Read Samoan Old Version Bible – O LE TUSI PAIA TEUTERONOME, 21 Bible Online

TEUTERONOME, 21 - Samoan Old Version Bible – O LE TUSI PAIA bible

TEUTERONOME, 21

¹Afai e maua se tagata ua fasiotia i le laueleele ua foaiina mai e Ieova lou Atua ia te oe e fai mou o loo taatia i le vao, a e le iloa po o ai na na fasi ia te ia;

²ia o atu ou toeaina ma ou faamasino, ma ia latou fuatia atu o va o lē ua fasiotia ma aai e vagavagai;

³o le aai foi e lata i le ua fasiotia ia ave e toeaina o lea aai se povi fafine, ua na le fai se galuega, ua na le toso i le amo;

⁴ia ta‘ita‘iina foi e toeaina o lea aai le povi fafine i se alia e tafe pea, e le galueina e tagata, e le luluina ai foi ni saito, ona latou vaea ai lea le ua o le povi fafine i le alia;

⁵ona faalatalata atu ai lea o faitaulaga, o le fanauga a Levi; auā ua filifilia i latou e Ieova lou Atua e auauna ia te ia, ma faamanuia atu i le suafa Ieova; o a latou upu foi e tonu ai finauga uma ma fasiga uma lava;

⁶o toeaina uma foi o lea aai, ua lata i le ua fasiotia, latou te fafano o latou lima i luga o le povi fafine na vaea lona ua i le alia;

⁷ona latou fai mai lea, e faapea mai, E lei faamaligiina lenei toto e o matou lima, e lei vaai i ai foi o matou mata.

⁸Ieova e, ia e faamagalo mai i lou nuu o Isaraelu, ua e togiolaina; aua foi e te faaee mai i lou nuu o Isaraelu le toto o le ua le sala. Ona faamagaloina ai lea o i latou ai le toto.

⁹Ona e tuueseina ai lea ia te oe o le toto o le ua le sala, pe a e faia le mea tonu i luma o Ieova.

¹⁰A ē alu atu e tau ai le taua ma ou fili, pe a tuuina mai foi i latou ia te oe e Ieova lou Atua, ma e ave i latou o tagata o taua,

¹¹ma e iloa se fafine lalelei i nā tagata o taua, ua e manao foi i ai, ma e ave e fai mau avā;

¹²ona e au mai lea ia te ia i lou fale; ona tafi lea e ia o lona ulu, ma salasala e ia ona atigilima;

¹³ia to ese foi e ia lona ofu faatagata o taua, ma nofo o ia i lou fale, e tagi foi o ia i lona tamā ma lona tinā i le masina atoa; ona e alu ane lea ia te ia, e fai foi oe mana tane, e fai foi o ia mau avā.

¹⁴Afai foi e leai sou fiafia ia te ia, ona e tuuina atu lea o ia ia sa‘o lona loto; a e aua lava ne‘i e faatau ia te ia i tupe, aua foi e te fai o ia ma pologa, auā ua e faasaunoa ia te ia

¹⁵Afai e toalua avā a se tasi tagata, ua fiafia ia i le tasi, a e ‘ino‘ino i le tasi, ma ua la fananau ia te ia o a la tama tane, o le ua ia fiafia i ai ma le ua inosia; afai foi e luai fanau mai le tama a le ua inosia;

¹⁶a oo i le aso na te tofia ai ana mea i ona atalii, e le mafai ona avea ma ulumatua le tama a le ua ia fiafia i ai, a e tuua le tama a le ua inosia, auā o le ulumatua ia;

¹⁷a ia faailogaina lava e ia o le ulumatua o le tama lea a le ua inosia, i lona avatu ia te ia o vaega e lua i mea uma lava ua ia te ia; auā o ia le amataga o lona malosi; e ona le tofi o le ulumatua.

¹⁸Afai e vaogata ma le finauvale le atalii o se tasi tagata, e le faalogo i le upu a lona tamā, po o le upu a lona tinā, pe a uma ona la aoai atu i ai, a e le faalogo lava o ia ia te i laua;

¹⁹ona tago ai lea o lona tamā ma lona tinā ia te ia, ma avatu ia te ia i toeaina o lana aai, i le faitotoa o lana aai;

²⁰ona fai atu lea o i laua i toeaina o lana aai, O la ma tama nei ua vaogata ma le finauvale ia, e lei faalogo lava i a ma upu; o le ‘ai tele foi ia, ma le inu ia onā.

²¹Ona fetogi ai lea o tagata uma o lana aai ia te ia i maa, ia oti o ia; ona e tuueseina ai lea o le leaga ia te oe; e faalogo ai foi Isaraelu uma lava, ma latou matatau ai.

²²Afai foi o se tagata ua na fai se agasala e tatau ona oti ai o ia, a oo ia te ia le oti, ua e faatautau foi ia te ia i se laau;

²³aua ne‘i aoina lona tino i le laau, a ia e tanu lava ia te ia i lea aso; (auā ua faafanoina e le Atua le ua faatautauina;) ina ne‘i leaga ai lou laueleele ua foaiina mai e Ieova lou Atua ia te oe e fai mou tofi.