Read Samoan Old Version Bible – O LE TUSI PAIA LUKA, 16 Bible Online

LUKA, 16 - Samoan Old Version Bible – O LE TUSI PAIA bible

LUKA, 16

¹Ua fetalai atu foi o ia i ona soo, O le tasi tagata mauoa sa i ai le auauna e pule; na molia o ia ia te ia, ua ia faamāumau ana mea.

²Ua na valaau atu ia te ia, ua fai atu i ai. O le a lenei mea ua ou faalogo ai ia te oe? Tala mai ia le tala i mea na e pule i ai; auā ou te le mafai ona e toe fai ma auauna e pule.

³Ona fai ifo ai lea o le auauna i lona loto, Se a se mea ou te faia? auā o le a faateaina a‘u e lo‘u alii i le faiva o auauna e pule; ou te le mafai ona eli; ou te mā i faatoga.

⁴Ua ou iloa le mea ou te faia, ina ia talia a‘u i o latou aiga, pe a tuueseina a‘u i le faiva o auauna e pule.

⁵Ona amiami lea e ia o tagata taitasi uma e na i ai mea a lona alii, ua fai atu ia i le tasi, Pe fia mea a lo‘u alii ua ia te oe?

⁶Ona fai mai ai lea o ia, O paita o suāuu e selau. Ua fai atu ia ia te ia, Ina tago ia i lau tusi, ia vave nofo i lalo, ma tusi e lima sefulu.

⁷Ona fai atu lea o ia i le tasi, Pe fia mea ua ia te oe? Ua fai mai o ia. O kori o saito e selau. Ona fai atu lea o ia ia te ia, Ina tago ia i lau tusi, ma tusi e valu sefulu.

⁸Ua vivii atu le alii i le auauna amioletonu, auā ua na togafiti poto; auā e sili le poto o tagata o le olaga nei, i lo latou tupulaga, i lo tagata o le malamalama.

⁹Ou te fai atu foi ia te outou, O le mamone o le amioletonu ia outou fai ai uo mā outou, ina ia latou talia mai outou i fale e faavavau, pe a tuueseina outou.

¹⁰O lē faamaoni i le mea itiiti, e faamaoni foi o ia i mea e tele; o lē amioletonu i le mea itiiti, e amioletonu foi o ia i mea e tele.

¹¹Afai foi tou te lei faamaoni i le mamone o le amioletonu, o ai se na te tuu atu ia te outou le oa moni e tausi?

¹²Afai foi ua outou le faamaoni i mea a le tagata ese, o ai se na te tuu atu ia te outou a outou lava mea?

¹³E le mafai se auauna ona auauna i alii e toalua; auā e ‘ino‘ino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.

¹⁴Ua faalogo le au faresaio i ia mea uma, o i latou foi ua matapeapea; ona latou tauemu ai lea ia te ia.

¹⁵Ona fetalai atu lea o ia ia te i latou, O outou ua faafiaamiotonu outou i luma o tagata; a ua silafia e le Atua o outou loto; auā o le mea e sili ona lelei i tagata, e inosia lea i luma o le Atua.

¹⁶O le tulafono ma le au perofeta na oo lava ia ia Ioane; talu ai ia ona po ua folafolaina le tala lelei o le malo o le Atua, ua taufaoa foi e tagata uma.

¹⁷E mavaegofie atu le lagi ma le lalolagi, a e le iuvale sina fāsi mataitusi e tasi o le tulafono.

¹⁸O sē faatea i lana avā, a e fai avā i se tasi, o le mulilua lea; o sē fai avā i le ua faateaina e lana tane, o le mulilua foi lea.

¹⁹O le tasi tagata mauoa, ua ofu i le ofu pāuli, ma le ie vavae, ua taileleiia lava ia i aso uma.

²⁰O le tasi tagata mativa foi e igoa ia Lasalo, ua taatia i lona faitotoa, ua lilo i le papala,

²¹ua manao tele ia e ‘ai momoi mea na pauu ifo i le laoai a le mauoa; a ua o mai ulī ua etoeto ona papala.

²²Ua oo foi ina oti o le tagata mativa, ona avea lea o ia e agelu i le fatafata o Aperaamo. Ua oti foi le mauoa, ma ua tanu;

²³ua i seoli na faataugaina, ona tepa ae ai lea o ia, ua na iloa mamao atu ia Aperaamo ma Lasalo i lona fatafata;

²⁴ua alaga atu foi o ia, ua fai atu, Lo‘u tamā e, Aperaamo, ia e alofa mai ia te au, ma ia e auina mai Lasalo, na te fufui i le tumutumu o lona tamatamailima i se vai, e faamālulu a‘i lo‘u nei laulaufaiva; auā ua ou puapuaga i le mumū o le afi nei.

²⁵Ona fai ane lea o Aperaamo, Lo‘u atalii e, ia e manatu, na e maua au mea lelei i lou olaga, na maua foi e Lasalo o mea leaga; a o lenei, ua faaolioliina ia; a ua puapuagaina oe.

²⁶E le gata i nei mea uma, a ua tumau le vanu tele i lo tatou va; o le mea lea e le masao ai o e ua iinei ua fia o atu ia te outou; e le masao mai foi o e ua iina ia te i matou nei.

²⁷Ona fai atu lea o ia, Lo‘u tamā e, ou te faatoga atu ia te oe, ina ia e auina atu o ia i le aiga o lo‘u tamā;

²⁸auā e toalima o‘u uso; ina ia molitino atu ia ia te i latou, ne‘i latou o mai foi i lenei mea puapuaga.

²⁹Ua fai ane Aperaamo ia te ia, O ia te i latou Mose ma le au perofeta, ia latou faalogo i ai.

³⁰A ua faapea atu ia, Lo‘u tamā e, Aperaamo, aua; a e afai e alu atu se tasi ia te i latou nai e ua oti, e salamo ai i latou.

³¹Ua fai ane o ia ia te ia, Pe afai latou te le faalogo ia Mose ma le au perofeta, e ui lava ina tu mai se tasi nai e ua oti, latou te le mafafai lava.