Read Samoan Old Version Bible – O LE TUSI PAIA LUKA, 8 Bible Online

LUKA, 8 - Samoan Old Version Bible – O LE TUSI PAIA bible

LUKA, 8

¹Mulimuli ane ua faataamilo o ia i aai ma faoa aai, ua tala‘i ma folafola le tala lelei o le malo o le Atua; ua faatasi foi ma ia le toasefulu ma le toalua,

²atoa ma nisi fafine sa i ai agaga leaga ma ma‘i, a ua faamaloloina; o Maria ua ta‘ua o le Makatala, na ō i fafo ia te ia temoni e toafitu,

³ma Ioana le avā a Kusa le auauna pule lea a Herota, ma Susana; atoa ma isi fafine e toatele, e na auauna atu ia te ia i a latou mea.

⁴Ua faapotopotoina mai le motu o tagata e toatele, ua o mai ia te ia mai lea aai ma lea aai, ona fetalai atu lea o ia le faataoto.

⁵Ua alu atu le tagata lulu saito e lulu ai ana saito; ua ia lulu saito, ua paū ai isi i le auala; ona solia lea, ua ‘aina foi e manu felelei.

⁶Ua paū isi i le mea papa; ua tupu, ona magumagu ai lea, auā e le su.

⁷A ua paū isi i le vao tuitui; ua tutupu faatasi ia ma le vao tuitui, ona fetinaiina ai lea.

⁸Ua paū foi isi i le eleele lelei; ua tupu, ua fua mai taiselau i fua. Ua fetalai atu ia i nei mea, ona alaga atu lea, O le ua i ai taliga e faalogo ai, ina faalogo mai ia o ia.

⁹A ua fesili mai ona soo ia te ia, ua faapea mai, Se a ea le faataoto nei?

¹⁰Ona fetalai atu lea o ia, Ua foaiina atu ia te outou ina ia outou iloa mea lilo a le malo o le Atua; a ua fai atu i nisi i faataoto; ina ia latou le vaai i lo latou vaai, ina ia le lagona foi i lo latou faalogo.

¹¹O le faataoto lenei, O le saito, o le afioga lea a le Atua.

¹²O e i le auala, o e faalogo ia; ona alu ane ai lea o le tiapolo, ma aveeseina le upu nai o latou loto, ne‘i faatuatua ma faaolaina i latou.

¹³O e i le mea papa, o i latou ia, pe a faalogo i le upu, ua talia ma le fiafia; a e leai ni o latou aa, ua faaletumau lo latou faatuatua, ua oo atu i aso e faaosoosoina ai, ona o ese ai lea.

¹⁴O le mea na paū i le vao tuitui, o i latou ia e ua faalogo, ua o atu ai, ona fetinaiina ai lea i mea e popole ai, ma oloa, ma mea faafiafia o le olaga nei, ona le oo lea ina matua o latou fua.

¹⁵Peitai o le mea na i le eleele lelei, o i latou ia e ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai.

¹⁶E leai se tagata na te tŭtŭ se lamepa, ma ufiufi ai i le tanoa, pe tuu i lalo o le moega; a e tuu i luga o le tuugālamepa, ina ia iloa atu le malamalama e i latou ua ulufale mai.

¹⁷Auā e leai se mea lilo e le faaalia; e leai foi se mea natia e le faailoa, a e iu ina faaalia.

¹⁸O lenei, ia outou, pe faapefea lo outou faalogo; auā o se ua i ai mea, e foaiina mai ia te ia; a o se ua le i ai mea, e aveeseina ia te ia o mea ua peiseai ua ia te ia.

¹⁹Ua o mai ia te ia lona tinā ma ona uso, a ua le masao mai ia te ia ona o le motu o tagata.

²⁰Ua fai mai nisi ia te ia, ua faapea mai, Ua tutū lou tinā ma ou uso i fafo, ua fia feiloai ma oe.

²¹Ua tali atu ia, ua faapea atu ia te i latou, O e faalogo i le afioga a le Atua, ma latou faia, o lo‘u tinā ma o‘u uso lava ia.

²²Ua maliu ae ia ma ona soo i le tasi aso i le vaa; ua fetalai atu foi o ia ia te i latou, Tatou o ia i le tasi itu vai, ona latou tuuvaa atu lea.

²³Ua alu lo latou vaa, a e tofa o ia, ona to ifo lea o le afā i le vai, ua osofia lo latou vaa, ua tāli goto.

²⁴Ona latou o ane lea ua fafagu ia te ia, ua faapea mai, Le Alii e, le Alii e, o le a matou fano. Ona tu lea o ia, ua vavao i le matagi ma peau o le vai; ona mavae ai lea, ua malū.

²⁵Ua fetalai atu ia ia te i latou, O ifea ea lo outou faatuatua? Ua matatau lava i latou ma ofo; ua fetautalatala‘i i latou, O ai ea lenei? auā ua fetalai o ia i le matagi ma le vai, ona usiusitai ai lea ia te ia.

²⁶Ua latou oo atu i le laueleele o Katara, o le itu vai lea ua feagai ma Kalilaia.

²⁷Ua maliu ae ia i uta, ona fetaiai lea ma ia o le tasi tagata mai le aai ua leva ona ia te ia o temoni, ua le ofu o ia, ua le nofo foi i se fale, a o tuugamau.

²⁸Ua iloa mai e ia o Iesu, ona alaga mai lea o ia, ma faapaū mai i ona luma, ua fai mai ia te ia ma le leo tele, Se a lau na ia te au nei, Iesu e, o oe na le Alo o le Atua silisili ese? ou te aioi atu ia te oe, aua e te faatiga mai ia te au.

