Read Samoan Old Version Bible – O LE TUSI PAIA LUKA, 3 Bible Online

LUKA, 3 - Samoan Old Version Bible – O LE TUSI PAIA bible

LUKA, 3

¹O le tausaga e tasi le sefulu ma le lima i le nofoaiga a Tiperio Kaisara, sa pule Ponotio Pilato i Iutaia, o Herota foi o le tupu ia o Kalilaia, ma Filipo lona uso o le tupu ia o Ituraia ma le nuu o Terekoniti, o Lusanio foi o le tupu ia o Apilene;

²o Ana ma Kaiafa o faitaulaga sili i laua, ua oo ane ai le afioga a le Atua ia Ioane le atalii o Sakaria i le vao.

³Ona alu atu ai lea o ia i le itu uma o Ioritana, ua tala‘i atu le papatisoga o le salamo ina ia faamagaloina agasala.

⁴Pei ona tusia i le tusi o upu a Isaia le perofeta, ua faapea mai, O le leo o le ua alaga i le vao, Ina teuteu ia outou le ala o le Alii, ia faalaulelei ona ala.

⁵E faatumuina o vanu uma, e faamaulaloina foi mauga ma mea maupuepue uma; e faasa‘oina foi o mea piopio, ma mea gaoa e fai ma ala laulelei ia.

⁶E vaaia foi e tagata uma le faaolataga mai le Atua.

⁷Ua fai atu ia i le motu o tagata e na o mai e papatisoina e ia, Fanau a gata feai e, o ai ea na na faaali atu ia te outou e sosola ese i le toasa atali?

⁸Ia outou fua mai ni fua e tatau ma le salamo, a e aua tou te faapea ifo i o outou loto, O Aperaamo, o ia o lo matou tamā; auā ou te fai atu ia te outou, e mafaia lava e le Atua ona faatupuina mai i nei maa ni fanau mā Aperaamo.

⁹O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi.

¹⁰Ua fesili mai le motu o tagata ia te ia, ua faapea mai, Se a foi se mea matou te faia?

¹¹Ua tali atu ia, ua faapea atu ia te i latou, O le tagata e lua ona ofu tino, ia avane ia te ia e leai sona ofu; o le ua ia te ia mea e ‘ai, ia faapea foi ona fai.

¹²Ua o mai foi telona ia papatisoina, ua faapea mai ia te ia, Le a‘oa‘o e, se a se mea matou te faia?

¹³Ona faapea atu lea o ia ia te i latou, Aua tou te faasili i mea ua totogi mai ia te outou.

¹⁴Ua fesili foi ia te ia tagata tau, ua faapea mai, Se a foi se mea matou te faia? Ona faapea atu lea o ia ia te i latou, Aua tou te faasaua i se tasi, aua tou te tuua‘i fua se tasi; ia outou tali filemu i lo outou taui.

¹⁵O loo faatalitali le nuu, ma manatunatu uma lava i o latou loto ia Ioane, po o ia le Keriso;

¹⁶ua tali atu Ioane ia te i latou uma, ua faapea atu, O a‘u nei lē papatiso atu ia te outou i le vai, a o lē maliu mai, e silisili o ia ia te au, e le aoga a‘u ona tatala le nonoa o ona seevae; o ia lava na te papatiso ia te outou i le Agaga Paia ma le afi.

¹⁷O i lona aao lana asu, e faamamā ai e ia lana faaputugāsaito; e faapotopoto foi e ia le saito i lona fale saito, a e susunuina le otaota o saito i le afi e le matineia.

¹⁸O isi foi upu faamafanafana e tele ua ia folafola ai le tala lelei i le nuu.

¹⁹A ua aoaiina le tupu o Herota e ia, ona o Herotia le avā a lona uso o Filipo, atoa foi ma mea leaga uma na faia e Herota;

²⁰ua na faaopoopoina lenei mea i mea uma, ua tuuina atu e ia o Ioane i le fale puipui.

²¹Ua papatisoina le nuu uma, ona papatisoina ai lea o Iesu, ua tatalo ia, ona faaavanoaina ai lea o le lagi,

²²ona afio ifo lea o le Agaga Paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, O lo‘u Atalii pele oe, ua ou fiafia lava ia te oe.

²³O Iesu foi, ua faatoa oo i le tolugafulu o ona tausaga, ua manatu foi tagata, o ia le atalii o Iosefa, o le atalii ia o Heli,

²⁴o le atalii ia o Matata, o le atalii ia o Levi, o le atalii ia o Meleki, o le atalii ia o Iana, o le atalii ia o Iosefa,

²⁵o le atalii ia o Matatia, o le atalii ia o Amosa, o le atalii ia o Nauma, o le atalii ia o Eseli, o le atalii ia o Nagae,

²⁶o le atalii ia o Maato, o le atalii ia o Matatia, o le atalii ia o Semei, o le atalii ia o Iosefa, o le atalii ia o Iuta,

²⁷o le atalii ia o Ioana, o le atalii ia o Resa, o le atalii ia o Serupapelu, o le atalii ia o Salatielu, o le atalii ia o Neri,

²⁸o le atalii ia o Meleki, o le atalii ia o Ati, o le atalii ia o Kosamo, o le atalii ia o Elemotamo, o le atalii ia o Eru,

²⁹o le atalii ia o Iose, o le atalii ia Elisara, o le atalii ia o Iorimo, o le atalii ia o Matata, o le atalii ia o Levi,

³⁰o le atalii ia o Simeona, o le atalii ia o Iuta, o le atalii ia o Iosefa, o le atalii ia o Ionano, o le atalii ia o Eliakimo,

³¹o le atalii ia o Melea, o le atalii ia o Mainano, o le atalii ia o Matata, o le atalii ia o Natano,

³²o le atalii ia o Tavita, o le atalii ia o Iese, o le atalii ia o Opeta, o le atalii ia o Poasa, o le atalii ia o Salemona, o le atalii ia o Naasona,

³³o le atalii ia o Aminatapu, o le atalii ia o Arama, o le atalii ia o Eseroma, o le atalii ia o Faresa,

³⁴o le atalii ia o Iuta, o le atalii ia o Iakopo, o le atalii ia o Isaako, o le atalii ia o Aperaamo, o le atalii ia o Tara, o le atalii ia o Nakori,

³⁵o le atalii ia o Seruka, o le atalii ia o Reu, o le atalii ia o Peleko, o le atalii ia o Eperu, o le atalii ia o Selaa,

³⁶o le atalii ia o Kainano, o le atalii ia o Afasata, o le atalii ia o Semu, o le atalii ia o Noa,

³⁷o le atalii ia o Lameko, o le atalii ia o Metusela, o le atalii ia o Enoka, o le atalii ia o Iareto, o le atalii ia o Maalaelu, o le atalii ia o Kainano,

³⁸o le atalii ia o Enosa, o le atalii ia o Setu, o le atalii ia o Atamu, o le atalii ia o le Atua.