Read Samoan Old Version Bible – O LE TUSI PAIA TEUTERONOME, 15 Bible Online

TEUTERONOME, 15 - Samoan Old Version Bible – O LE TUSI PAIA bible

TEUTERONOME, 15

¹A oo i le tausaga e fitu e te fai ai se faasaolotoga.

²O le uiga foi o le faasaolotoga lenei; e taitasi le tagata e avatu mea ua aitalafu mai ai lē la te tuaoi na te tuu fua atu i ai; aua ne‘i faau atu o ia, ia toe au mai e lē la te tuaoi, po o lona uso; auā e ta‘ua lea o le faasaolotoga a Ieova.

³O se tagata ese e te faau i ai, a o lau mea ua i lou uso e te tuu fua atu i ai;

⁴ina ia leai se tagata ia te oe e mativa; auā e matuā faamanuia e Ieova le nuu ua foaiina mai e Ieova lou Atua ia te oe e fai mou tofi e te maua lava;

⁵afai lava e te matuā faalogo i le siufofoga o Ieova lou Atua, ia e anaana e fai i nei poloaiga uma lava ou te fai atu ai ia te oe i le aso nei.

⁶Auā ua faamanuia oe e Ieova lou Atua, e pei ona ia fetalai mai ai ia te oe; e te avatu foi mea i nuu e tele, a e te le nono atu; e te pule foi i nuu e tele, a e le pule mai i latou ia te oe.

⁷Afai e ia te oe se tagata mativa o sou uso o i ai i se tasi o au aai i lou nuu ua foaiina mai e Ieova lou Atua ia te oe, aua ne‘i e faamaaa atu lou loto, pe uu mau lou lima i lou uso mativa;

⁸a ia e matuā faamafola atu lou lima ia te ia, ma e matuā avatu lava i ai o mea ia tusa ma lona mativa, ua mativa ai o ia.

⁹Ia oe, ne‘i ai se upu i lou loto leaga, o loo faapea ifo, Ua lata mai lona fitu o tausaga, o le tausaga o le faasaolotoga lea; ona e mataoge lea i lou uso mativa, ma e le avatu ia te ia sina mea, ona valaau ai lea o ia ia Ieova ona o oe, ona fai ai lea ia te oe ma agasala.

¹⁰E te matuā avatu lava ia te ia, aua foi le avatu ia te ia ma le tiga o lou loto; auā ona o lenei mea o faamanuia ai oe e Ieova lou Atua i au galuega uma, ma mea uma lava e tago i ai ou lima.

¹¹Auā o le aunoa ona i ai i le nuu o le tagata mativa; o le mea lea ou te fai atu ai ia te oe, o loo faapea atu, Ia e matuā faamafola atu lou lima i lou uso, i le ua tigaina, ma le ua mativa e ia te oe i lou nuu.

¹²Afai e faatauina mai ia te oe lou uso, o se Eperu o le tane, po o se Eperu o le fafine, a auauna o ia ia te oe i tausaga e ono; a oo i lona fitu o tausaga e te tuu faasaolotoina atu o ia e oe;.

¹³Pe a e tuu faasaolotoina atu o ia e oe, aua e te tuuina atu o ia ma le leai o sana mea;

¹⁴a ia e matuā foaiina atu ia te ia ni au mamoe, ma ni mea mai le mea e soli ai lau saito, ma lau tuugāuaina; o mea ua faamanuia ai oe e Ieova lou Atua e te foaiina atu ai ia te ia.

¹⁵Ia e manatua foi na fai oe ma auauna i le nuu o Aikupito, na laveaiina foi oe e Ieova lou Atua; o le mea lea ou te fai atu ai lenei mea ia te oe i le aso nei.

¹⁶Pe afai foi e fai mai o ia ia te oe, Ou te le alu ese ia te oe; auā ua alofa o ia ia te oe ma lou aiga, auā foi ua lelei ia te ia ina faatasi ma oe;

¹⁷ona e tago lea i se au, ma tui ai lona taliga i le puipui o le faitotoa, ona avea ai lea o ia ma auauna ia te oe e faavavau. E faapea foi ona e faia i lau auauna fafine.

¹⁸Aua ne‘i faafaigata ia te oe pe a e tuu faasaolotoina atu o ia e oe, auā ua tusa o ia ia te oe ma ni auauna tauia se toalua, i lona auauna ia te oe i tausaga e ono; e faamanuia foi oe e Ieova lou Atua i mea uma lava e te faia.

¹⁹O uluai tama uma lava, o poa e fanau mai i au povi ma au mamoe e te faasaina mo Ieova lou Atua; aua ne‘i ai sau galuega e fai i le uluai tama a lau povi, aua foi e te seleina fulufulu o se uluai tama a au mamoe.

²⁰E te ‘ai ai i luma o Ieova lou Atua i lea tausaga ma lea tausaga i le mea e filifilia e Ieova, o oe atoa ma lou aiga.

²¹Afai foi o i ai se mea e pona ai, e pipili, pe tauaso, po o se mea e ponā ua leaga, aua lava e te faitaulaga ai ia Ieova lou Atua.

²²E te ‘ai ai i lau aai; o le ua leaga ma le ua mamā la te aai ai, e pei o le sevi ma le aila.

²³A o le toto, aua e te ‘ai ai; e te sasaaina lea i le eleele e pei o le suāvai.