia i lo latou le faatuatua; ona faataamilo lea o ia i faoa aai, ma a‘oa‘o atu.

⁷Ua valaau atu ia i le toatinoagafulu ma le toalua, ona aau atu lea ia te i latou e taitoalua, ua ia tuu atu foi ia te i latou le pule i agaga leaga;

⁸ma na fetalai atu ia te i latou, aua latou te ave se mea i a latou malaga, tau lava o le tootoo e tasi; aua se taga, aua ni mea e ‘ai, ia leai foi ni tupe i o latou fusi,

⁹a ia faaseevaeina o latou vae; aua foi le tailua o ofu e ofu ai.

¹⁰Ua fetalai atu foi o ia ia te i latou, O se mea tou te ulu atu ai i se fale, ia outou nonofo ai i le tou o ai.

¹¹Ai se le talia outou, pe le faalogo ia te outou, a outou o ese i lea mea, i le tou tūtū atu ai le eleele nai o outou vae, e fai ma molimau ia te i latou; e moni, ou te fai atu ia te outou, e feoloolo Sotoma ma Komoro i le aso faamasino, i lea lava aai.

¹²Ona latou o atu ai lea ma tala‘i atu ina ia latou salamo.

¹³E toatele foi temoni ua latou tulia, e toatele foi o e na mamai ua latou faauuina i le suāuu, ma faamaloloina.

¹⁴Ua faalogo ai le tupu o Herota, (auā ua ta‘ua lona suafa,) ona fai ane lea o ia, Ua tulai Ioane le papatiso nai e ua oti, o le mea lea ua fai ai e ia o vavega.

¹⁵Ua fai ane isi, O Elia lena; a o isi, ua faapea ane, O le perofeta ia, pe faapei o se tasi o le au perofeta.

¹⁶A ua faalogo ai Herota, ona fai ane lea, O Ioane lena sa ou vavaeeseina lona nuu; ua toe tulai ia nai e ua oti.

¹⁷Auā sa aauina nisi e Herota e pue ia Ioane, ma noanoa ia te ia i le fale puipui, ona o Herotia le avā a Filipo lona uso, ina ua fai o ia māna avā.

¹⁸Auā sa fai atu Ioane ia Herota, E sa ona e fai avā i le avā a lou uso.

¹⁹O lea na ita ai Herotia ia te ia, na ia fia fasioti foi ia te ia, a ua le mafai;

²⁰auā sa mata‘u Herota ia Ioane, ina ua iloa o le tagata amiotonu o ia, ma le paia; sa leoleo foi o ia ia te ia, na faalogo foi ia te ia, ma na faia mea e tele, ma faalogo ia te ia ma le fiafia.

²¹Ua oo i le aso e paganoa, o le aso lea e fai ai le faamanatuga o le fanau mai o Herota, na fai ai e ia le talisuaga tele i alii sili, ma alii o ‘au e taitoaafe, ma matai sili o Kalilaia.

²²Ua ulufale foi le tama teine a Herotia ua saa, ua faafiafia ai ia Herota, atoa ma i latou sa taooto e aai faatasi ma ia; ona fai atu ai lea o le tupu i le teine, Ia e fai mai ia te au se mea e te manao i ai, ou te avatu lava ia te oe;

²³ua ia augani foi ia te ia, So se mea e te fai mai ai, ou te avatua lava ia te oe, e oo lava i le vaeluagalemu o lo‘u malo.

²⁴Ona ulufafo lea o ia, ma fai atu i lona tinā, Se a se mea ou te fai atu i ai? Ua fai mai e ia, O le ulu o Ioane le papatiso.

²⁵Ona ulufale loa lea o ia i le tupu, ua tele lise, ua fai atu ia te ia, ua faapea atu, Ou te manao ina ia e au mai nei lava le ulu o Ioane le papatiso i se tanoa.

²⁶Ona tiga tele ai lea o le tupu; a ona o lana augani, ma e ua taooto e aai faatasi ma ia, ua ia le mafai ona faafiti atu ia te ia.

²⁷A ua auina loa e le tupu le tasi o le ‘au e faafeao, ua fai atu ia aumaia lona ulu. Ona alu ai lea o ia, ma vavaeeseina lona ulu i le fale puipui.

²⁸Ua ia au mai foi lona ulu i le tanoa, ua avane i le teine; ua avatu foi e le teine i lona tinā.

²⁹Ua faalogo ai ona soo, ona o ane lea o i latou, ma ave lona tino, ma tuu ai i le tuugamau.

³⁰Ua potopoto mai le au aposetolo ia Iesu, ua latou talatala mai foi ia te ia i mea uma, o mea na latou faia, atoa ma mea na latou a‘oa‘oina.

