Read Samoan Old Version Bible – O LE TUSI PAIA LUKA, 20 Bible Online

LUKA, 20 - Samoan Old Version Bible – O LE TUSI PAIA bible

LUKA, 20

¹O le tasi o ia aso, a o a‘oa‘o ia i le nuu i le malumalu, ma folafola i le tala lelei, ua tutū mai ai ia te ia faitaulaga sili, ma tusiupu, ma toeaina.

²Ona latou fai mai lea ia te ia, ua faapea mai, Fai mai ia ia te i matou, se a le pule e te fai ai na mea; po o ai foi na ia avatu ia te oe lenei pule?

³Ua tali atu ia, ua faapea atu ia te i latou, Ou te fesili atu foi ia te outou se upu e tasi; tou te fai mai ai ia te au.

⁴Mai le lagi ea le papatisoga a Ioane, pe mai tagata?

⁵Ona latou felafolafoai lea, ua faapea ane, Afai tatou te fai atu, Mai le lagi; ona fai mai ai lea o ia, Se a foi le mea tou te lei talitonu ai ia te ia?

⁶A tatou fai atu. Mai tagata; ona fetogi mai ai lea o le nuu uma ia te i tatou i maa; auā o la latou le taofi, o Ioane o le perofeta ia.

⁷Ona latou tali mai lea. Matou te le iloa pe maifea.

⁸Ona fetalai atu lea o Iesu ia te i latou, Ou te le ta‘u atu foi ia te outou le pule ou te fai ai nei mea.

⁹Ona fetalai atu lea o ia i lenei faataoto i le nuu, Na fai e le tasi tagata le tovine, ua tuu atu ai i e galulue i vine, ona alu malaga lea o ia i le nuu ese ua fāi po.

¹⁰Ua fai le fuata, ona auina atu lea e ia o le auauna i e galulue i vine, ia latou au mai ia te ia ni fua o le tovine; a o e galulue i vine ua latou sasaina o ia, ma aufuaina mai o ia.

¹¹Ua toe auina atu e ia le tasi auauna; ua latou sasa ma agaleaga ia te ia, ona latou aufuaina mai lea o ia.

¹²Ua toe auina atu e ia lona toatolu, ua latou fasia o ia ua manua, ma latou tuliesea.

¹³Ona fai ane ai lea o le alii e ona le tovine, Se a se mea ou te faia? Ou te auina atu lo‘u atalii pele; atonu latou te ava mai ia te ia, pe a iloa mai o ia.

¹⁴A ua iloa atu o ia e tagata galulue i vine, ona latou fetautalatala‘i ai lea, ua faapea ane, O le suli lena; o mai ia, ina tatou fasioti ia te ia, e maua ai le fanua mo i tatou.

¹⁵Ua latou tuli ia te ia i tua o le tovine, ma latou fasiotia. Se a foi le mea e faia ia te i latou e le alii e ona le tovine?

¹⁶E alu atu ia ma faauma ia tagata galulue i vine, e tuu atu foi le tovine i nisi tagata. Ua latou faalogo atu, ona latou fai mai lea, Aua ne‘i faapea.

¹⁷Ona silasila lea o ia ia te i latou, ua faapea atu, Se a foi lenei upu ua tusia. O le maa na lafoaiina e tufuga fai fale, ua avea lea ma maa tulimanu aupitoaluga?

¹⁸O sē paū i luga o lea maa, e gaugau ai o ia; a o se tasi e paū ifo i ai le maa, e nutipalaina ai o ia.

¹⁹Ua fia pue ia te ia le au faitaulaga sili ma le au tusiupu i lea lava itu aso; a ua latou matatau i le nuu, auā ua latou iloa ua faatu e ia lena faataoto ia te i latou.

²⁰Ua latou lamalama ma aauina atu nisi e vaavaai ia te ia, ua latou faataga amiotonu, ina ia latou maua ai sana upu e tuu atu ai ia te ia i le lima ma le pule a le alii.

