Read Samoan Old Version Bible – O LE TUSI PAIA TEUTERONOME, 10 Bible Online

TEUTERONOME, 10 - Samoan Old Version Bible – O LE TUSI PAIA bible

TEUTERONOME, 10

¹O ona po ia na fetalai mai ai Ieova ia te au, Ia e ta mai ni papamaa se lua pei o papa muamua, ma ia e alu ae ia te au i le mauga; ia e faia foi se atolaau.

²Ou te tusi foi i ia papa o upu sa i papa muamua na e nutimomoia, e te tuu ai foi i le atolaau.

³Ona ou faia lea o le atolaau i le laau o le setima, na ou ta foi o papamaa e lua pei o papa muamua, ona ou alu ae ai lea i le mauga, na i ai foi papa e lua i lo‘u lima.

⁴Ona tusi lea e ia i papa pei o upu na muai tusia, o upu e sefulu na fetalai mai ai Ieova ia te outou i le mauga, mai totonu o le afi, i le aso na fai ai le faapotopotoga, ona au mai ai lea e Ieova ia te au.

⁵Ona ou liliu lea, ma ou alu ifo nai le mauga, ua ou tuu foi papa i le atolaau na ou faia, o loo i ai lava, faapei ona poloai mai ai o Ieova ia te au.

⁶Ona o atu ai lea o le fanauga a Isaraelu nai Perota o i Peneakana i Mosera; ua oti ai Arona, ua tanumia ai foi; ona fai ai lea ma ositaulaga o Eleasaro lona atalii e sui a‘i o ia.

⁷Ua latou o atu i lea mea i Kikata, na o atu foi na Kikata i Iatepata, o le nuu lea o vaitafe.

⁸O ona poi a na vavaeeseina ai e Ieova o le itu aiga o Levi, ia latou tauave le atolaau o le feagaiga a Ieova, ia latou tutū i luma o Ieova ia auauna ia te ia, ma ia latou faamanuia atu i tagata i lona suafa, ua oo mai i le aso nei.

⁹O le mea lea e le maua ai e Levi se fanua po o se tofi faatasi ma ona uso; o Ieova o lona tofi ia, faapei ona fetalai mai ai o Ieova lou Atua ia te ia.

¹⁰Na ou i ai pea i le mauga i ao e fagafulu ma po e fagafulu, pei o ona aso muamua; na faafofoga mai Ieova ia te au i ona po ia foi, i le ua le finagalo Ieova e faauma ia te oe.

¹¹Ona fetalai mai lea o Ieova ia te au, Tu ia i luga, ina e alu ia e muamua i le nuu, ia latou oo atu, ma ia fai mo latou le nuu na ou tauto ai i o latou tamā e foai atu ia te i latou.

¹²O lenei, Isaraelu e, se a se mea e finagalo i ai Ieova lou Atua ia te oe, na ona ia e mata‘u ia Ieova lou Atua, ina ia e savali i ona ala uma lava, ma ia e alofa atu ia te ia, ma ia e auauna ia Ieova lou Atua ma lou loto atoa ma lou agaga atoa,

¹³ina ia e tausiusi i poloaiga a Ieova ma ana tulafono ou te fai atu ai ia te oe i le aso nei, ina ia manuia ai oe?

¹⁴Faauta, o ia Ieova lou Atua le lagi ma le lagi o lagi, o le lalolagi foi, ma mea uma lava o i ai.

¹⁵A ua fiafia Ieova i ou tamā, ua alofa ia te i latou, ua ia filifilia foi a latou fanau ina ua mavae atu i latou, o outou lava ia, a e tuua nuu uma, pei ona fai i le aso nei.

¹⁶O lenei, ia outou peritomeina le pa‘u o outou loto, aua ne‘i toe maaa o outou ua.

¹⁷Auā o Ieova lo outou Atua o le Atua o atua ia, o le Alii o alii, o le Atua silisili, e mamana o ia ma le matautia, o le na te le faailogaina tagata,

¹⁸e le talia foi e ia se taui; o le na te faamasinoina mo le ua mātuaoti ma le fafine ua oti lana tane; o le alofa atu i le tagata ese, ua avatu ai ia te ia le mea e ‘ai atoa ma ofu.

¹⁹O lenei foi, ia outou alolofa atu i le tagata ese; auā foi sa tagata ese outou i le nuu o Aikupito.

²⁰Ia e mata‘u ia Ieova lou Atua, ia e auauna ia te ia, ia e pipii foi ia te ia, ma ia e tauto i lona suafa.

²¹O ia lava lē e te viia, o ia foi o lou Atua, o le na faia mo oe nā mea tetele ma le matautia na vaai i ai ou mata.

²²Na o ifo i Aikupito ou tamā na o le toafitugafulu i latou; a o nei ona po ua faatoateleina oe e Ieova lou Atua e pei o fetu o le lagi ona tele.