Read Samoan Old Version Bible – O LE TUSI PAIA MAREKO, 8 Bible Online

MAREKO, 8 - Samoan Old Version Bible – O LE TUSI PAIA bible

MAREKO, 8

¹O ia ona aso ua matua toatele ai le motu o tagata, ua leai foi ni a latou mea e ‘ai, ona valaau atu ai lea o Iesu i ona soo, ua fetalai atu ia te i latou,

²Ou te alofa atu i le motu o tagata, auā o le aso tolu lenei o matou o nonofo ma a‘u, e leai foi ni a latou mea e ‘ai;

³afai foi ou te tuuina atu ia te i latou e ō i o latou aiga, o matelaina, e lailoa i latou i le ala; auā e mamao mea na o mai ai nisi o i latou.

⁴Ona tali mai lea o ona soo ia te ia, Maifea e mafai ai se tasi ona fafaga ia te i latou i areto i lenei vao?

⁵Ona fesili atu lea o ia ia te i latou, Pe fia ea ni a outou areto? Ona latou fai mai lea, E fitu.

⁶Ona fetalai atu lea o ia i le motu o tagata ia latou taooto i lalo; ona tago lea o ia i areto e fitu, ua faafetai, ua tofitofi ma avane i ona soo, latou te laulauina atu; ona latou laulauina atu ai lea i le motu o tagata.

⁷Ua ia te i latou foi nai i‘a lauiti, ua ia faafetai foi, ona fetalai atu lea ia laulauina atu foi ia mea.

⁸Ona latou aai lea, ua maoona; ona latou fu‘e lea o toe ‘aiga ua fitu ete.

⁹O i latou foi na aai pe fa afe; ona ia tuuina atu lea ia te i latou e ō.

¹⁰Ua maliu ae loa foi o ia ma ona soo i le vaa, ua oo atu i le laueleele o Tamanuta.

¹¹Ona o mai lea o le au faresaio, ua fesilisili ia te ia, ma saili ia te ia se faailoga mai le lagi, ua faaosooso ia te ia.

¹²Ona oi lea o ia i lona finagalo, ua faapea atu, Se a le mea ua saili ai lenei tupulaga i le faailoga? E moni, ou te fai atu ia te outou, E leai lava se faailoga e avatua i lenei tupulaga.

¹³Ona tuua lea o i latou e ia, ua toe maliu ae i le vaa, ua maliu atu o ia i le tasi itu.

¹⁴Ua galo ia te i latou ona ave ni areto, ua na o le areto e tasi ua ia te i latou i le vaa.

¹⁵Ua apoapoai atu foi o ia ia te i latou, ua faapea atu, Ia outou, ia matuā ‘alo ese i le mea faafefete a le au faresaio, ma le mea faafefete a Herota.

¹⁶Ona latou felafolafoai ai lea, ua faapea ane, O lana fetalaiga lea ona ua leai ni a tatou areto.

¹⁷Ua silafia e Iesu, ona fetalai atu ai lea o ia ia te i latou, Se a le mea tou te felafolafoai ai, ina ua leai ni a tatou areto? Tou te le āu iloa ea, tou te le lagona foi? ua maaa pea ea o outou loto?

¹⁸O ia te outou mata, tou te lei vaai ai ea? o ia te outou taliga foi, tou te le lagona ai ea? tou te le manatua foi?

¹⁹Na ou tofitofi areto e lima i le lima o afe o tagata, pe fia ea ato sa tutumu i toe ‘aiga na outou fu‘ea? Ona fai mai lea o i latou ia te ia, E sefulu ma le lua.

²⁰Atoa ma le fitu, i le fa o afe, e fia ete sa tutumu i toe ‘aiga na outou fu‘ea? Ona latou fai mai lea, E fitu.

²¹Ona fetalai atu lea o ia ia te i latou, Pe faapefea ona outou le lagona?

²²Ua oo ia i Petesaita, ona latou au mai lea o le tauaso ia te ia, ma latou aioi ia te ia ina ia pa‘i ane ia te ia.

²³Ona tago atu lea o ia i le lima o le tausao, ua ta‘ita‘i ane ia te ia i tua o le aai. Ua feanu foi ia i ona mata, ona faaee lea e ia o ona aao i luga ia te ia, ua fesili atu i ai, po ua na iloa se mea.

²⁴Ua tepa ae o ia, ona fai mai lea o ia, Ua ou iloa atu tagata ua faapei o laau, o loo savavali.

²⁵Ona toe faaee atu lea e ia o ona aao i ona mata, ua fetalai atu ia te ia, ia tepa ae; ona toe lelei lea o ia, ua na iloa lelei foi o tagata uma.

²⁶Ona au atu lea o ia ia te ia i lona aiga, ua faapea atu, Aua e te alu ane i le aai, aua foi e te ta‘ua i se tasi i le aai.

²⁷Ua maliu atu Iesu ma ona soo i aai o Kaisareia Filipo; ua i le ala i latou, ona fesili atu lea o ia i ona soo, ua faapea atu ia te i latou, Pe se a le upu a tagata ia te au nei, po o ai?

²⁸Ona latou tali mai lea, O Ioane le papatiso; a o isi, o Elia; o isi foi, o le tasi o le au perofeta.

²⁹Ona fetalai atu lea o ia ia te i latou, A o outou na, se a la outou upu ia te au nei, po o ai? Ona tali mai lea o Peteru, ua faapea mai ia te ia, O oe o le Keriso.

³⁰Ona vavao atu lea o ia ia te i latou, ina ne‘i latou ta‘u atu o ia i se tasi.

³¹Ona amata ai lea e ia ona a‘oa‘o atu ia te i latou, e tatau ona tiga le Atalii o le tagata i mea e tele; e lafoaiina foi o ia e toeaina, ma le au faitaulaga sili, ma le au tusiupu, e fasiotia foi o ia; a mavae aso e tolu, i le toe tu mai.

³²Ua ia faaali tino lava lena upu; ona ta‘ita‘i ane lea o Peteru ia te ia, ua vavao ia te ia.

³³A o ia ua fāliu, ma silasila ane i ona soo, ona vavao atu lea o ia ia Peteru, ua faapea atu, Ina alu ia i o‘u tua Satani e; auā e te le loto i mea a le Atua, a o mea a tagata.

³⁴Ona valaau atu lea o ia i le motu o tagata, atoa ma ona soo, ua fetalai atu ia te i latou, Ai se fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au.

³⁵Auā ai se fia faasaogalemuina lona ola, e māumau ai ia te ia; a o lē faamāumau lona ola ona o a‘u ma le tala lelei, e faasaoina e ia.

³⁶Auā se a le aoga i le tagata, pe afai na te maua le lalolagi uma, a e māumau lona ola?

³⁷se a foi se mea e avatu e le tagata e togiola a‘i lona ola?

³⁸Auā ai sē mā ia te au, ma a‘u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.