Read Samoan Old Version Bible – O LE TUSI PAIA LUKA, 24 Bible Online

LUKA, 24 - Samoan Old Version Bible – O LE TUSI PAIA bible

LUKA, 24

¹O le uluai aso o le vaisapati, ua latou o atu ai i le tuugamau i le tafa o ata, ua ave mea manogi na latou saunia, o isi foi fafine sa faatasi ma i latou.

²Ua iloa e i latou ua fulieseina le maa nai le tuugamau;

³ona latou ulu atu lea i totonu, a e lei iloa le tino o le Alii o Iesu.

⁴Ua fememeai i latou i lenei mea, faauta foi, ua tutū mai ia te i latou tagata e toalua ua oofu i ofu pupula.

⁵Ua matatau i latou, ua punou foi o latou mata i le eleele, ona la fai mai lea ia te i latou, Se a le mea tou te saili ai le ua soifua i e ua oti?

⁶E le o iinei o ia, a ua tu; ia outou manatu i lona fetalai atu ia te outou, ina o i Kalilaia o ia,

⁷ua faapea atu, E tatau ona tuuina atu o le Atalii o le tagata i lima o tagata agasala, ma ia faasatauroina, ma toe tu mai i le aso tolu.

⁸Ona latou manatu ai lea i lana fetalaiga.

⁹Ua latou toe foi mai nai le tuugamau, ona latou faamatala mai lea o ia mea uma i le toasefulu ma le toatasi, atoa ma i latou uma.

¹⁰O Maria foi le Makatala, ma Ioana, ma Maria le tinā o Iakopo, ma i latou uma sa ia te i latou, o i latou ia e na faamatala mai ia mea i le au aposetolo.

¹¹Ua latou manatu foi i a latou upu e peiseai se talanoaga; latou te lei talitonu foi ia te i latou.

¹²A ua tu i luga Peteru, ua momo‘e i le tuugamau; ua punou foi, ua iloa e ia o ie ua tuu faatasi; ona alu ai lea o ia, ua ofo i le mea ua faia.

¹³Faauta foi, ua ō le toalua o i latou i lea aso i le aai, o Emau le igoa, o lo la va ma Ierusalema e onogafulu o setatio.

¹⁴Sa fetautalatala‘i i laua i ia mea uma ua faia.

¹⁵Ua la fetautalatala‘i, ma fesueai, ona faalatalata mai ai lea o Iesu, ua o faatasi ma i laua.

¹⁶A ua punitia o laua mata, o lea ua le iloa ai o ia e i laua.

¹⁷Ua fetalai atu ia ia te i laua, O a ea ia upu ua oulua felafolafoai ai, o oulua o savavali, ma ua mata faanoanoa?

¹⁸O le tasi o i laua e igoa ia Kaleopa, ua tali mai ia te ia, ua faapea mai, Pe na o oe ea lē āumau i Ierusalema ma le le iloa o mea ua tutupu ai i ona po nei?

¹⁹Ona fetalai atu lea o ia ia te i laua, O a mea? Ona la fai mai ai lea ia te ia, O mea ia Iesu le Nasareta, o le perofeta lea sa malosi i mea na na faia, atoa ma ana upu i luma o le Atua ma le nuu uma;

²⁰na tuuina atu foi o ia e le au faitaulaga sili ma o tatou faipule, ia faasalaina o ia ia oti, ma ua latou faasatauroina o ia.

²¹Sa matou faamoemoe foi, o ia lava o le a togiolaina Isaraelu; a e le gata i ia mea uma, o lona aso tolu le asō talu ona faia o na mea.

²²A ua matou ofo lava i nisi fafine o i matou sa i le tuugamau i le tafa o ata;

²³e lei iloa e i latou lona tino, a ua latou o atu, ma faapea atu, ua iloa e i latou agelu na faaali mai, e na fai mai, ua soifua o ia.

²⁴O isi foi o matou, na latou o i le tuugamau, ua faapea foi ona iloa e i latou, pei ona fai mai ai o fafine; a e lei iloa e i latou o ia.

²⁵Ona fetalai atu lea o ia ia te i laua, O tagata valea, ma loto faigata ona talitonu i mea uma ua fai mai ai e le au perofeta.

