Read Samoan Old Version Bible – O LE TUSI PAIA LUKA, 6 Bible Online

LUKA, 6 - Samoan Old Version Bible – O LE TUSI PAIA bible

LUKA, 6

¹O le sapati e tuaoi ma le aso muamua, ua savali ai o ia i tosaito; ona ooti ai lea e ona soo o ‘au saito, ua mili ai i o latou lima, ma aai ai.

²Ona fai mai lea ia te i latou o isi o le au faresaio, Se a le mea tou te fai ai le mea e sa ona fai i le sapati?

³Ua tali atu Iesu, ua faapea atu ia te i latou, E lei faitau ea e outou le mea ua faia e Tavita, ina ua fia ‘ai o ia, atoa ma lana au malaga;

⁴ina ua ulu atu ia i le fale o le Atua, ma ua talia areto e laulauina i luma, ua ‘ai ai, ma avane i lana au malaga, e sa ona ‘ai ai, ua na o le au faitaulaga lava?

⁵Ua fetalai atu foi o ia ia te i latou, O le Atalii o le tagata, o le Alii lea o le sapati.

⁶O le tasi sapati foi ua ulu ai o ia i le sunako, ma a‘oa‘o atu; sa i ai le tagata ua gase lona lima taumatau.

⁷Ua lamalama ia te ia le au tusiupu ma le au faresaio, pe faamalolo e ia i le sapati, ina ia latou maua se mea e momoli ai o ia.

⁸A ua silafia e ia lo latou manatunatu, ona fetalai atu lea i le tagata ua gase lona lima, Ina tulai ia, ma tu mai i totonu. Ona tulai loa o ia, ua tu mai.

⁹Ona fetalai atu lea o Iesu ia te i latou, Ou te fesili atu ia te outou i le mea e tasi, Pe tatau ea i le sapati ona agalelei, pe agaleaga? po o le faaola, po o le fasioti?

¹⁰Ua silasila solo o ia ia te i latou uma, ona fetalai atu lea i le tagata, Ina faaloaloa ia lou lima; ona faapea ai lea o ia; ona toe lelei ai lea o lona lima, e pei o le tasi.

¹¹Ona matuā ita ai lea o i latou, ua fetautalatala‘i i se mea latou te faia ia Iesu.

¹²O aso lava ia ua maliu ae ai o ia i le mauga e tatalo; ua aoina lana tatalo i le Atua.

¹³Ua ao foi, ona valaau atu lea o ia i ona soo, ua filifilia e ia ni o latou e toasefulu ma le toalua, ua faaigoa foi i latou e ia o aposetolo;

¹⁴o Simona, ua ia faaigoa atu foi ia te ia o Peteru, ma Aneterea lona uso, o Iakopo ma Ioane, o Filipo ma Patolomaio,

¹⁵o Mataio ma Toma, o Iakopo le atalii o Alefaio ma Simona ua igoa ia Selote,

¹⁶o Iuta foi le uso o Iakopo ma Iuta le Sekara, o ia lē faalata.

¹⁷Ua maliu ifo o ia faatasi ma i latou, ona tu lea o ia i le mea laugatasai, ma ona soo e toatele, ma le motu o tagata e toatele, mai Iutaia uma, ma Ierusalema, ma le itu i tai o Turo ma Saitonu, ua latou o mai e faalogologo ia te ia, ma ia faamaloloina o latou ma‘i;

¹⁸o e na tigaina foi i agaga leaga, ua faamaloloina foi i latou.

¹⁹Ua tausisi le motu o tagata uma e pa‘i atu ia te ia; auā ua alu ane le mana nai ia te ia, ua faamaloloina ai i latou uma.

²⁰Ua silasila atu ia i ona soo, ma fetalai atu, Amuia outou e matitiva; auā e o outou le malo o le Atua.

²¹Amuia outou e fia aai nei; auā e maoona outou. Amuia outou e tagi nei; aua e featani outou.

²²Amuia outou pe a itagia outou e tagata, pe a faateaeseina foi outou, ma faaleagaina e i latou, ma lafoaiina lo outou igoa, pei o se mea leaga, ona o le Atalii o le tagata.

²³Ia outou olioli i lea aso, ma ia outou osooso ma le fiafia; auā faauta, o i le lagi lo outou taui ua tele; auā sa faapea ona fai e o latou tamā i perofeta.

²⁴A e peitai oi talofa ia te outou o e mauoa! auā ua outou maua lo outou lelei.

²⁵Oi talofa ia te outou e ua maoona! auā e fia aai outou. Oi talofa ia te outou o e featani nei! auā e faanoanoa outou, ma fetagisi.

²⁶Oi talofa ia te outou pe a tautala lelei tagata uma ia te outou! auā sa faapea lava ona fai e o latou tamā i perofeta pepelo.