³¹Ona fetalai atu lea o ia ia te i latou, Ina o mai ia, tau lava o i tatou, i se mea tuufua, se‘i tou mapu ae teisi; auā e toatele e na feoai ai, ua le mafai ai i latou ona aai.

³²Ona latou o atu ai lea ua na o i latou i le vaa i le mea tuufua.

³³A ua vaai atu le motu o tagata ina ua latou o, e toatele foi ua iloa o ia; ona latou taufetuli atu ai lea mai aai uma, ua ui a uta, ua muamua ia te i latou; ua tolo‘a‘i mai ia te ia.

³⁴Ua maliu atu Iesu, ua na silafia le motu o tagata e toatele, ona mutimuti vale ai lea o lona alofa ia te i latou, auā ua faapei o mamoe i latou e leai so latou leoleo; ona a‘oa‘o atu lea o ia ia te i latou i mea e tele.

³⁵Ua levaleva le aso, ona o mai ai lea o ona soo ia te ia, ua faapea mai, O le mea tuufua lenei, ua levaleva foi le aso;

³⁶ina e tuuina atu i latou ina ia latou o atu i faoa aai ma aai ua latalata mai, ma faatau ai ni a latou mea e ‘ai; auā ua leai sa latou mea e aai ai.

³⁷A ua tali atu ia ia te i latou, ua faapea atu, Ina avatu ia e outou ni mea e ‘ai mā latou. Ona latou fai mai lea ia te ia, A matou o ea e faatau ni mea e ‘ai e tusa ma tenari e lua selau, ma avatua ai ia te i latou e aai ai?

³⁸Ona fetalai atu ai lea o ia ia te i latou, Pe fia a outou areto? ina o ia se‘i iloilo. Ua latou iloa, ona fai mai ai lea, E lima, ma i‘a e lua lau.

³⁹Ona fetalai atu lea o ia ia te i latou, ia latou fai atu i tagata uma, ia taooto i latou i vasega i le mutia.

⁴⁰Ona taooto ai lea o i latou i vasega, e taitoaselau, ma taitoalimagafulu.

⁴¹Ua tago o ia i areto e lima ma i‘a e lua lau, ona tepa ae lea i le lagi, ua faafetai; ona tofitofi lea i areto, ma avatu i ona soo, latou te laulau atu ai ia te i latou; ma i‘a foi e lua lau ua na tufatufa atu ai ia te i latou uma.

⁴²Ona aai uma lea o i latou, ua maoona.

⁴³Ua latou fu‘e foi i ato e sefulu ma le lua, ua tutumu i toe mea, atoa ma fāsi i‘a.

⁴⁴O i latou na aai i areto, pe limagaafe o tane.

⁴⁵Ona uunai loa lea o ia i ona soo ina ia latou o ae i le vaa, ma muamua atu i le tasi itu i Petesaita, ina seia tuuina atu e ia le motu o tagata ia ō.

⁴⁶Ua faamāvae o ia ia te i latou, ona maliu atu lea o ia i le mauga e tatalo.

⁴⁷Ua oo i le afiafi, ua i totonu o le vasa le vaa; a ua toatasi o ia i uta.

⁴⁸Ua silafia e ia i latou ua tigaina i taualo, auā ua agi mai i luma le matagi; ona maliu atu lea o ia ia te i latou i le leoleoga e fa o le po, ua savali i luga o le vai, o le a maliu loa.

⁴⁹A o i latou ua iloa o ia ua savali i luga o le vai, fa i latou se aitu; ona latou uio ai lea.

⁵⁰Auā ua iloa o ia e i latou uma, ua atuatuvale ai; ona fetalai atu loa lea o ia ia te i latou, ua faapea atu ia te i latou, Ia outou loto tetele; o a‘u lenei, aua tou te matatau.

⁵¹Ona maliu ae lea o ia i luga o le vaa ia te i latou, ona malū ai lea o le matagi; ona matuā segia ai lea o latou mauli, ua latou ofo ai.

⁵²Auā ua le manatunatu i areto, ina ua maaa o latou loto.

⁵³Ua latou o atu i le tasi itu, ua oo i le nuu o Kenesareta, ua latou tūta atu i ai.

⁵⁴Ua latou o atu nai le vaa, ona latou iloa loa lea o ia;

⁵⁵ona taufetuli mai ai lea o i latou i lena itu uma, o mea uma na faalogo i ai latou o i ai o ia, ua au mai ai i luga o moega e ua mamai.

⁵⁶O mea uma foi ua ia maliu atu i ai, po o faoa aai, po o aai tetele, po o aai, ua latou tuu ai e mamai i malae, ma aioi mai ia te ia, ina ia latou papai atu tau lava o le tuupao o lona ofu, o e na papai ia te ia, na malolo ai i latou uma.