Read Samoan Old Version Bible – O LE TUSI PAIA TEUTERONOME, 13 Bible Online

TEUTERONOME, 13 - Samoan Old Version Bible – O LE TUSI PAIA bible

TEUTERONOME, 13

¹Afai e tu mai ia te oe se perofeta, po o se faimiti, na te tuu atu foi ia te oe se faailoga po o se vavega,

²a taunuu foi lea faailoga po o lea vavega, na ia fai atu ai ia te oe, o loo faapea, Ina tatou mulimuli atu ia i atua ese, o e na outou le iloa, ma ia tatou auauna i ai;

³aua ne‘i e faalogo i upu a lea perofeta, po o lena faimiti; auā e tofotofoina ai outou e Ieova lo outou Atua, ina ia silafia pe tou te alofa atu ia Ieova lo outou Atua ma o outou loto atoa ma o outou agaga atoa.

⁴Tou te mulimuli atu ia Ieova lo outou Atua, ma outou matatau ia te ia, ma tausiusi i ana poloaiga, tou te faalogo foi i lona siufofoga, ma outou auauna ia te ia, ma pipii atu ia te ia.

⁵A o lena perofeta, po o lena faimiti, e fasiotia o ia; auā ua ia tautala ia tea ese outou ia Ieova lo outou Atua, o le na aumaia outou ai le nuu o Aikupito, ma na laveaiina oe ai le mea sa nofo pologa ai, ina ia tuleia ai oe nai le ala na fetalai mai ai Ieova lou Atua ia e savali i ai. Ona e tuueseina ai lea o le leaga ia te oe.

⁶Afai e faoso lemu ia te oe lou uso, le tama a lou tinā, po o lou atalii, po o lou afafine, po o lau avā pele, po o lau uo e pele ia te oe, o loo faapea mai, Ina tatou o ia, ma auauna i atua ese, na e le iloa, o oe, ma ou tamā;

⁷o atua o nuu e vagavagai ai outou, po o e felatai ma oe, po o e vava mamao ma oe, e gata mai i le tasi itu lalolagi e oo atu i le tasi itu lalolagi;

⁸aua e te gauai ia te ia, aua foi e te faalogo ia te ia; aua ne‘i e alofa ia te ia, aua ne‘i e faasao ia te ia, aua foi ne‘i e ufiufi ia te ia;

⁹a ia e matuā fasioti ia te ia; ia muamua ona oo o lou lima ia te ia e fasioti ia te ia, a e mulimuli ona oo o lima o le nuu uma lava.

¹⁰Ia e fetogi ia te ia i maa seia oti, auā na ia saili e faateaina oe ia Ieova lou Atua, o le na aumaia oe ai le nuu o Aikupito, o le mea sa nofo pologa ai.

¹¹E faalogologo ai foi Isaraelu uma lava, ma matatau ai, ma latou le toe faia se mea leaga faapena i o outou nuu.

¹²Afai e te faalogo ane i se upu i se tasi o au aai, e foaiina mai e Ieova lou Atua ia te oe e nofo ai, o loo faapea mai,

¹³Ua o atu tagata, o tagata ulavavale, ai lo outou nuu, ua latou faateaina e ua nonofo i lo latou aai, o loo faapea ane, Ina tatou o ia, ma tatou auauna i atua ese, na outou le iloa;

¹⁴ona e sailiili lea, ma e suesue, ma e matuā fesili atu; faauta foi, afai ua moni le tala, ua mautinoa le mea, ua faia lava lena mea inosia ia te outou;

¹⁵ia e matuā fasia o e ua nonofo i lea aai i le pelu, ia e faaumatia ai lava i le pelu o mea uma lava o i ai, atoa ma manu o i ai.

¹⁶O le oloa uma foi ua i ai ia e faapotopotoina i totonu o lona malae; e te susunu foi i le afi o le aai, atoa ma le oloa uma ua i ai, ia uma lava ia Ieova lou Atua; e fai foi ia ma faupuegāmaa e faavavau lava; e le toe faia lava.

¹⁷Aua ne‘i tago atu lou lima i se tasi o ia mea ua faatoina; ina ia liliu ese Ieova i le tele o lona toasa, ma alofa atu ia te oe, ma faapelepele ia te oe, ma ia faatoateleina oe, e pei ona ia tauto ai i ou tamā;

¹⁸pe a e faalogo i le siufofoga o Ieova lou Atua, ia tausi i ana poloaiga uma, ou te fai atu ai ia te oe i le aso nei, ina ia e fai le mea tonu i luma o Ieova lou Atua.