²⁷A ou te fai atu ia te outou o e faalogo mai. Ia alofa atu i e o fai outou mo latou fili: ia agalelei atu i e ita mai ia te outou,

²⁸ia outou faamanuia atu i e fetuu mai ia te outou, ia outou tatalo foi mo e tuua‘i fua mai ia te outou;

²⁹o lē po ia te oe i le tasi alafau, ina liliu atu i ai le tasi; o lē ave ese lou ofu tele, aua e te vaoia atu foi lou ofu tino.

³⁰Ina avatu ia i tagata uma o e ole mai ia te oe; o lē fao i au mea, aua e te toe aamiina atu.

³¹Pei ona outou loto i tagata ona ia latou faia ia te outou, ia faapea lava ona outou faia ia te i latou.

³²Pe afai tou te alofa atu i e alolofa mai ia te outou, pe se a ea se faafetai ia te outou i lea mea? auā ua alolofa atu ē agasala i e alolofa mai ia te i latou.

³³Pe afai foi tou te agalelei atu i e agalelei mai ia te outou, se a ea se faafetai ia te outou i lea mea? auā ua faia lea lava mea e ua agasala.

³⁴Pe afai tou te avatu tupe i e nono mai, ma outou faamoemoe i ai e toe maua mai ai, se a ea se faafetai ia te outou i lea mea? auā e avatu e tagata agasala tupe e nonoina e tagata agasala ina ia latou maua mai sona faatusa.

³⁵Peitai outou, ia outou alolofa atu i e o fai outou mo latou fili, ma ia agalelei atu, ma ia avatu tupe e nonoina, aua le faamoemoe i se mea e tasi e au mai; e tele ai so outou totogi, e avea foi outou ma fanau a le Silisili ese; auā o ia le agamalu i e agavale, atoa ma e amio leaga.

³⁶O lenei, ia mutimuti vale lo outou alofa, pei ona alofa mutimuti vale o lo outou Tamā.

³⁷Aua tou te faamasino atu, ona le faamasinoina mai ai lea o outou; aua tou te faasala, ona le faasalaina mai ai lea o outou; ia outou faamagaloina atu, e faamagaloina mai ai outou.

³⁸Ia outou foai atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi ma luluina, e tumu ma solo i tua. Auā o le fua tou te fuaina atu ai, e fuaina mai ai ia te outou.

³⁹Ua fetalai atu ia le faataoto ia te i latou, E mafai ea le tauaso ona ta‘ita‘i i le tauaso? la te le pauu uma lava ea i le utu?

⁴⁰E le sili le soo i lona a‘oa‘o, a ua taitasi ma faapei o lona a‘oa‘o o e ua atoatoa ona lelei.

⁴¹Se a le mea e te vaai atu ai i si fasi laau i le mata o lou uso, a e le iloa e oe le utupoto i lou lava mata?

⁴²Pe mafai faapefea ona e fai atu i lou uso, Lo‘u uso e, ina tuu mai ia so‘u eu ese le fasi laau i lou mata, a e iloa e oe le utupoto i lou lava mata? O oe na le pepelo, ia e muai tiai le utupoto i lou mata, ona e iloa lelei ai lea e eu ese le fasi laau i le mata o lou uso.

⁴³E leai foi se laau lelei e fua mai i fua leaga; e leai foi se laau leaga e fua mai i fua lelei.

⁴⁴Auā o laau taitasi ma lona lava fua e iloa ai; auā e le tau e tagata fua o le mati i laau tuitui, latou te le tau foi se fuifui vine i le laau talatala.

⁴⁵Ua au mai mea lelei e le tagata amio lelei i mea lelei ua teu i lona loto; o le tagata amio leaga foi ua au mai e ia mea leaga i mea leaga ua teu i lona loto; auā o le tele o mea i le loto e tautala mai ai lona gutu.

⁴⁶Se a ea le mea e ta‘ua ai a‘u e outou, Le Alii e, le Alii e, a e tou te le faia mea ou te fai atu ai?

⁴⁷O sē sau ia te au ma faalogo i a‘u upu, ma faia e ia, ou te faailoa atu ia te outou le ua tusa i ai o ia.

⁴⁸E tusa ia ma le tagata ua fai lona fale, ua ia eli maulalo, ua tuu le faavae i luga o le papa; ona sau ai lea o le tafe, ua fafati mai le vaitafe i lea fale, ua le magaoioi ai lava; auā ua faavaeina i luga o le papa.

⁴⁹A o lē faalogo, a e le faia, e tusa ia ma le tagata ua fai lona fale i luga o le eleele, e leai sona faavae; ua fafati mai i ai le vaitafe, ona paū loa lea, ona matuā nutipalaina lea o lea fale.