Read Samoan Old Version Bible – O LE TUSI PAIA LUKA, 4 Bible Online

LUKA, 4 - Samoan Old Version Bible – O LE TUSI PAIA bible

LUKA, 4

¹Ua foi ae Iesu mai Ioritana, ua tumu o ia i le Agaga Paia, ona ave lea o ia e le Agaga i le vao,

²ua faaosoosoina e le tiapolo i aso e fagafulu. O aso lava ia e lei taumafa ai e ia sina mea e tasi; ua mavae ia aso, mulimuli ane ona fia taumafa ai lea o ia.

³Ona fai mai lea o le tiapolo ia te ia, Afai o oe le Alo o le Atua, ina fetalai ane ia i lenei maa ia liu areto.

⁴Ona tali atu lea o Iesu ia te ia, ua faapea atu, Ua tusia, E le na o mea e ‘ai e ola ai le tagata, a o afioga uma a le Atua.

⁵Ona aveina ae lea o ia e le tiapolo i le mauga maualuga, ma faaali ia te ia malo uma o le lalolagi, ua se emo lava.

⁶Ona fai mai lea o le tiapolo ia te ia, Ou te avatua ia te oe lenei pule uma, ma lo latou mamalu; auā ua tuuina mai ia te au, ou te avatu ai foi i lē ou te manao i ai;

⁷o lenei, afai e te ifo mai ia te au, e fai ma au nei mea uma.

⁸Ona tali atu lea o Iesu, ua faapea atu ia te ia, Satani e, ina alu ese ia oe i o‘u tua; auā ua tusia, E te ifo i le Alii lou Atua, ua na o ia lava e te auauna i ai.

⁹Ona ave ai lea o ia ia te ia i Ierusalema, ua faatu ia te ia i le tumutumu o le malumalu, ona fai mai lea o ia ia te ia, Afai o oe le Alo o le Atua, ina oso ia oe i lalo i le mea nei; auā ua tusia,

¹⁰E poloai o ia i ana agelu ia te oe, e tausi ia te oe;

¹¹latou te ave ia te oe i o latou lima, ne‘i tū‘ia lou vae i se maa.

¹²Ona tali atu lea o Iesu, ua faapea atu ia te ia, O loo faapea le upu, Aua e te tofotofo i le Alii lou Atua.

¹³Ua faauma e le tiapolo le tofotofoga uma, ona alu ese ai lea ia te ia seia i se aso.

¹⁴Ona foi atu lea o Iesu i le mana o le Agaga i Kalilaia; ua logo atu foi le tala ia te ia ua soo ai lava le itu uma.

¹⁵Ua a‘oa‘o ia i o latou sunako, ua viia ai o ia e tagata uma.

¹⁶Ua oo foi o ia i Nasareta, na tupu ai o ia, ona ulufale lea o ia i le sunako i le aso sapati, o lana masani lea; ua tu i luga foi e faitau.

¹⁷Ua tuuina mai ia te ia le Tusi a le perofeta o Isaia. Ona fofola lea e ia le Tusi, ona maua ai lea o le mea ua tusia ai lenei upu.

¹⁸Ua i o‘u luga le Agaga o le Alii, auā ua na faauu mai ia te au e folafola le tala lelei i e matitiva; ua auina mai a‘u e ia e faamalolo i e loto momomo, e tala‘i le saolotoga i le tafeaga, ma ia pupula mata o e tauaso, e tuu saoloto i e ua faasauaina,

¹⁹e tala‘i le tausaga e finagalo malie mai ai le Alii.

²⁰Ua taai e ia le Tusi, ona tuu atu ai lea i le auauna, ua nofo i lalo; ona pulatoa mai lea ia te ia o mata o tagata uma i le sunako.

²¹Ona amata lea ona fetalai atu o ia ia te i latou, O le aso nei ua taunuu ai lenei Tusi, o outou o faalogologo ai.

²²Ua latou vivii uma ia te ia, ua ofo foi i upu alofa na paū mai lona fofoga; ma ua latou fai ane, E le o le atalii ea lenei o Iosefa?