²⁹Auā na fetalai o ia i le agaga leaga e alu i fafo i le tagata. Auā na atu lasi ona pue ia te ia; ua fusifusia o ia i maea uamea, ma mea e faamau a‘i vae ua leoleoina ai o ia, a ua motumotusia maea ia te ia, ona avea ai lea o ia e le temoni i le vao.)

³⁰Ua fesili atu Iesu ia te ia, ua faapea atu, O ai ea lou igoa? Ua fai mai o ia, O Lekeono; auā ua uluitino ia te ia temoni e toatele.

³¹Ua latou aioi mai ia te ia, aua le fetalai o ia ia te i latou e o i le fafā.

³²Sa i ai le lafu puaa e tele, sa tataa i le mauga; ua latou faanoi mai ia te ia ia tuu atu latou te uluitino i ai. Ona tuu atu ai lea ia te i latou.

³³Ona o lea o temoni i fafo nai le tagata, a ua uluitino i puaa; ona feosofi ifo lea o le lafu i le tofē i le vai, ua malelemo ai.

³⁴Ua iloa ē sa faga puaa i le mea ua faia, ona sosola ai lea, ua o atu ua tala atu i le aai ma ona faoa aai.

³⁵Ona latou o mai lea e matamata i le mea ua faia; ua o mai ia Iesu, ua latou iloa atu le tagata ua o i fafo ia te ia temoni, o loo nofo o ia i vae o Iesu; ua ofu ia, ma ua atamai; ona latou matatau ai lea.

³⁶O e na iloa ua latou tala atu ia te i latou le mea na malolo ai le tagata sa uluitinoina.

³⁷Ona aioi mai lea ia te ia o le nuu uma o Katara, ina ia maliu ese o ia ia te i latou; auā ua oo ia te i latou le mata‘u tele; ona maliu ae lea o ia i le vaa, ua toe foi atu.

³⁸Ua aioi mai ia te ia le tagata ua o i fafo ia te ia temoni, la te faatasi ma ia; a ua auina atu ia e Iesu, ua faapea atu,

³⁹Ina foi atu ia oe i lou aiga, ma ia faamatala atu i mea tetele ua faia e le Atua ia te oe. Ona alu ai lea o ia, ua tala‘i i le aai uma i mea tetele na faia e Iesu ia te ia.

⁴⁰Ua toe foi atu Iesu, ona talia ai lea o ia e le motu o tagata; auā sa faatali mai i latou uma ia te ia.

⁴¹Faauta foi, ua sau le tagata e igoa ia Iairo, o ia foi le tasi e pule i le sunako; ua faapaū ia i vae o Iesu, ma faatoga mai ia te ia ia maliu atu o ia i lona fale;

⁴²auā o lona afafine e toatasi, po ua sefulu ma le lua ona tausaga, o le a oti ia. Ua maliu atu ia, a ua fetaomi mai ia te ia le motu o tagata.

⁴³O le fafine sa ia te ia le puna toto i tausaga e sefulu ma le lua, ua uma atu ana mea i fomai, a ua le mafai ona malolo i se tasi,

⁴⁴ua alu ane ia i ona tua, ma pa‘i ane i le tuupao o lona ofu; ona utu loa lea o lona puna toto.

⁴⁵Ona fetalai ane lea o Iesu, O ai ea na na pa‘i mai ia te au? Ua faafiti mai tagata uma, ona fai mai lea o Peteru ma i latou sa faatasi ma ia, Le Alii e, ua fetaomi ma fetuleni mai le motu o tagata ia te oe, e te fetalai mai ea, O ai na pa‘i mai ia te au?

⁴⁶Ua fetalai atu Iesu, Na pa‘i mai lava se tasi ia te au; auā ua ou iloa ua alu atu le mana nai ia te au.

⁴⁷Ua iloa e le fafine ua le lilo o ia, ona alu atu lea o ia ma le gatete, ua faapaū mai i ona luma, ma faamatala mai ia te ia i luma o le nuu uma le mea na pa‘i atu ai o ia ia te ia, ma le faamaloloina loa o ia.

⁴⁸Ona fetalai atu lea o ia ia te ia, Lo‘u afafine e, ina faalototele ia oe; ua e ola i lou faatuatua; ina alu ia oe ma le manuia.

⁴⁹Ua sau le tasi mai le fale o le pule i le sunako a o fetalai o ia, ua fai mai ia te ia. Ua oti lou afafine; soia e te faalavelaveina le a‘oa‘o.

⁵⁰Ua faafofoga i ai Iesu, ona tali atu lea o ia ia te ia, ua faapea atu, Aua e te fefe; tau ina e faatuatua, e ola ai o ia.

⁵¹Ua ulu atu ia i le fale, e le mafai ia te ia ona ulu atu se tasi, tau o Peteru, ma Iakopo, ma Ioane, o le tamā foi ma le tinā o le teine.

⁵²Ua fetagisi i latou uma, ma tagitu‘i ona o ia; a ua fetalai atu ia, Soia le fetagisi; e lei oti o ia, a ua moe.

⁵³Ua latou tapisa ia te ia, auā ua latou iloa ua oti o ia.

⁵⁴A o ia, ua na tulia i latou uma i fafo, ona tago atu lea o ia i lona lima, ua valaau, ua faapea atu, Funa e, ina tulai ia.

⁵⁵Ua toe foi mai lona agaga, ona tulai loa lea o ia; ua fetalai atu foi o ia, ia avatu ni ana mea e ‘ai.

⁵⁶Ona matuā ofo ai lea o ona mātua; a ua vavao o ia ia te i laua, aua ne‘i tala atu i se tasi le mea ua faia.