Read Samoan Old Version Bible – O LE TUSI PAIA LUKA, 9 Bible Online

LUKA, 9 - Samoan Old Version Bible – O LE TUSI PAIA bible

LUKA, 9

¹Ua faapotopotoina e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma‘i.

²Ua aauina atu i latou e ia e tala‘i i le malo o le Atua, e faamalolo foi i e mamai.

³Ua fetalai atu foi o ia ia te i latou, Aua tou te ave se mea i le malaga, po o tootoo, po o se taga, po o mea e ‘ai, po o se tupe, aua foi ne‘i tailua ofu tino.

⁴O se fale foi tou te ulu atu i ai, ia nonofo ai i le tou o ai lava.

⁵Ai se lē talia outou, a outou o ese i lea aai, ia tūtū atu le eleele i o outou vae, e fai ma molimau ia te i latou.

⁶Ua latou o atu, ona faataamilo ai lea i lea aai ma lea aai e folafola le tala lelei, ma faamalolo i ma‘i i mea uma.

⁷Ua faalogo le tupu o Herota i mea uma ua faia e ia, ona fememeai lea o ia, ina ua fai mai nisi, Ua tu mai Ioane i e ua oti; a o isi,

⁸Ua faaali mai Elia; a o isi. Ua toe tu mai le tasi o le au perofeta anamua.

⁹A ua fai ane Herota, Na ou vavaeeseina le ulu o Ioane; a o ai lenei ua ou faalogo ai i mea faapena? Ua manao o ia i le fia vaai ia te ia.

¹⁰Ua toe foi mai le au aposetolo, ma faamatala mai ia te ia mea uma ua latou faia; ona ave lea o ia ia te i latou, ua ō na o i latou i se mea gaogao o le nuu, o Petesaita le igoa.

¹¹Ua iloa e le motu o tagata, ona latou mulimuli atu lea ia te ia; ona talia lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina.

¹²Ua taugagaifo le la, ona o mai lea ia te ia o le toasefulu ma le toalua, ua fai mai. Ia e tuuina atu le motu o tagata, ina ia latou o atu i aai ma faoa aai ua latalata mai, e api ai, ma maua ai mea e ‘ai; auā o le mea gaogao ua tatou i ai nei.

¹³A ua fetalai atu ia ia te i latou, Ia outou avane ni mea e ‘ai mā latou. Ona latou fai mai lea, E leai ni a tatou mea, na o areto e lima gafua, ma i‘a e lua lau; se‘i iloga matou te o e faatau ni mea e ‘ai mā lenei nuu uma.

¹⁴Auā o i latou pe toalima gaafe o tane. Ua fetalai atu ia i ona soo, Ia outou fai atu ia te i latou ia taooto i vasega, e taitoalimagafulu.

¹⁵Ua latou faapea lava ona fai, ma fai atu ia te i latou uma ia taooto i lalo.

¹⁶Ona tago ai lea o ia i areto e lima gafua, ma i‘a e lua lau, ua tepa ae i le lagi, ua faafetai, ma tofitofi, ua avatu i ona soo, latou te laulau atu ai i le motu o tagata.

¹⁷Ua latou aai, ua maoona uma lava; ona fu‘e lea o a latou toe ‘aiga, ua tumu ato e sefulu ma le lua i fāsi mea.

¹⁸Ua tatalo toatasi o ia; sa faatasi ma ia ona soo; ona fesili atu lea o ia ia te i latou, ua faapea atu, Se a le upu a tagata ia te au po o ai?

¹⁹Ua latou tali mai, ua faapea mai, O Ioane le papatiso; a o isi, o Elia; a o isi, Ua toe tu mai le tasi o le au perofeta anamua.

²⁰Ua fetalai atu ia ia te i latou, A o outou na, se a la outou upu ia te au nei po o ai? Ona tali mai lea o Peteru, ua faapea mai, O oe o le Keriso o le Atua.

²¹Ona vavao atu lea o ia ia te i latou, ua fetalai atu, ne‘i ta‘uta‘ua lea mea i se tasi; ua faapea atu,

²²E tatau ona tiga le Atalii o le tagata i mea e tele, ma ia lafoaiina e toeaina, ma faitaulaga sili, ma le au tusiupu, ia fasiotia foi; e faatuina foi o ia i le aso tolu.

²³Ua fetalai atu ia i tagata uma, A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au.

²⁴Auā ai sē fia faasaogalemuina lona ola, e māumau ai ia te ia; a o lē faamāumau i lona ola ona o a‘u, e faasaoina e ia.

²⁵Auā se a le aoga i le tagata pe afai na te maua le lalolagi uma, a e faamāumau e ia ia ia, pe lafoaiina?

²⁶Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia.

²⁷E moni, ou te fai atu ia te outou, o loo tutū mai nisi iinei, e le oo ia te i latou le oti, seia latou vaaia le malo o le Atua.

²⁸Ua mavae nei upu, po ua po valu, ona ave lea e ia o Peteru, ma Ioane, ma Iakopo, ua maliu ae i le mauga e tatalo.

²⁹O loo tatalo ia, a ua liua ona fofoga, ua pa‘epa‘e ma pupula tele mai ona ofu.

³⁰Faauta foi, ua tautala ma ia o tagata e toalua, o Mose ma Elia i laua,

³¹o e na faaali mai ma le pupula; ua latou fetautalatala‘i i lona maliu o le a faaiuina i Ierusalema.

³²A ua moe gagase Peteru ma e ua faatasi ma ia; ua latou ala, ona latou iloa lea o lona pupula, ma tagata e toalua e ua tutu faatasi ma ia.

