Read Samoan Old Version Bible – O LE TUSI PAIA TEUTERONOME, 17 Bible Online

TEUTERONOME, 17 - Samoan Old Version Bible – O LE TUSI PAIA bible

TEUTERONOME, 17

¹Aua e te fai taulaga ia Ieova lou Atua i se povi po o se mamoe ua i ai se mea e ponā, po o se tasi mea leaga; auā o le mea lea e inosia e Ieova lou Atua.

²Afai ua iloa o ia te oe, i se tasi o au aai ua foaiina mai e Ieova lou Atua ia te oe, o se tane po o se fafine, ua na faia se mea leaga i luma o Ieova lou Atua, e soli ai lana feagaiga;

³po ua alu o ia ma auauna i atua ese, ma ifo i ai, o le la, po o le masina, po o se tasi i ‘au o le lagi, ua ou le poloai atu ai;

⁴ona ta‘u mai ai lea ia te oe, ma e faalogo ai, ma e matuā sue atu ai; faauta foi, ua moni ua mautinoa le mea, ua faia lava lena mea inosia i Isaraelu;

⁵ona e aveina atu lea i ou faitotoa o lea tane po o lea fafine ua na faia lena mea leaga, ma ia e fetogi i maa o lea tane po o lea fafine, ia oti.

⁶O mau a e molimau e toalua, po o molimau e toatolu, o le ua tatau i ai le oti ia fasiotia ai o ia; o le mau a le molimau e toatasi aua le fasiotia ai o ia.

⁷Ia muamua ona oo o lima o e molimau ia te ia e fasioti ai; a e mulimuli ane o lima o le nuu uma lava. Ona e tuueseina ai lea o le leaga ia te oe.

⁸Afai foi e faigata ia te oe se mea e faamasino ai i le toto ma le toto, o le mea e faamasinoina ma le mea e faamasinoina, o le ta ma le ta, o mea e fefinaua‘i ai i au aai; ona e tulai lea, ma e alu ae i le mea e filifilia e Ieova lou Atua mona;

⁹e te alu foi i faitaulaga, o sa Levī, ma le faamasino e i ai i ia ona po, e te fesili foi i ai; ona latou faailoa mai lea ia te oe le tonu o le mea e faamasinoina;

¹⁰ona e faia lea o le mea e pei ona latou faailoa mai ia te oe i lea mea e filifilia e Ieova; ia e anaana foi e fai e tusa ma mea uma lava latou te a‘oa‘o mai ai ia te oe;

¹¹e tusa ma le tuulafono latou te a‘oa‘o mai ai ia te oe, e tusa foi ma le faamasinoga latou te fai mai ai ia te oe, ia e faia lava; aua ne‘i e alu ese i le upu latou te faailoa mai ai ia te oe, i le itu taumatau, po o le itu tauagavale.

¹²O le tagata foi na te faia se mea ma le faamaualuga, ma le le fia faalogo i le faitaulaga e tu i lea mea e auauna ia Ieova lou Atua, po o le faamasino, ia oti lava lea tagata; ona e tuueseina ai lea o le leaga ia Isaraelu.

¹³Ona faalogo ai lea o le nuu uma lava, ma matatau ai, ma latou le toe faamaualuga.

¹⁴Pe a e oo atu foi i le nuu e foaiina mai e Ieova lou Atua ia te oe, ma e fai mou, ma e mau ai, ma e faapea ane, Ou te faia se tupu mo‘u, e pei o nuu uma lava e vagavagai mai ia te au;

¹⁵ia e matuā tofia mo oe se tupu e filifilia e Ieova lou Atua; o sou uso e te tofia e fai ma tupu ia te oe; e le mafai ona e tofia mo oe se tagata ese, e le o sou uso ia.

¹⁶A e aua lava ne‘i faateleina e ia solofanua mona, pe toe faafoi atu le nuu i Aikupito, ina ia faateleina ai e ia o solofanua; auā ua fetalai mai Ieova ia te outou, Aua tou te toe foi atu i lea lava ala.

¹⁷Aua foi ne‘i faatoateleina e ia o avā māna, ne‘i liliueseina ai lona loto; aua foi ne‘i faateleina naua e ia o ario ma auro mo ia.

¹⁸A oo foi ina nofo o ia i le nofoalii o lona malo, na te tusia māna se tusi o lenei tulafono i se tusi ai lena tusi o i luma o le au faitaulaga o sa Levī;

¹⁹ia i ai foi lea ia te ia, na te faitau ai foi i aso uma lava o lona olaga; ina ia a‘oa‘oina ai o ia ia mata‘u ia Ieova lona Atua, ma ia tausi i upu uma lava a lenei tulafono ma nei sauniga, na te faia;

²⁰ina ne‘i faamaualugaina lona loto i ona uso, ina ne‘i te‘a ese foi i le poloaiga, i le itu taumatau po o le itu tauagavale; ina ia tulu‘i ai ona aso i lona malo, o ia, ma ona atalii, ia Isaraelu.