Read Samoan Old Version Bible – O LE TUSI PAIA LUKA, 17 Bible Online

LUKA, 17 - Samoan Old Version Bible – O LE TUSI PAIA bible

LUKA, 17

¹Ua fetalai atu o ia i le au soo, E le mafai lava ona le oo mai o mea e tausuai ai; oi talofa foi i le e oo mai ai.

²E lelei pe ana noatia i lona ua se maaolo tele, i le lafo ai o ia i le sami, a e leaga lava ona faatausuaiina e ia so latou nei e faatauvaa.

³Ia outou ia te outou. Pe afai a e agaleaga mai lou uso ia te oe, ia e aoai atu ia te ia; pe afai e salamo ia, ia e faamagalo atu ia te ia.

⁴Pe afai e foi faafitu i le aso ona agaleaga mai o ia ia te oe, ma foi faafitu i le aso ona liliu mai ia te oe, ua faapea mai, Ua ou salamo; ia e faamagalo atu ia te ia.

⁵Ona fai mai lea o le au aposetolo i le Alii, Ia e faatuputeleina lo matou faatuatua.

⁶Ua fetalai atu le Alii, Afai ua tusa lo outou faatuatua ma le fua o le sinapi, po ua outou fai atu i lenei sukamina, Ia liaiina oe, ma ia totōina i le sami; ona anaana mai lava lea ia te outou.

⁷O ai foi so outou e ana le auauna o suatia le eleele, po o leoleo i mamoe, e fai atu ea, pe a sau o ia mai le vao, Sau loa ia, ina taoto e ‘ai?

⁸a e le fai atu ea ia te ia, Ina sauni mai ia sa‘u sua, ma ia fusi ou ofu, i le laulau mai o mea, se‘i ‘ai ae a‘u ma inu; a mavae lea, i le ‘ai ai oe ma inu?

⁹E faafetai atu ea ia i lea auauna, ina ua fai mea na fai atu ai ia te ia?

¹⁰Ai lava e leai. E faapea foi outou, pe a uma ona fai o mea uma na poloaiina atu ia te outou, tou te fai ane, O auauna le aoga i matou nei; auā o mea e tatau ona matou fai, o mea ia ua matou faia.

¹¹Ua lau malaga atu ia i Ierusalema, ua ui ai i Samaria ma Kalilaia.

¹²Ua oo atu ia i le tasi aai, ona fetaiai lea ma ia o tagata lepela e toatinoagafulu, ua tutū mamao mai i latou.

¹³Ua latou alalaga mai, ua faapea mai, Le Alii e, Iesu, ia e alofa mai ia te i matou.

¹⁴Ua silafia e ia, ona fetalai atu lea o ia ia te i latou, Ina o ia, ia faaali atu outou i faitaulaga. Ua latou o, ona faamamāina lea o i latou.

¹⁵O le tasi o i latou, ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele;

¹⁶ua faapaū fao ia i ona vae, ua faafetai mai ia te ia; o le Samaria foi o ia.

¹⁷Ona fetalai atu lea o Iesu, ua faapea atu, E lei faamamāina ea le toatinoagafulu? a o ifea le toaiva?

¹⁸Ua le iloa ni e toe foi mai e vivii atu i le Atua, na o lenei tagata ese.

¹⁹Ua fetalai atu o ia ia te ia, Ina tulai ia, ina alu; ua e ola i lou faatuatua.

²⁰Ua fesili mai ia te ia le au faresaio, Pe oo mai afea le malo o le Atua? Ua tali atu ia ia te i latou, ua faapea atu, E le oo mai le malo o le Atua ma le vaaia e mata.

²¹E le fai ane foi tagata, Faauta, o iinei! pe faapea, Faauta, o iila! auā faauta, ua i ai lava ia te outou le malo o le Atua.

²²Ua fetalai atu ia i le au soo, E oo mai lava ona po tou te mananao tele ai ia iloa se aso e tasi o le Atalii o le tagata, a e le iloa.

²³A fai mai tagata ia te outou, Faauta o iinei; pe faapea, Faauta o iila; aua tou te o i ai, pe mulimuli atu i ai.

²⁴Auā e pei ona emo mai o le uila mai le tasi itu lagi, e malamalama atu i le tasi ita lagi; e faapea foi le Atalii o le tagata i lona aso.

²⁵A e tatau ona muai tiga o ia i mea e tele, ma lafoaiina e lenei tupulaga.

²⁶Pei ona faia foi i ona aso o Noa, e faapea lava ona fai i ona aso o le Atalii o le tagata.

²⁷Na aai i latou ma inu, na latou fai avā foi ma latou faaavaga, ua oo lava i le aso na ulu ai Noa i le vaa, ona oo mai ai lea o le lolo, ua fano ai i latou uma.

²⁸E pei ona faia foi i ona aso o Lota; ua latou aai, ua inu, ua faatau, ua avane e faatau, ua totō mea, ma fai fale;

²⁹a o lea lava aso na alu ese ai Lota i Sotoma, ua to faaua mai le afi ma le teio mai le lagi, ua fano ai i latou uma.

³⁰E faapea lava i le aso e faaalia mai ai le Atalii o le tagata.

³¹O le ua i luga o le fale i lea aso, ma ana mea ua i le fale, aua le alu ifo ia e ave; e faapea foi le ua i le vao, aua le toe foi mai o ia.

³²Ia outou manatua le avā a Lota.

³³O sē saili ia saogalemu lona ola, e māumau ai ia te ia; a o sē faamāumau ai, e faasaoina e ia.

³⁴Ou te fai atu ia te outou, O lea lava po, e i le moega e tasi tagata e toalua; e avea le tasi, a e tuua le tasi.

³⁵E olo faatasi fafine e toalua; e avea le tasi, a e tuua le ta i.

³⁶E i le vao tagata e toalua; e avea le tasi, a e tuua le tasi.

³⁷Ua latou fai mai ia te ia, ua faapea mai. Le Alii e, po o fea e fai ai? Ua fetalai atu ia ia te i latou, O le mea o i ai le tino, e aofaga i ai aeto.