Read Samoan Old Version Bible – O LE TUSI PAIA LUKA, 11 Bible Online

LUKA, 11 - Samoan Old Version Bible – O LE TUSI PAIA bible

LUKA, 11

¹Sa i le tasi mea o ia, ua tatalo, ua uma, ona fai mai lea ia te ia o le tasi o lona au soo, Le Alii e, ia e a‘oa‘o mai ia te i matou i tatalo; e faapei o Ioane foi ona a‘oa‘o i ona soo.

²Ua fetalai atu ia ia te i latou, Pe a outou tatalo, ia outou fai atu, Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.

³Ia e foai mai ia te i matou i lea aso ma lea aso a matou mea e ‘ai e tatau ma le aso.

⁴Ia e faamagalo ia te i matou i a matou agasala; auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le tofotofoga; a ia e laveai mai ia i matou ai le leaga.

⁵Ua fetalai atu foi o ia ia te i latou, O ai so outou e ana le uo, e alu atu ia te ia i le tulua o po, ma fai atu ia te ia, Sole, se‘i au mai ni areto e tolu gafua, a e taui atu;

⁶auā ua sau la‘u uo ia te au i lana malaga, a e leai ni a‘u mea e laulau atu i ai;

⁷e tali mai o ia mai totonu o le fale, ua faapea mai, Aua e te faasoesa mai ia te au; ua uma ona pupuni o le faitotoa, ua matou taooto ma la‘u fanau; ou te le mafai ona tulai e avatu mā oe.

⁸Ou te fai atu ia te outou, E ui lava ina le tulai o ia, ma avatu ia te ia, ona o ia o lana uo, a e tulai, ma avatu mea uma e manao ai o ia, ona o lana faatauanau ane.

⁹Ou te fai atu foi a‘u ia te outou, Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu‘itu‘i atu, ona toina mai ai lea ia te outou.

¹⁰Auā ai se ole atu, e maua e ia; o lē saili, e iloa e ia; o lē tu‘itu‘i, e toina mai ia te ia.

¹¹O ai se tamā ia te outou e avatu ea e ia i lona atalii se maa, pe a ole mai se areto? pe a ole mai se i‘a, e avatu ea ia te ia se gata a e le o se i‘a?

¹²pe a ole mai se fuāmoa, e avatu ea ia te ia se akarava?

¹³O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?

¹⁴Sa tuli e ia le temoni, ua gūgū foi o ia; ua alu i fafo le temoni, ona gagana ai lea o le gūgū, ua ofo ai lava le motu o tagata.

¹⁵Peitai o isi o i latou ua fai ane, O Pelesepulo le alii o temoni, ua tulia ai e ia o temoni.

¹⁶O isi foi ua faaosooso, ua saili mai ia te ia se faailoga mai le lagi.

¹⁷A ua silafia e ia o latou manatu, ona fetalai atu lea ia te i latou, O malo uma e fevaevaeai, e faaumatia ia; po o se aiga e fevaevaeai, e malaia lea.

¹⁸Afai foi e fevaevaeai Satani, pe faapefea ea ona tumau o lona malo? auā ua outou fai mai, o Pelesepulo e tulia ai e a‘u o temoni.

¹⁹Afai o Pelesepulo e tulia ai e a‘u o temoni, ia, po ai e tulia ai temoni e a outou fanau? o lea, e fai ai i latou ma faamasino ia te outou.

²⁰A e afai o le aao o le Atua ou te tulia ai temoni, ua oo mai lava ia te outou le malo o le Atua.

²¹A leoleoina e le tagata malosi ma lana auupega lona fale, ona saogalemu ai lea o ana mea.

²²A e afai e oso atu ia te ia le tasi e sili lona malosi ia te ia, ua manumalo i ai, ona fao ai lea o lana auupega uma na ia faatuatua i ai, ma tufatufa i ana mea na fao.

²³O se le ‘au ia te au, e ‘au ese lea ia te au; o se le faaputu faatasi ma a‘u, e faataapeape lea.

²⁴Pe a alu le agaga leaga i fafo o le tagata, ua fealualuai ia i mea matutu, ua saili se mapusaga, a e le maua; ona fai ane lea, Ou te toe foi i lo‘u fale na ou sau ai.

²⁵Ua oo i ai, ona iloa ai lea, ua uma ona tafitafi ma teuteu.

²⁶Ona alu ai lea o ia, ua na aumaia isi agaga e toafitu, e sili lo latou leaga i lona; ona latou ulufale ai lea, ua nonofo ai; ona sili ai lea o le leaga o le iuga o lea tagata i lona amataga.

²⁷O loo fetalai ane ia i nei mea, a ua alaga tele mai ai le tasi fafine mai le motu o tagata, ua faapea mai ia te ia, Amuia le manava na fanau mai ai oe, ma susu na e susu ai.

²⁸A ua fetalai atu ia, E moni, a e sili ona manuia o e faalogo i le afioga a le Atua, ma tausi i ai.