³³Ua oo ina la o ese ia te ia, ona fai mai lea o Peteru ia Iesu, Le Alii e, e lelei ina tatou nonofo iinei; matou te faia foi ni fale apitaga se tolu; mo oe le tasi, mo Mose le tasi, mo Elia foi le tasi; ua le iloa e ia le mea ua ia fai atu ai.

³⁴O loo fai mai ia mea, a e oo mai le ao, ma ufitia i latou; ua latou matatau ina a oo mai le ao.

³⁵Ona oo mai lea o le siufofoga mai le ao, ua faapea mai, O lo‘u Atalii pele lena; ia outou faalogo ia te ia.

³⁶Ua mavae atu le siufofoga, ona iloa mai lea na o Iesu. Latou te lei gagana lava, e lei ta‘u atu foi i se tasi i ia ona aso se mea e tasi o mea ua latou vaai i ai.

³⁷O le taeao ua latou o ifo ai i le mauga, ona fetaiai lea ma ia o le motu o tagata e toatele.

³⁸Faauta foi, ua alaga mai le tasi mai le motu o tagata, ua faapea mai, Le a‘oa‘o e, ou te aioi atu ia te oe, e te silasila mai i lo‘u atalii; auā o ia lo‘u atalii toatasi.

³⁹Faauta foi, ua pue ia te ia e le agaga, ona alaga loa lea, ma faataafiti ia te ia, ma ua fāuā lona gutu, ua tu‘i fulifuli ia te ia, toe ina le alu ese ia te ia.

⁴⁰Na ou aioi atu foi i ou soo ia latou tuli ia te ia i fafo; a ua le mafai lava ia te i latou.

⁴¹Ua tali atu Iesu, ua faapea atu, Le tupulaga lē faatuatua ma le faapiopio, ou te i ai ia te outou, ma onosai ia te outou seia afea? Ina au mai ia lou atalii iinei.

⁴²O loo sau ia, a e lafotu ma faataafiti ia te ia e le temoni. Ona vavao lea e Iesu i le agaga leaga, ma ua faamalolo i le tama, ma toe tuu atu ia te ia i lona tamā.

⁴³Ua latou matuā ofo uma i le vavega o le Atua. O loo ofo i latou uma i mea uma na faia e Iesu, ona fetalai atu lea o ia i ona soo,

⁴⁴Ia outou matuā faalogologo i nei upu, auā o le a tuuina atu le Atalii o le tagata i lima o tagata.

⁴⁵A ua le iloa e i latou lea upu, ua lilo ia te i latou, o lea na latou le lagona ai lea mea; ua latou matatau foi e fesili ia te ia i lea upu.

⁴⁶Ua tupu le finauga ia te i latou, po o ai so latou e sili.

⁴⁷Ua silafia e Iesu le manatu o latou loto, ona tago lea o ia i le tama itiiti, ma faatu ia te ia i ona tafatafa.

⁴⁸Ua fetalai atu o ia ia te i latou, Ai sē talia lenei tama itiiti i lo‘u igoa, ua talia a‘u e ia; ai sē talia foi a‘u, ua talia e ia le na auina mai a‘u; auā o le aupito itiiti ia te outou uma, e sili lava ia.

⁴⁹Ona fai mai lea o Ioane, ua faapea mai, Le Alii e, na matou iloa le tasi na ia tulia temoni i lou suafa; ona matou vavao lea ia te ia, auā ua ia le mulimuli mai ia te i tatou.

⁵⁰Ona fetalai atu lea o Iesu ia te ia, Aua tou te vaoia; auā o le lē ‘au ese ia te i tatou, e ‘au faatasi lea ma i tatou.

⁵¹Ua oo atu i ona po e siitia ai o ia, ona matuā faasaga atu lea o ia a maliu atu i Ierusalema;

⁵²ua aauina atu e ia nisi e muamua atu i le feau; ua latou o atu ma afe i le tasi aai o Samaria e sauni ai mo ia.

⁵³A ua le talia o ia e i latou, auā ua faasaga atu lana malaga i Ierusalema.

⁵⁴Ua iloa e ona soo o Iakopo ma Ioane, ona la fai mai lea, Le Alii e, pe e te finagalo, ma te fai atu ia alu ifo le afi mai le lagi, ia fano ai i latou, pei ona faia e Elia?

⁵⁵A ua fāliu o ia, ma aoai ia te i laua, ua faapea atu, E le iloa e oulua le uiga o oulua loto;

⁵⁶auā e lei sau le Atalii o le tagata e faaumatia le ola o tagata, a ia faaolaina. Ona latou o atu lea i le tasi aai.

⁵⁷Ua latou o i le ala, ona fai mai lea o le tasi ia te ia, Le Alii e, ou te mulimuli atu ia te oe i mea uma e te maliu atu i ai.

⁵⁸Ona fetalai atu ai lea o Iesu ia te ia, E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.

⁵⁹Ua fetalai atu ia i le tasi, Ina mulimuli mai ia ia te au. A ua fai mai o ia, Le Alii e, tuu mai ia ia te au, se‘i ou alu e muai tanu i lo‘u tamā.

⁶⁰A ua fetalai atu Iesu ia te ia, Ina tuu pea ia i e ua oti e tanu i o latou tagata oti; a o oe, e te alu ma tala‘i atu le malo o le Atua.

⁶¹Ua fai mai foi le tasi, Le Alii e, ou te mulimuli atu ia te oe; a ia tuu mai ia te au, se‘i ou muai faamavae i lo‘u aiga.

⁶²Ua fetalai atu Iesu ia te ia, O lē tago lona lima i le suotosina, ma tepa i tua, e le tatau ia i le malo o le Atua.