²¹Ua latou fesili mai ia te ia, ua faapea mai. Le a‘oa‘o e, ua matou iloa ua e tautala ma a‘oa‘o mai ma le tonu, e le faailogaina e oe se tagata, a ua e a‘oa‘o i le ala o le Atua ma le faamaoni.

²²Pe sa ea ona matou avatu le taulaga ia Kaisara, pe leai?

²³A ua silafia e ia la latou togafiti, ona fetalai atu ai lea o ia ia te i latou. Se a le mea tou te tofotofo mai ai ia te au?

²⁴Faaali mai ia ia te au se tenari. O ai ea e ona le faatagata ma le tusi e i ai? Ua latou fai mai ia te ia, E o Kaisara.

²⁵Ona fetalai atu lea o ia ia te i latou, O mea a Kaisara ia outou avatu ia Kaisara; a o mea a le Atua avatu ia i le Atua.

²⁶Latou te le mafaia lava ona maua o ana upu i luma o le nuu; ua latou ofo i lana tali, ua latou faalologo ai.

²⁷Ua o mai ia te ia isi o le au satukaio o e taofi e leai se toe tu; ua latou fesili mai ia te ia,

²⁸ua faapea mai, Le a‘oa‘o e, ua tusi mai Mose ia te i matou, pe afai e oti le uso o le tasi tagata ua fai lana avā, a ua oti ia e leai sana fanau, ia fai avā lona uso i le fafine, ina ia tupu ai se gafa o lona uso.

²⁹Ia, e toafitu le au uso; na fai avā le ulumatua, ua oti e leai sana fanau.

³⁰Ona fai avā lea i le fafine o le aupito ane i ai, ua oti foi o ia e leai sana fanau.

³¹Ua fai avā foi i ai lona toatolu, ua faapea foi ua oo i lona toafitu, ua latou oti ua leai ni a latou fanau.

³²A e muliai oti foi le fafine.

³³A oo foi i le toe tu, o ai so latou e ana le avā? auā na fai avā ai le toafitu.

³⁴Ona tali atu lea o Iesu, ua faapea atu ia te i latou, O tagata o le olaga nei, ua fai avā ma nofo tane i latou;

³⁵a o e ta‘uaogaina ia maua e i latou lea olaga, ma le toe tu mai o e ua oti, latou te le fai avā, pe nofo tane;

³⁶e le mafai foi ona toe oti o i latou; auā ua latou tutusa ma agelu; o fanau foi i latou a le Atua, o tagata o le toe tu.

³⁷A o le faatuina o e ua oti, ua faailoa mai lea mea e Mose i le laau talatala i lona ta‘ua o le Alii o le Atua o Aperaamo, o le Atua foi o Isaako, o le Atua foi o Iakopo.

³⁸E le o le Atua ia o e ua oti, a o e ola; auā ua ola uma ia te ia.

³⁹Ona tali mai ai lea isi o le au tusiupu, ua faapea mai, Le a‘oa‘o e, ua tonu lau upu.

⁴⁰E mulimuli ane latou te lei toe faamalosi ona fesili mai ia te ia se mea e tasi.

⁴¹Ona fetalai atu lea o ia ia te i latou, Pe faapefea ona fai mai tagata, o le Keriso o le Atalii ia o Tavita?

⁴²A ua fai mai e Tavita lava i le tusi o salāmo, Na fetalai atu le Alii i lo‘u Alii, Ina nofo ia oe i lo‘u itu taumatau,

⁴³seia ou faia e ua fai oe mo latou fili ma mea e tu ai ou vae.

⁴⁴O lenei, ua ta‘ua o ia e Tavita o lona Alii, pe faapefea ona fai mona atalii?

⁴⁵Ona fetalai atu lea o ia i ona soo, a o faalogo mai le nuu uma,

⁴⁶Ia outou i le au tusiupu e ua fia evaeva ma ofu tatapuvae, ua manao foi ia alofagia i latou i malae, ma nofoa sili i sunako, ma mea sili e taooto ai i faigaai;

⁴⁷o e faauma fale o fafine ua oti a latou tane, ua faalevaleva foi a latou tatalo e fai ma ufiufi; e atili ai ona faasalaina o i latou.