Read Samoan Old Version Bible – O LE TUSI PAIA LUKA, 10 Bible Online

LUKA, 10 - Samoan Old Version Bible – O LE TUSI PAIA bible

LUKA, 10

¹Mulimuli ane ua tofia e le Alii nisi e toafitugafulu, ua aauina atu o i latou e taitoalua ua muamua atu ia te ia, i aai uma ma mea uma o le a maliu atu i ai o ia.

²Ua fetalai atu foi o ia ia te i latou, E tele le saito e seleseleina, a o le au faigaluega e toaitiiti ia; o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.

³Ina o atu ia, faauta, ou te aauina atu outou pei o tamai mamoe i le va o luko.

⁴Aua tou te ave se ete tupe, po o se taga, po o seevae; aua foi tou te ofo alofa atu i se tasi i le ala.

⁵O le fale tou te ulu atu i ai, tou te muai fai atu, Ia manuia le aiga nei.

⁶Pe afai o i ai le tagata o le manuia, e oo atu ia te ia la outou faamanuia; a leai, e toe foi mai ai ia te outou.

⁷Ia outou nonofo i lea fale, ma aai ma inu i mea latou te avane; auā e tatau ona avatu i le faigaluega lona taui. Aua tou te feoai i lea fale ma lea fale.

⁸O le aai tou te oo atu i ai, ua latou talia foi outou, ia outou aai i mea e laulauina mai ia te outou;

⁹ia outou faamalolo foi i e mamai o i ai, ma ia fai atu ia te i latou, Ua latalata ia te outou le malo o le Atua.

¹⁰A o le aai tou te oo atu i ai, ua latou le talia foi outou, tou te o ai i o latou malae, ma faapea atu,

¹¹O le eleele lava mai la outou aai, ua pipii mai ia te i matou, matou te sōloi atu ia te outou; a e peitai ia outou iloa lenei mea, ua latalata ia te outou le malo o le Atua.

¹²Ou te fai atu ia te outou, O lea aso e feoloolo ai Sotoma i lea lava aai.

¹³Oi talofa ia te oe Koasini! oi talofa ia te oe Petesaita! auā ana faia i Turo ma Saitonu o vavega ua faia ia te outou, po ua leva ona latou salamo o nonofo i le ie talatala ma le lefulefu.

¹⁴A e feoloolo Turo ma Saitonu i le faamasinoga ia te outou.

¹⁵O oe foi Kapanaumi, ua faaeaina e oo i le lagi, e lafotuina oe i lalo lava i seoli.

¹⁶O lē faalogo ia te outou, ua faalogo o ia ia te au; o lē faaleaoga ia te outou, ua ia faaleaoga ia te au; o lē faaleaoga foi ia te au, ua ia faaleaoga i le na auina mai a‘u.

¹⁷Ua toe foi mai le toafitugafulu ma le olioli, ua faapea mai. Le Alii e, ua usiusitai mai temoni ia te i matou, ona o lou suafa.

¹⁸Ua fetalai atu ia ia te i latou, Na ou iloa Satani ua paū mai le lagi pei o le uila.

¹⁹Faauta, ou te foai ia te outou le pule e soli ai gata ma akarava ma le malosi uma o le fili; e leai lava se mea e leaga ai outou.

²⁰A e peitai aua tou te olioli i lenei mea, ina ua usiusitai agaga ia te outou; na o lenei tou te olioli ai, ina ua tusia o outou igoa i le lagi.

²¹O lea lava itu aso ua matuā fiafia ai le finagalo o Iesu, ua faapea atu. Ou te faafetai ia te oe lo‘u Tamā e, o le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale; o lea lava lo‘u Tamā, auā o lou finagalo lava lea.

²²Ua tuuina mai mea uma ia te au e lo‘u Tamā; e leai se tasi ua iloa le Atalii, ua na o le Tamā; e leai foi se tasi ua iloa le Tamā, ua na o le Atalii, ma se ua loto le Atalii e faaali atu i ai.

²³Ua fāliu ia i ona soo, ma fetalai lemu ane, Amuia mata ua iloa mea tou te iloa;

²⁴auā ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le iloa lava; na latou fia faalogo foi i nei mea ua outou faalogo ai, a e lei faalogo ai lava.

²⁵Faauta foi, ua tulai le tasi a‘oa‘o tulafono, ma tofotofo ia te ia, ua faapea mai, Le a‘oa‘o e, se a se mea ou te faia ina ia ou maua ai le ola e faavavau?

²⁶Ua fetalai atu ia ia te ia, O le a ea ua tusia i le tulafono? O le a lau faitau?

²⁷Ua tali mai o ia, ua faapea mai, E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i lē lua te tuaoi, ia pei o oe lava ia te oe.

²⁸Ona faapea atu lea o ia ia te ia, Ua tonu lau tali; ia e faapea ona fai, e te ola ai.

²⁹A ua faafiatonu o ia, ua fai mai ia Iesu. O ai foi le tagata ma te tuaoi?

³⁰Ua tali atu Iesu, ua faapea atu, O le tasi tagata na alu ifo mai Ierusalema i Ieriko, ua maua o ia e tagata fao mea; ua latou toeseina ona ofu, ma fasi ia te ia, ua latou o, ua tuua ia, ua tāli oti.

³¹Ua soona alu ifo le tasi faitaulaga i lea ala; ua iloa atu ia te ia, ona ui ane lea o ia i le tasi itu ala.

³²Ua faapea a foi le sa Levī, ua oo i lea mea, ua alu ane, ma matamata ai; ona ui ane foi lea o ia i le tasi itu ala.

³³A o le tasi Samaria ua alu lana malaga, ua oo atu i le mea o i ai o ia, ua iloa o ia, ona mutimuti vale lea o lona alofa;

³⁴ua alu atu, ma nonoa i ona manua, ua liligi foi i ai le suāuu ma le uaina; ua faatietie ia te ia i lana lava manu, ma ta‘ita‘i ia te ia i le fale e tali ai malo, ma tausi ia te ia.

³⁵O le taeao o le a alu ia, ona to ae lea o tenari e lua, ma avatu i le matai e ona le fale, ua fai atu ia te ia. Ina e tausi ia te ia; ai se mea e te toe faatau ai, ou te taui atu ia te oe pe a ou toe sau.

³⁶Pe ni a fa te oe, o ai so latou nei o le toatolu ua fai ma tagata la te tuaoi ma le na maua e tagata fao mea?

³⁷Ua fai mai ia, O le na alofa atu ia te ia. Ona faapea atu ai lea o Iesu ia te ia. Ina alu ia, ma ia e faapea ona fai.

³⁸Ua latou o, ona afe atu lea o ia i le tasi aai; o le tasi fafine foi e igoa ia Mareta, ua na talia o ia i lona fale.

³⁹O lona uso foi e igoa ia Maria, ua nofo o ia i lalo i tafatafa o vae o Iesu, ma faalogo i lana fetalaiga.

⁴⁰A ua tiga Mareta i le fatuaiga, ua tu mai, ma faapea mai, Le Alii e, e te le manatu mai ea, ina ua tuu mai e lo‘u uso ia te au e sauni toatasi? ia e fetalai ane ia te ia, ia fesoasoani mai ia te au.

⁴¹A ua tali atu Iesu, ua faapea atu ia te ia, Mareta e, Mareta e, ua e popole, ma ua pŭpŭ lou loto i mea e tele;

⁴²a o le mea lava e tasi e ao ina ia maua; ua filifilia foi e Maria lea mea lelei, e le aveeseina ia te ia.