²⁶E le tatau ea ona tiga o le Keriso i mea faapena, i le oo ai o ia i lona mamalu?

²⁷Ona faamatala ai lea e ia ia te i laua o mea ua tusia ia te ia i Tusi uma, ua amata mai ia Mose atoa ma le au perofeta uma.

²⁸Ua latou faalatalata atu i le aai ua latou o i ai; a o ia ua aga atu peiseai a alu loa.

²⁹A ua la pulunaunau ia te ia, na faapea mai, Tatou te nonofo ma i maua nei; auā ua taugagaifo le la, ua lata i le afiafi. Ona ulufale atu lea o ia, latou te nonofo.

³⁰Ua taoto ia e taumafa faatasi ma i laua, ona tago ai lea i le areto, ua faafetai, ua tofitofi, ma avatu ia te i laua.

³¹Ona pupula ai lea o laua mata, ua la iloa o ia; a ua mou o ia nai ia i laua.

³²Ona la fetautalatala‘i lea, E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?

³³Ua la tutu i luga i lea lava itu aso, ua toe foi atu ai i Ierusalema, ua maua atu foi e i laua o le toasefulu ma le toatasi ua faapotopoto faatasi ma e na ia i latou;

³⁴o faapea mai i latou, E moni, ua toe tu le Alii, ua faaali foi o ia ia Simona.

³⁵O i laua foi ua la faamatala atu mea na faia i le ala, mona ua iloa foi o ia e i laua ina o tofitofi le areto.

³⁶O tautalatala i latou i nei mea, a a ua tu mai Iesu lava i o latou luma, ua fetalai atu ia te i latou, Ia outou manuia.

³⁷Ua fefefe i latou, ua matuā matatau lava, fa te i latou o le agaga ua latou vaaia.

³⁸Ua fetalai atu foi o ia ia te i latou, Se a le mea ua outou atuatuvale ai? se a foi e tutupu ai masalo i o outou loto?

³⁹Ia outou vaavaai mai i o‘u lima ma o‘u vae, auā o a‘u lava lenei; ia outou tagotago mai ia te au, ma ia vaavaai mai; auā o le agaga e leai sona aano ma ni ivi, pei o a‘u nei ua outou vaavaai i ai.

⁴⁰Ua uma ona fetalai atu, ona faaali atu ai lea e ia ia te i latou o ona lima ma ona vae.

⁴¹A o lei talitonu i latou ona ua olioli, ma ua ofo, ua fetalai atu ia ia te i latou, O iina ea ni a outou mea e ‘ai?

⁴²Ona latou avatu ai lea ia te ia se fāsi i‘a tunu, ma se fāsi melikerio.

⁴³Ua tago ia i ai, ma taumafa ai i o latou uma.

⁴⁴Ua fetalai atu ia ia te i latou, O upu ia na ou fai atu ai ia te outou, ina o ou ia te outou; e tatau ona taunuu o mea uma ua tusia ia te au i le tulafono a Mose, ma le au perofeta, ma salāmo.

⁴⁵Ona tatalaina lea o ia o latou loto, ina ia latou lagona ai Tusi.

⁴⁶Ua fetalai atu foi o ia ia te i latou, Ua faapea ona tusia, e faapea foi ona tatau ina tiga o le Keriso, ma toe tu nai e ua oti i le aso tolu;

⁴⁷ina ia tala‘iina foi le salamo ma le faamagaloina o agasala i nuu uma i lona igoa, e amata mai i Ierusalema.

⁴⁸O molimau foi outou i nei mea.

⁴⁹Faauta foi, ou te auina mai ia te outou le na folafolaina e lo‘u Tamā; a ia outou nonofo i le aai o Ierusalema, seia maua e outou le mana mai lugā.

⁵⁰Ua ave e ia ia te i latou i tua, ua oo lava i Petania; ona sisii ai lea o ona aao, ma faamanuia ia te i latou.

⁵¹Ua oo ina o faamanuia e ia ia te i latou, ona te‘a ese lea o ia ia te i latou, ua siitia i le lagi.

⁵²Ua latou ifo ia te ia, ona toe foi mai lea i Ierusalema ma le olioli tele;

⁵³sa i le malumalu i latou e le aunoa, o latou o vivii ma faafetai atu i le Atua. Amene.