Read Samoan Old Version Bible – O LE TUSI PAIA LUKA, 19 Bible Online

LUKA, 19 - Samoan Old Version Bible – O LE TUSI PAIA bible

LUKA, 19

²faauta foi, o le tagata ua igoa ia Sakaio, o ia o le telona sili, o le mauoa foi o ia.

³Ua fia maimoa o ia ia Iesu pe faapefea o ia; a e le mafaia ona o le motu o tagata; auā o le tagata saasaa o ia.

⁴Ua momo‘e ia i luma, ua ae i le laau o le sukamoru, e vaavaai ifo ai ia te ia; auā o le a ui ane ai.

⁵Ua oo atu Iesu i lea mea, ona tepa ae lea o ia, ua silafia o ia, ona fetalai atu lea ia te ia, Sakaio e, ia e vave ifoifo ia i lalo, auā e tatau ona ou nofo i lou fale i le aso nei.

⁶Ona vave alu ifo ai lea o ia, ua tali mai ia te ia ma le fiafia.

⁷Ua muimui uma e na iloa, ua faapea ane, Ua alu atu ia i le tagata agasala e api ai.

⁸A ua tu mai Sakaio, ua faapea mai i le Alii, Faauta, le Alii e, o le a ou vaeluaina atu a‘u mea i e matitiva; afai foi ua tiga se tasi i lo‘u tuua‘i ane, ou te taui atu ai e taifā.

⁹Ua fetalai ane Iesu ia te ia, Ua oo mai le faaolataga i le aiga nei i le asō, ina ua fai o ia ma atalii o Aperaamo.

¹⁰Auā ua sau le Atalii o le tagata e saili ma faaola i le na le iloa.

¹¹Ua latou faalogo i na mea, ona toe fetalai atu lea o ia i le faataoto, ina ua latalata ia i Ierusalema, auā foi fa te i latou o le a faaalia loa mai le malo o le Atua.

¹²O lea foi ua fetalai atu ai o ia, Na alu le tasi alii i le nuu mamao e maua ai sona ao e fai ai o ia ma tupu, i le toe foi mai.

¹³Ua valaau e ia i ana auauna e toasefulu, ua avatu ia te i latou mina e fuagafulu, ua fai atu foi ia te i latou, tou te faatau a‘i seia ou toe sau.

¹⁴A ua itagia o ia e lona nuu, ua latou auina atu foi le sāvali e mulimuli atu ia te ia, ua faapea atu, Matou te le mananao i lena tagata e fai mo matou tupu.

¹⁵Ua toe foi mai o ia ina ua maua lona ao e fai ai o ia ma tupu, ona fai ane ai lea, ia valaauina ia auauna na ia avatu i ai tupe ia o mai ia te ia, ina ia iloa e ia taitasi a latou faatau po ua faapefea.

¹⁶Ona sau ai lea o le tasi, ua faapea mai, Le alii e, o lau mina ua maua ai isi mina e fuagafulu.

¹⁷Ona fai atu lea o ia ia te ia, Ua lelei ia, le auauna lelei e, ua e faamaoni i le mea itiiti lava, o lea ia e pule ai i aai e sefulu.

¹⁸Ua sau foi le tasi, ua faapea mai, Le alii e, o lau mina ua maua ai mina e lima gafua.

¹⁹Ua fai atu foi o ia i lena, Ina pule foi ia oe i aai e lima.

²⁰Ua sau foi le tasi, ua faapea mai, Le alii e, faauta, o lau mina lenei, sa ia te au na teu i le solosolo;

²¹auā na ou mata‘u lava ia te oe, auā o oe le tagata faigata; ua e avae le mea na e le tuuina i lalo, ua e selesele foi i le saito e te lei luluina.

²²Ona fai atu lea o ia ia te ia, Le auauna leaga e, o lau upu lava ou te faasala ai ia te oe; ua e iloa lava, o a‘u o le tagata faigata, o lē avae le mea na ou le tuuina i lalo, o lē selesele foi i le saito na au le luluina.

²³Se a le mea na e le avatu ai la‘u ario i le fale e faatau ai tupe, po ua ou sau ona ou maua ai lea atoa ma lona taui?