²⁹Ua lolofi mai le motu o tagata, ona fetalai atu ai lea o ia, O le tupulaga leaga lenei, ua saili mai se faailoga, a le avatu i ai se faailoga, tau lava o le faailoga o Iona le perofeta.

³⁰Auā pei o Iona ona fai ma faailoga ia Nineva, e faapea foi le Atalii o le tagata i le tupulaga nei.

³¹O le tupu fafine o le itu i toga e tulai o ia i le faamasinoga ma tagata o le tupulaga nei, e faasala foi o ia ia te i latou; auā na sau ia mai le gataaga o le lalolagi e faalogo i le poto o Solomona; faauta foi, o iinei lava lē sili ia Solomona.

³²E tutū tagata o Nineva i le faamasinoga faatasi ma le tupulaga nei, e faasala i ai; auā na latou salamo i le tala‘iga a Iona; faauta foi, o iinei lava lē sili ia Iona.

³³E leai se tūtū i le lamepa, ma tuu i le mea lilo, po o i lalo o le mea e fua a‘i saito, a e tuu i luga lava o le tuugālamepa, ina ia iloa mai ai le malamalama i e ulufale mai.

³⁴O mata, o le lamepa lea o le tino; o lenei, pe afai ua lelei ou mata, e malamalama uma ai lou tino; a e afai ua leaga, e pouliuli ai lou tino.

³⁵O lenei, ia oe ne‘i pogisa le malamalama ua i totonu ia te oe.

³⁶Afai foi ua malamalama lou tino uma, e leai sona pouliuli, e malamalama uma ai, pei ona faamalamalama mai ia te oe o le lamepa i lona pupula mai.

³⁷Ua fetalai o ia, a e fai mai le tasi faresaio ia te ia, la te aai ma ia; ona ulufale lea o ia, ua taoto e taumafa.

³⁸Ua iloa e le faresaio, ona ofo lava lea ina ua le muai mulumulu ia, i le ‘ai ai.

³⁹Ua fetalai atu le Alii ia te ia, Outou faresaio, ua faamamaina lava e outou le tua o le ipu ma le tanoa, peitai o totonu o outou ua tutumu i mea ua faoa ma le amio leaga.

⁴⁰Outou na o valea! o le na faia le tua, e lei faia ea foi e ia o totonu?

⁴¹A ia outou avatu a outou mea e fai ma mea alofa; faauta foi, e mamā ai mea uma ia te outou.

⁴²Oi talofa foi ia te outou faresaio! auā tou te avatu mea e sefulu a‘i le mili, ma le pekano, ma laau uma e afu, a ua tuua e outou le faamasinoga ma le alofa i le Atua; e tatau pe ana faia nei mea, a e aua foi le tuu na mea.

⁴³Oi talofa ia te outou faresaio! auā ua mananao outou i nofoa sili i sunako, ma ia alofaina i malae,

⁴⁴Oi talofa ia te outou tusiupu ma faresaio, tagata pepelo! auā tou te tutusa ma tuugamau e lilo; o tagata foi o e ua savavali i o latou luga, ua le iloa e i latou.

⁴⁵Ona fai mai lea o le tasi o le au a‘oa‘o tulafono, ua faapea mai ia te ia, Le a‘oa‘o e, ua e faaleaga mai ia te i matou i lau e fai mai na.

⁴⁶Ua fetalai atu ia, Oi talofa ia te outou foi le au a‘oa‘o tulafono! auā ua faaee atu e outou avega mamafa i tagata, a o outou, tou te le tago lava i na avega i so outou tamatamai lima.

⁴⁷Oi talofa ia te outou! auā ua outou ati ae tuugamau o perofeta; o outou tamā foi, na latou fasioti ia te i latou.

⁴⁸Ua molimau lava outou i le amio a o outou tamā, ma fiafia i ai; auā na latou fasioti ia te i latou, a e tou te ati ae o latou tuugamau.

⁴⁹O lea foi ua fetalai mai ai le poto o le Atua, Ou te aauina atu ia te i latou perofeta ma aposetolo; e fasioti foi e i latou, ma faasaua i nisi:

⁵⁰ina ia suea i le tupulaga nei le toto o perofeta uma ua faamaligiina talu ona faavaeina o le lalolagi;

⁵¹e afua mai i le toto o Apelu, e oo atu i le toto o Sakaria, na fasiotia i le va o le fata faitaulaga ma le malumalu; e moni, ou te fai atu ia te outou, e suea lava ia i lenei tupulaga.

⁵²Oi talofa ia te outou le au a‘oa‘o tulafono! auā ua avea e outou le ki o le malamalama; tou te le ulu atu ai, tou te vavao foi i e a ulu atu.

⁵³Ua fetalai atu ia i ia upu ia te i latou, ona matuā ita lea o le au tusiupu ma le au faresaio; ona latou fesili faaosooso lea ia te ia i mea e tele,

⁵⁴o lamalama ia te ia, ma saili e taofi i se upu mai lona fofoga, ina ia latou momoli ia te ia.