Read Samoan Old Version Bible – O LE TUSI PAIA LUKA, 18 Bible Online

LUKA, 18 - Samoan Old Version Bible – O LE TUSI PAIA bible

LUKA, 18

¹Ua fetalai atu foi o ia le faataoto ia te i latou, ina ia tatalo soo e tatau ai, a e aua le faavaivai;

²ua faapea atu, Sa i le tasi aai le faamasino, ua le mata‘u i le Atua, e le ava foi i tagata;

³sa i lea aai foi le tasi fafine ua oti lana tane, ua alu atu ia te ia, ua faapea atu, Ia e faamasino atu i le ua i ai a‘u mea.

⁴O nai aso e lei mafai ai o ia; a e mulimuli ane ua faapea ifo o ia i lona loto, E ui lava ina ou le mata‘u i le Atua, ma a‘u le ava i tagata,

⁵a e peitai ona o le faasoesa mai ia te au o le fafine nei ua oti lana tane, ou te faamasino i ana mea, ina ne‘i faatiga mai ia te au i lona sau soo.

⁶Ona fetalai atu ai lea o le Alii, Ia outou faalogo mai i le upu a le faamasino amioletonu.

⁷E ui lava ina tuai mai le Atua i e na ia filifilia, o loo alalaga i latou ia te ia i le ao ma le po, pe le faamasino ea o ia i a latou mea?

⁸Ou te fai atu ia te outou, e vave ona faamasino e ia o a latou mea. Peitai a sau le Atalii o le tagata, e iloga ea e maua e ia le faatuatua i le lalolagi.

⁹Ua fetalai atu foi o ia lenei faataoto i nisi tagata e na faatuatua ia te i latou fa‘i ua amiotonu, a e faaleaogaina nisi;

¹⁰Na o ae i le malumalu tagata e toalua e tatalo, o le faresaio le tasi, a o le telona le tasi.

¹¹Na tulai le faresaio, ua tatalo lemu atu i nei upu, Le Atua e, ou te faafetai atu ia te oe, ina ua ou le pei o isi tagata, o e fao mea, o e amio leaga, o e mulilulua, e le pei o lela telona foi.

¹²E tailua i vaiasosa ona ou anapogi, ou te avatu mea e sefulu a‘i mea uma ou te maua.

¹³O le telona foi, ua tu mamao atu, e le mafaia ona tepa ae ona mata i le lagi, a ua pōpō lona fatafata, ua faapea atu, Le Atua e, ia e alofa mai ia te au le tagata agasala.

¹⁴Ou te fai atu ia te outou, na alu ifo lena tagata i lona fale ua ta‘uamiotonuina, a e le faapea le isi; auā o sē faamaualuga ia te ia, e faamaulaloina lea; a o lē faamaulalo ia te ia, e faamaualugaina lea.

¹⁵Ua latou au mai tama meamea ia te ia, ina ia pa‘i ane o ia ia te i latou; ua iloa e le au soo, ona latou vavao lea ia te i latou.

¹⁶A o Iesu, ua valaau atu o ia ia te i latou, ua faapea atu, Ina tuu mai ia o tama iti e o mai ia te au, a e aua tou te vavao ia te i latou; auā e faapei o i latou nei o e o i le malo o le Atua.

¹⁷E moni, ou te fai atu ia te outou, Ai se le tali i le malo o le Atua e pei o se tama itiiti, e le sao lava ia i ai.

¹⁸Ua fesili mai foi ia te ia le tasi alii, ua faapea mai, Le a‘oa‘o lelei e, se a le mea ou te faia, ou te maua ai le ola e faavavau?

¹⁹A ua fetalai atu Iesu ia te ia, Se a le mea e te ta‘ulelei mai ai a‘u? e leai sē lelei, na o le toatasi, o le Atua lea.

²⁰Ua e iloa poloaiga, Aua e te mulilua; aua e te fasioti; aua e te gaoi; aua e te molimau pepelo; ia e ava i lou tamā ma lou tinā.

²¹Ona fai mai lea o ia, Ua ou tausia ia mea uma talu lava ina ou itiiti.

²²Ua faafofoga Iesu i ia upu, ona fetalai atu lea ia te ia, Ua toe o le mea e tasi e te lei maua; ia e faatau atu i au mea uma, ma ia e tufatufaina i e matitiva, ona ia te oe lea o le faulaigāoloa i le lagi; i le e sau, ma mulimuli mai ia te au.

²³Ua faalogo o ia i na upu, ona tiga tele ai lea o ia; auā o le mauoa tele lava ia.

²⁴Ua silafia e Iesu o ia ua tiga tele ona fetalai atu lea o ia, O le mea faigata nauā ona sao atu o e mauoa i le malo o le Atua!

²⁵E faigofie ona ui atu o le kamela i le pu o le au, a e faigata ona sao atu o le mauoa i le malo o le Atua.

²⁶O e na faalogo i ai ua fai mai, Afai o lea, o ai se tasi e mafai ona faaolaina?

²⁷Ua fetalai atu ia, O mea e le mafaia e tagata, e mafaia e le Atua.

²⁸Ona fai mai lea o Peteru, Faauta, ua matou tuua mea uma, a e matou mulimuli atu ia te oe.

²⁹Ona fetalai atu lea o ia ia te i latou, E moni, ou te fai atu ia te outou, Ai se tagata ua tuua e ia le fale, po o mātua, po o uso, po o le avā, po o le fanau, ona o le malo o le Atua,

³⁰e maua e ia o mea sautualasi i nei ona po, o le ola foi e faavavau i le olaga atali.

³¹Ua ave e ia le toasefulu ma le toalua, ua fetalai ia te i latou, Faauta, o le a o ae i tatou i Ierusalema, e taunuu ai o mea uma ua tusia e le au perofeta i le Atalii o le tagata.

³²Auā e tuuina atu ia i nuu ese, e faatauemuina, e faaleagaina, e feanu foi i latou ia te ia,

³³latou te sasa foi ma fasioti ia te ia; a o le aso tolu e toe tu mai ai o ia.

³⁴E lei lagona lava e i latou ia mea; ua lilo foi lena upu ia te i latou, e lei iloa e i latou o mea na fetalaia mai.

³⁵Ua latalata ia i Ieriko, a ua nofo i le auala le tasi tauaso o faatoga i mea:

³⁶ua faalogo o ia i le motu o tagata ua savavali ane, ona fesili lea a ia, pe se a lea.

³⁷Ua latou fai atu ia te ia, o Iesu le Nasareta ua maliu ane.

³⁸Ona alaga mai ai lea o ia, ua faapea mai, Iesu e, le alo o Tavita, ia e alofa mai ia te au.

³⁹Ua vavao ia te ia e na muamua, ina ia faalologo o ia; peitai o ia ua atili ai ona alaga, Le alo o Tavita e, ia e alofa mai ia te au.

⁴⁰Ua tu Iesu, ma fetalai atu ia ta‘ita‘iina mai o ia ia te ia. Ua latalata mai o ia, ona fesili atu lea o ia ia te ia,

⁴¹ua faapea atu, Se a le mea e te manao i ai ou te faia mo oe? Ua fai mai o ia, Le Alii e, ia vaai o‘u nei mata.

⁴²Ona fetalai atu lea o Iesu ia te ia. Ina vaai ia ou mata; o lou faatuatua ua e ola ai.

⁴³Ona vaai loa lea o ona mata, ua mulimuli atu ia te ia, ua vivii atu i le Atua; ua iloa atu ai e le nuu uma, ona latou vivii atu lea i le Atua.