²⁴Ua fai atu ia i e na tutū mai, Ia outou fao le mina ua ia te ia, ma avatu i le ua i ai mina e fuagafulu.

²⁵(Ua latou fai mai ia te ia, Le alii e, ua ia te ia mina e fuagafulu.)

²⁶Auā ou te fai atu ia te outou, O le o i ai mea, e avatu i ai; a o le ua leai sana mea, e faoa mea ua ia te ia.

²⁷Peitai o i latou ua fai a‘u mo latou fili, e na le mafafai ona fai o a‘u mo latou tupu, ia outou ta‘ita‘i mai iinei, ma fasioti ia te i latou i o‘u luma.

²⁸Ua mavae atu ia upu ona muamua atu ai lea o ia, ua maliu ae i Ierusalema.

²⁹Ua latalata i ai Petefake ma Petania i le mauga, o Olive le igoa, ona aau atu lea e ia o ona soo e toalua,

³⁰ua faapea atu, Lua te o atu i le aai oulua o lumanai; a oulua oo i ai, lua te iloa le tamai asini ua noatia, e lei tietie ai lava se tasi tagata, lua te talaina, i le ta‘ita‘i mai.

³¹Afai foi e fesili mai se tasi ia te oulua, Se a le mea lua te tatala ai le asini? lua te fai atu ia te ia, ia faapea atu, E manao i ai le Alii.

³²Ua o e na aauina atu, ona la maua ai lea, pei ona fetalai mai o ia ia te i laua.

³³O tatala e i laua le tamai asini, ua fai mai ia te i laua tagata e a latou le mea, Se a le mea lua te tatala ai le tamai asini?

³⁴Ona la fai atu lea, E manao i ai le Alii.

³⁵Ua la ta‘ita‘i mai i ai ia Iesu; ua latou lafo o latou ofu i luga i le tamai asini, ona latou faatietie ai lea o Iesu.

³⁶O maliu ane ia, a ua latou fofola o latou ofu i le ala.

³⁷Ua latalata ia ua i le ifoa‘i o le mauga o Olive, ona afua ai lea o le olioli o le au soo uma e toatele, ua latou vivii atu i le Atua ma le leo tele, auā o vavega uma na vaaia e i latou;

³⁸ua faapea ane, Ia manuia le tupu o loo maliu mai i le suafa o le Alii; o le manuia i le lagi, o le viiga foi i mea aupitoaluga.

³⁹Ona fai mai lea ia te ia o isi o le au faresaio mai le motu o tagata, Le a‘oa‘o e, ia e aoai atu i ou soo.

⁴⁰Ona tali atu lea o ia ia te i latou, ua faapea atu, Ou te fai atu ia te outou, a le feganavai i latou nei, e alalaga mai lava o maa.

⁴¹Ua latalata ia, ua silafia e ia le aai, ona tagi ai lea o ia,

⁴²ua faapea ane, Ana e iloa, o oe lava i lenei lou lava aso, o mea e te manuia ai! A o lenei ua lilo ia te oe.

⁴³Auā e oo mai ia te oe ona aso e tanu ai le mea mautietie e sio ai ia te oe e i latou ua ita ia te oe, latou te sioina lava ia te oe, e puipui ia te oe i itu uma;

⁴⁴latou te faagatasi foi ia te oe ma le eleele, atoa ma lau fanau i totonu ia te oe; latou te le tuua foi se maa i luga o le tasi maa i totonu ia te oe; auā ua le iloa e oe ona po ua asia mai ai oe.

⁴⁵Ua ulu atu ia i le malumalu, ona tulia lea i fafo e ia o e na fefaataua‘i;

⁴⁶ua faapea atu ia te i latou. Ua tusia, O lo‘u fale o le fale tatalo lea; a ua outou faia ma ana o e fao mea.

⁴⁷Ua a‘oa‘o ia i aso fai soo i le malumalu. A o le au faitaulaga sili ma le au tusiupu, atoa ma alii o le nuu, ua latou fia fasioti ia te ia;

⁴⁸a e lei maua e i latou se mea e fai ai; auā ua naunau le nuu uma i le fia faalogo atu ia te ia.