Read Samoan Old Version Bible – O LE TUSI PAIA MAREKO, 7 Bible Online

MAREKO, 7 - Samoan Old Version Bible – O LE TUSI PAIA bible

MAREKO, 7

¹Ua potopoto ane ia te ia le au faresaio, ma nisi o le au tusiupu, o e na o mai mai Ierusalema.

²Ua latou iloa nisi o ona soo ua aai i latou ma o latou lima ua leaga, (o lona uiga, ua le fafanoina,) ona latou faaleaga ai lea ia te i latou.

³Auā o le au faresaio, atoa ma Iutaia uma, e le aai i latou ina seia uma ona fafano lelei i o latou lima; o loo taofi i latou i uputuu a ē anamua.

⁴A o mai foi i latou mai le malae, pe afai latou te le mulumulu, ua le aai lava; o isi foi mea e tele ua latou talia, ma taofi i ai, o le fufuluina o ipu e inu ai, ma ipu, ma ipu ‘apa memea, atoa ma moega.

⁵Ona fesili ane lea o le au faresaio ma le au tusiupu ia te ia, Se a le mea e le usiusitai ai ou soo i uputuu a ē anamua, a ua latou aai ma o latou lima e le fafanoina?

⁶Ona tali atu lea o ia ia te i latou, ua faapea atu, Ua tatau lelei le valoaga a Isaia ia te outou tagata pepelo, e pei ona tusia, Ua vivii mai lenei nuu ia te au i o latou laugutu, a o latou loto ua taumamao ia te au.

⁷E tapuai fua mai i latou ia te au i lo latou fai ma mataupu o poloaiga a tagata.

⁸Auā ua outou tuua le poloaiga a le Atua, a e taofi i uputuu a tagata, o le fufuluina o ipu ma ipu e inu ai, atoa foi ma nisi mea faapena e tele ua outou faia.

⁹Ua fetalai atu foi o ia ia te i latou, Ua lelei lo outou faaleaogaina le poloaiga a le Atua, ina ia outou taofi a outou uputuu.

¹⁰Auā ua fai mai Mose, Ia e ava i lou tamā ma lou tinā; i le ma lea, O lē fai upu leaga i le tamā po o le tinā, ia fasiotia lava ia.

¹¹A ua outou fai mai, Afai e fai ane se tagata i le tamā po o lē tinā, Ai se mea ua ia te au e aoga ia te oe ua kopano lea, (o lona uiga, o le taulaga;)

¹²ona outou le toe tuuina atu lea ia te ia, ina ia faia se mea mā lona tamā po o lona tinā;

¹³ua outou faaleaogaina ai le afioga a le Atua i a outou uputuu, ua outou tuuina mai. O isi foi mea faapena e tele ua outou faia.

¹⁴Ona valaau atu lea o ia i le motu o tagata uma, ua fetalai atu ia te i latou, Faalogo uma mai ia outou ia te au, ma ia outou lagona.

¹⁵E leai se mea o loo i fafo o le tagata e alu ane i totonu ia te ia e mafai ona leaga ai o ia; a o mea e sau mai totonu ia te ia, o mea ia e leaga ai le tagata.

¹⁶O le ua i ai taliga e faalogo ai, ina faalogo mai ia o ia.

¹⁷Ua ulufale atu o ia i le fale, ua tuua le motu o tagata, ona fesili ane lea o ona soo ia te ia i le uiga o le faataoto.

¹⁸Ona fetalai atu lea o ia ia te i latou, E faapea foi ea outou ona valelea? Tou te le iloa ea, o mea i fafo uma e alu ane i totonu o le tagata e le mafai ona leaga ai o ia?

¹⁹auā e le oo ia mea i lona loto, a o le manava; e oo ane foi i fafo i le māliuga, o lea e te‘a ai o mea e ‘ai uma.

²⁰Ua fetalai atu foi o ia, O le mea e sau ai totonu o le tagata, o le mea lea e leaga ai le tagata;

²¹Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata,

²²o le gaoi, o le manumanu, o le amio leaga, o le pepelo, o le matāitu, o le mataua, o upu leaga, o le faamaualuga, o le le mafaufau.

²³O ia mea leaga uma e sau mai totonu, ma leaga ai le tagata.

²⁴Ua tulai o ia nai lea mea, ona maliu ane lea i le laueleele o Turo ma Saitonu; ua ulu atu ia i le fale, ua finagalo foi ina ia le iloa o ia e se isi; a e le mafai ona faaliloina o ia;

²⁵auā o le fafine ua i lana tama teine le agaga leaga, ua na faalogo i le tala ia te ia, ona sau ai lea o ia ia te ia, ua faapaū mai i ona vae;

²⁶(o le fafine Eleni ia, na fanau i Suria Foinie,) ua ia faatoga ia te ia, ina ia tulia i fafo le temoni i lana tama.

²⁷A ua fetalai atu Iesu ia te ia, Seia lua‘i maoona le fanau auā e le tatau ina ave mea e ‘ai a le fanau, ma lafo i ulī.

²⁸Ona tali mai lea o ia ia te ia, ua faapea mai, Le Alii e, moni a oe; a o ulī i lalo o le laoai e aai i latou i momoi mea a tama.

²⁹Ona fetalai atu ai lea o ia ia te ia, Ina alu ia ona o lau upu lena; ua te‘a le temoni sa i totonu i lau tama teine.

³⁰Ona alu atu lea o ia i lona fale, ua maua ai lana tama teine o taoto i luga o le moega, a ua te‘a le temoni.

³¹Ona toe tuua lea e ia o le itu o Turo ma Saitonu, ua oo atu i le vai o Kalilaia; ua ui atu i le itu o Tekapoli.

³²Ona latou au mai lea ia te ia le tagata tutuli, ua leo oolo; ua latou aioi foi ia te ia ina ia faaee e ia lona aao i luga ia te ia.

³³Ona taita‘i ese lea o ia ia te ia i le motu o tagata, ua tuu ona tamatamai lima i totonu o ona taliga, ua feanu foi, ma pa‘i ane i lona laulaufaiva.

³⁴Ua silasila ae ia i le lagi, ua oi, ona ia fetalai atu lea ia te ia, Efata, o lona uiga, ia avanoa.

³⁵Ona pūpū loa lea o ona taliga, ua matala foi le noanoaga o lona laulaufaiva, ona tautala lelei mai ai lea.

³⁶Ona ia vavao atu lea foi ia te i latou, aua latou te ta‘u atu i se tasi; a e ui lava ina vavao e ia ia te i latou, ua atili ai ona latou tala‘i atu ai lava;

³⁷ua faapea atu ma le ofo ua matuā tele, Ua mālie lava ana mea uma ua fai; ua ia faalogoa e sa tutuli, atoa ma e sa gūgū ua ia faagaganaina.