Read Samoan Old Version Bible – O LE TUSI PAIA TEUTERONOME, 24 Bible Online

TEUTERONOME, 24 - Samoan Old Version Bible – O LE TUSI PAIA bible

TEUTERONOME, 24

¹Afai e fai avā se tasi i se fafine, ua la nonofo, a oo foi ina le toe fiafia o ia i ai, auā ua na iloa ia te ia se mea leaga; ona tusi ai lea e ia se tusi alei ma ia, ma avatu ai ia te ia, ma auina atu o ia ai lona fale.

²Pe a alu ese foi o ia i lona fale, ona alu ai lea o ia ma nofo i se tasi tane;

³afai foi e ‘ino‘ino ia te ia lana tane mulimuli, ma tusi se tusi alei ma ia, ma avatu ai ia te ia, ma auina atu o ia ai lona fale; pe afai foi ua oti le tane mulimuli, na fai avā ia te ia;

⁴e le mafai i lana muai tane, sa na auina o ia, ona toe fai o ia mana avā, ina ua uma ona faaleagaina o ia; auā o le mea inosia lea i luma o Ieova; aua foi ne‘i e faatupuina le agasala i le nuu ua foaiina mai e Ieova lou Atua ia te oe e fai mou tofi.

⁵Afai foi e faatoa fai avā se tasi, aua ne‘i alu o ia i le taua, aua foi ne‘i togia o ia i se feau a le nuu; ia saoloto o ia i lona aiga i le tausaga e tasi, ma faafiafia atu ai i lana avā ua fai.

⁶Aua ne‘i ave faafaatau e se tagata se maaolo i lalo, po o se maaolo i luga; auā e ave ai faafaatau le ola o le tagata.

⁷Afai ua maua se tagata ua gaoi i se tasi o ona uso o le fanauga a Isaraelu, ma fai o ia ma pologa, pe faatauina atu o ia; ia oti lea tagata gaoi; ona e tuueseina ai lea o le leaga ia te oe.

⁸Ia oe i le ma‘i lepela, ia e matuā anaana, ma e faia mea uma lava e pei ona a‘oa‘oina ai outou e le au faitaulaga, o sa Levī; e faapei ona ou fai atu ai ia te i latou, ia outou anaana i ai ia faia.

⁹Ia e manatua le mea na faia e Ieova lou Atua ia Miriama i le ala, ina ua outou o mai ai nai Aikupito.

¹⁰Afai e avatu o oe se mea ua aitalafu mai e lē lua te tuaoi, aua ne‘i e alu i lona fale e au mai ai lana mea ua tuu faafaatau a ia e tu i fafo,

¹¹ona au mai ai lea i fafo ia te oe o le me ua tuu faafaatau e le tagata na e avatu i ai mea ua aitalafu mai.

¹²Afai foi o le tagata mativa o ia, aua e te moegaiina lana mea ua tuu faafaatau;

¹³a ia e toe avatua lava ia te ia le mea ua tuu faafaatau a o lei goto le la, ina ia moe o ia i lona lava ofu, ma faamanu ia te oe; e avea foi lea ma amiotonu ia te oe i luma o Ieova lou Atua.

¹⁴Aua e te faasaua i se auauna tauia ua puapuapatia ma le mativa, o sou uso, po o se āumau ia te oe o i lou nuu i au aai;

¹⁵ia e avatu ia te ia lona totogi i lona lava aso, a o lei goto le la; auā ua mativa o ia, ua naunau foi i ai lona loto; ne‘i valaau o ia ia Ieova ona o oe, ona fai lea ma agasala ia te oe.

¹⁶Aua ne‘i fasiotia le tamā e sui a‘i le atalii, aua foi ne‘i fasiotia le atalii, e sui a‘i le tamā; a ia taitasi le tagata ma fasiotia o ia i lana lava agasala.

¹⁷Aua ne‘i e faapiopioina le faamasinoga i le tagata ese, po o le ua āumatuā; aua foi ne‘i e fai faafaatau le ofu o le fafine ua oti lana tane;

¹⁸a ia e manatua na fai oe ma auauna i Aikupito, a ua laveaiina oe e Ieova lou Atua ai lea mea; o le mea lea ou te fai atu ai ia te oe e faia lenei mea.

¹⁹A ē selesele i lau saito i lou fanua, a ua galo ia te oe se tasi fusi saito i le fanua, aua ne‘i e foi atu e au mai ai; a ia tuu ai mo le tagata ese, ma le ua aumatuā, ma le fafine ua oti lana tane; ina ia faamanuia oe e Ieova lou Atua i mea uma lava e faia e ou lima.

²⁰A ē tautā i lāu olive, aua e te toe suesue ona la; a ia tuu ai mo le tagata ese, ma le ua āumatuā, ma le fafine ua oti lana tane.

²¹A ē tau i fua o lau tovine, aua e te foi faalua e tau mai ai; a ia tuu ai mo le tagata ese, ma le ua āumatuā, ma le fafine ua oti lana tane.

²²E te manatua na fai oe ma auauna i le nuu o Aikupito; o le mea lea ou te fai atu ai ia te oe ia e faia lenei mea.