Read Samoan Old Version Bible – O LE TUSI PAIA LUKA, 12 Bible Online

LUKA, 12 - Samoan Old Version Bible – O LE TUSI PAIA bible

LUKA, 12

¹Ua faapotopoto mai le motu o tagata e manomano a o faia ia mea, ua latou fesoliai ai, ona oo atu lea o lana lauga i ona soo, Ia outou matuā ‘alo ese i le mea faafefete a le au faresaio, o le pepelo lea.

²Auā e leai se mea o loo ufiufitia, e le faaalia; e leai foi se mea lilo e le faailoina.

³O lea foi, o mea uma ua outou fai atu ai i le pouliuli, e logoina lea i le malamalama; o le mea foi ua outou tala lemu atu i afeafe, e tala‘iina lea i luga o fale.

⁴A ou te fai atu ia te outou na a‘u uo, aua tou te matatau ia te i latou o e fasioti le tino; a mavae lea, ua leai se toe mea latou te mafaia.

⁵A e ou te faasino atu ia te outou i lē tou te matatau i ai; ia outou matatau ia te ia, a mavae ona fasioti e ia, e ana le pule e lafo atu i Kēna; e moni, ou te fai atu ia te outou, ia outou matatau ia te ia.

⁶E le faataulia ea manu iti e lima gafua i asari e lua? e leai foi so latou e tasi ua galo i luma o le Atua.

⁷A o outou lauulu lava ua faitaulia uma ia. O lena, aua tou te matatau ai; ua sili outou i manu iti e tele.

⁸Ou te fai atu foi ia te outou, O sē ta‘ua a‘u i luma o tagata, e ta‘ua foi o ia e le Atalii o le tagata i luma o agelu a le Atua.

⁹A o lē faafiti mai ia te au i luma o tagata, e faafitia o ia i luma o agelu a le Atua.

¹⁰O sē lafo foi se upu i le Atalii o le tagata, e faamagaloina lea; a o lē upu leaga i le Agaga Paia, e le faamagaloina lea.

¹¹Pe a ta‘ita‘iina outou i sunako, ma alii, ma faipule, aua tou te popole i sa outou e tali atu, pe faapefea, pe se a foi tou te fai atu ai;

¹²auā e a‘oa‘o le Agaga Paia ia te outou i lea lava itu aso i upu e tatau ona fai atu ai.

¹³Ua fai mai ia te ia le tasi mai le motu o tagata, Le a‘oa‘o e, ia e fetalai ane i lo‘u uso, ina ia vaeluaina mai le tofi ia te au.

¹⁴A ua fetalai atu o ia ia te ia, Sole, o ai ea le na fai a‘u ma faamasino ma pule ia te outou?

¹⁵Ua fetalai atu foi o ia ia te i latou, Ia outou, ia leoleo outou ia te outou auā le matapeapea; auā e le ola se tasi i le tele o ana mea ua ia te ia.

¹⁶Ua fetalai atu ia ia te i latou le faataoto, ua faapea atu, Na fua tele mai le fanua o le tasi tagata mauoa;

¹⁷ona manatunatu ifo lea o ia, ua faapea, Se a se mea ou te faia, auā e leai sa‘u mea e faaputu ai a‘u fua?

¹⁸Ua fai ane foi o ia, O lenei le mea ou te faia; ou te sa‘ena o‘u fale saito, a e faia ia tele; ou te faaputu i ai a‘u fua ma a‘u mea lelei uma.

¹⁹Ou te fai ifo i lo‘u agaga, Lo‘u agaga e, ua ia te oe mea lelei e tele ua teuina mo tausaga e tele; ina nofonofo filemu ia, ina ‘ai ia, ma inu ma ia e olioli.

²⁰A ua fetalai atu le Atua ia te ia, O oe na le vale, e aamiina atu lou agaga nai ia te oe i le po nanei; a e fai ma ai mea ia ua e saunia?

²¹O loo faapea foi lē faaputu oa ia te ia, a e le mauoa i le Atua.

²²Ona fetalai atu lea o ia i ona soo, O lea ou te fai atu ai ia te outou, aua tou te popole i lo outou ola, i mea tou te aai ai, po o le tino, i mea tou te oofu ai.

²³Ua sili le ola i le mea e ‘ai, ua sili foi le tino i le ofu.

²⁴Ia outou mafaufau i oreva; latou te le lulu saito, latou te le selesele foi; e leai lava so latou afeafe, po o se fale saito, a e fagaina i latou e le Atua; e le sili ea lo outou lelei, i manu?

²⁵O ai ea so outou ua mafai ia te ia i lona popole ona faateleina le umi o lona olaga i le kupita e tasi?

²⁶Afai foi tou te le mafai i se mea itiiti lava, se a le mea tou te popole ai i nisi mea?

²⁷Ia outou mafaufau i lautalotalo pe faapefea ona tupu; latou te le galue, e le milo foi; a ou te fai atu ia te outou, e lei ofu lava Solomona ma lona matagofie tele pei o le tasi o na mea.

²⁸Afai e faapea ona faaofuina e le Atua le vao o i le fanua, o ola mai i le asō, a e lafoina a taeao i le ogāumu; e le sili ea ona faaofuina outou e ia o outou e faatuatua itiiti?

²⁹O outou foi, aua tou te saili pe ni a tou te aai ai, ni a foi tou te inu ai; aua foi le feaveaiina o outou loto.