²³Ona fetalai atu lea o ia ia te i latou, E fai mai lava e outou lenei upu faatusa ia te au, Le fomai e, ina faamalolo ia oe ia te oe; o mea uma na faia i Kapanaumi, na matou faalogo i ai, ia e faia foi iinei i lou nuu moni.

²⁴Ua fetalai atu ia, E moni, ou te fai atu ia te outou, E le talia se perofeta i lona nuu moni.

²⁵E moni, ou te fai atu ia te outou; sa i Isaraelu i ona po o Elia, o fafine e toatele ua oti a latou tane, na punitia ai le lagi i tausaga e tolu ma masina e ono, ua oge tele ai le nuu uma.

²⁶A e lei auina atu Elia i so latou, ua na o Sarefata le aai o Saitonu, i le fafine ua oti lana tane.

²⁷Sa i Isaraelu foi lepela e toatele i ona po o le perofeta o Elisaia; a e lei faamamāina so latou, ua na o Naamanu lava le Suria.

²⁸Ua faalogo i latou uma ua i le sunako i nei mea, ona lilivau ai lea o i latou.

²⁹Ua latou tutū mai, ma tuli ia te ia i tua o le aai, ua ta‘ita‘i foi ia te ia i le tofē o le mauga ua tu ai la latou aai, ina ia latou faatito ifo ia te ia.

³⁰A ua savali ane ia i o latou va, ua maliu ese.

³¹Ona maliu ifo lea o ia i Kapanaumi, o le aai o Kalilaia; ua a‘oa‘o o ia ia te i latou i sapati.

³²Ua matuā ofo i latou i lana mataupu; auā o lana fetalaiga ua i ai le pule.

³³Sa i le sunako o le tagata ua i ai le agaga o le temoni leaga; ua alaga mai foi o ia, ua leo tele,

³⁴ua faapea mai, Aue! Iesu e, le Nasareta, se a ea lau na ia te i matou? Ua e maliu mai ea ia fanoia i matou? Ua ou iloa oe, o le Paia oe o le Atua.

³⁵Ona vavao lea o Iesu ia te ia, ua faapea atu, Ina faalologo ia, ma ē alu i fafo nai ia te ia. Ona lafo i lalo lea o le temoni ia te ia i o latou uma; ona alu lea i fafo ia te ia, ua le afaina lava ia.

³⁶Ona ofo lea o i latou uma, ua fetautalatala‘i foi, ua faapea ane, O le a lenei mataupu? auā o le pule ma le mana ua fetalai atu ai o ia i agaga leaga, ona latou o ese lea i fafo.

³⁷Ona logo atu lava lea o le tala ia te ia i mea uma o lea itu.

³⁸Ua tuua e ia le sunako, a e ulu atu i le fale o Simona. Ua maua le tinā o le avā a Simona e le ma‘i vevela, ua tele; ua latou faatoga atu ia te ia mo ia.

³⁹Ona tu lea o ia i ona tafatafa, ua vavao le ma‘i vevela, ona mavae ai lea; ona tulai loa lea o ia, ua auauna ia te i latou.

⁴⁰O i latou uma sa i ai tagata e mamai i ma‘i eseese, ua latou aumaia i latou ia te ia i le goto o le la; ua pa‘ipa‘i tasi atu ona aao ia te i latou, ma faamalolo ia te i latou.

⁴¹Ua o atu foi temoni i fafo i e toatele, o alalaga, ua faapea mai, O oe lava le Keriso, le Alo o le Atua. Ona vavao lea o ia ia te i latou, ua ia le mafai ona latou tautala; auā ua latou iloa o ia o le Keriso.

⁴²Ua ao, ona ulufafo lea o ia, ua maliu atu i le mea tuufua; ua saili foi ia te ia le motu o tagata, ona o mai ai lea ia te ia, ma taofi ia te ia, ina ia le maliu ese o ia ia te i latou.

⁴³A ua fetalai atu ia ia te i latou, E tatau ona ou folafola le tala lelei o le malo o le Atua i nisi aai foi; auā o le mea lea na auina mai ai a‘u.

⁴⁴Ona tala‘i atu lea o ia i sunako o Kalilaia.