³⁰Auā o mea uma ia ua sailia e nuu o le lalolagi; ua silafia foi e lo outou Tamā o ia mea e aoga ia te outou.

³¹A ia outou saili le malo o le Atua; ona faaopoopoina ai lea o ia mea uma ia te outou.

³²Aua e te fefe oe le lafu mamoe itiiti e; auā ua finagalo lo outou Tamā e foai mai le malo ia te outou.

³³Ia outou faatau atu i a outou mea, tou te avatu ai e fai ma mea alofa; ia fai outou ni a outou taga e anagata, o le oa i le lagi e le uma lava, e le tāitāi ane i ai se gaoi, e le atia foi e se mogamoga.

³⁴Auā o le mea o i ai lo outou oa, e i ai atoa foi ma o outou loto.

³⁵Ia fusia o outou sulugātiti, ma ia mumū a outou lamepa;

³⁶o outou foi, ia outou faapei o tagata e faatali atu i lo latou alii, seia foi mai o ia mai le tausamaaga; ia latou to loa mai le puipui ia te ia pe a sau, ma tu‘itu‘i mai.

³⁷Amuia ia auauna e maua i latou e lo latou alii, o mataala pe a sau. E moni, ou te fai atu ia te outou, e fusi e ia ona ofu, ma fai atu ia te i latou ia taooto e aai, ma alu ane lava, ma auauna ia te i latou.

³⁸Pe afai e sau ia i le leoleoga e lua o le po, pe sau i le leoleoga e tolu, a maua o i latou o faapea, amuia ia auauna.

³⁹A ia outou iloa lenei mea, ana iloa e le matai o le aiga le itu po e sau ai le gaoi, po ua na leoleoina, a e le tuua e ia lona fale ia elia.

⁴⁰O lenei, ia outou nofo sauni; auā o le itu aso tou te le manatunatu ai, e sau ai le Atalii o le tagata.

⁴¹Ona fai mai lea o Peteru ia te ia, Le Alii e, ua e fetalai mai ea lena faataoto ia te i matou, po o tagata uma?

⁴²Ona fetalai atu lea o le Alii, O ai foi le auauna e pule, ua faamaoni ma le mafaufau, ua tofia e lona alii e pule i ana auauna, ia avatu mea e ‘ai ia te i latou i ona itu aso?

⁴³Amuia lea auauna, pe a sau lona alii e maua ia o loo faapea ona fai.

⁴⁴E moni, ou te fai atu ia te outou, na te tofia o ia e pule i ana mea uma.

⁴⁵A e afai e fai ifo lea auauna i lona loto. E faatuai mai lo‘u alii; ona fasi ai lea o ia i auauna tane ma auauna fafine, e ‘ai foi, ma inu, ma onā.

⁴⁶E sau lava le alii o lea auauna i le aso e le faatalitali atu ai o ia, o le itu aso foi e le iloa ai e ia; ona matuā faasala lea ia te ia, ma avatu lona tofi faatasi ma e le faalogo.

⁴⁷O lea auauna foi ua na iloa le finagalo o lona alii, a e lei sauni lava ia, e lei faia foi mea e tatau ma lona finagalo, e tele ona sasaina.

⁴⁸A o le ua le iloa, ua faia foi e ia mea e tatau ina sasaina ai, e māmā ona sasaina o ia. Auā o le ua foaiina atu i ai o mea e tele, e sueina atu foi ia te ia o mea e tele; o ia foi ua tuuina atu i ai o mea e tele, latou te fai atu ia te ia e au mai mea e sili ona tele.

⁴⁹Ua ou sau e lafo le afi i le lalolagi; se a se mea ou te toe manao i ai, pe ana mu nei lava?

⁵⁰O lo‘u papatisoga o le a papatisoina ai a‘u; ua ou matuā tiga lava seia faaiuina.

⁵¹Fa te outou ea ua ou sau e avatu le filemu i le lalolagi? Ou te fai atu ia te outou, e leai; a o le fevaevaeai.

⁵²Auā e amata i nei ona po e i ai i le fale e tasi tagata e toalima e favaevaeai i latou, o le toatolu e faamasesei ma le toalua, o le toalua foi e faamasesei ma le toatolu.

⁵³E fevaevaeai le tamā ma le atalii, o le atalii foi ma le tamā; o le tinā ma le tama teine, o le tama teine foi ma le tinā; o le tinā o le tane ma le avā a lana tama, o le avā foi ma le tinā o lana tane.

⁵⁴Ua fetalai atu foi o ia i le motu o tagata, Pe a outou iloa le ao o loo alu ae i sisifo, ona outou fai ane loa lea, Anei e ua; ona taunuu foi lea.

⁵⁵A agi mai foi le toga, ua outou fai ane. Anei e la; ona taunuu foi lea.

⁵⁶O outou tagata pepelo, ua outou iloa ona mātauina le amio a le lagi ma le lalolagi; se a foi le mea tou te le mātauina ai le uiga o lenei tausaga?

⁵⁷Se a foi le mea tou te le filifili ai e outou i mea tonu?

⁵⁸Pe a lua ō i le alii ma lē ua e aitalafu ai, ia e taumafai lava i le ala ina ia oulua lelei ma ia; ne‘i toso o ia ia te oe i le faamasino, e tuu atu foi le faamasino ia te oe i le auauna, ona tuuina atu lea oe e le auauna i le fale puipui.

⁵⁹Ou te fai atu ia te oe, e te le toe ulufafo ai, seia e avatu tupe uma lava.