Read Samoan Old Version Bible – O LE TUSI PAIA TEUTERONOME, 26 Bible Online

TEUTERONOME, 26 - Samoan Old Version Bible – O LE TUSI PAIA bible

TEUTERONOME, 26

¹A ē oo atu foi i le nuu ua foaiina mai e Ieova lou Atua ia te oe e fai mou tofi, a e fai mou lava, ma e nofo ai;

²ona e au mai ai lea o faapolopolo o fua uma lava o le laueleele, e te au mai ai ai lou nuu ua foaiina mai e Ieova lou Atua ia te oe, ma e tuuina ai i se ato, ma e alu atu i le mea e filifilia e Ieova lou Atua e tuu ai lona suafa

³ona e alu atu lea i le faitaulaga e i ai i ia ona po, ma e fai atu ia te ia, Ou te faailo atu i le aso nei ia Ieova lou Atua, ua ou oo mai i le nuu sa tauto ai Ieova i o tatou tamā na te foaiina ia te i tatou.

⁴Ona talia lea e le faitaulaga le ato nai lou lima, ma tuu atu ai i luma o le fata faitaulaga o Ieova lou Atua.

⁵Ona e tautala atu lea, ma faapea atu i luma o Ieova lou Atua, O lo‘u tamā o le Suria ia na fai a oti; ona alu ifo ai lea o ia i Aikupito, na āumau ai foi o ia ma ni nai toaitiiti, ua avea ai foi ma nuu tele, e malolosi, ma le toatele;

⁶ona agaleagaina lea o i tatou e tagata Aikupito, ma latou faatiga mai ia te i tatou, ma latou tuu mai ia te i tatou o galuega mamafa;

⁷ona tatou alalaga atu lea ia Ieova le Atua o tatou tamā, na faafofoga mai foi o Ieova i o tatou leo, ma ua silasila mai i o tatou tiga, ma a tatou galuega mamafa, ma le sauaina o i tatou;

⁸ona aumaia lea o i tatou e Ieova nai Aikupito i le aao malosi, ma le aao faaloaloa, atoa ma mea matautia tele, ma faailoga, ma vavega;

⁹ua faaoo mai foi e ia ia i tatou i lenei mea, ma ua foai mai ia te i tatou lenei nuu, o le nuu o tafe ai le sua susu ma le meli;

¹⁰o lenei foi, Ieova e, faauta mai, ua ou aumaia le faapolopolo o fua o le laueleele, ua e foaiina mai ia te au. Ona e tuuina atu ai lea i luma o Ieova lou Atua, e te ifo atu foi i luma o Ieova lou Atua;

¹¹ia e olioli foi i mea lelei uma lava ua foaiina mai e Ieova lou Atua ia te oe ma lou aiga, o oe, ma lo sa Levī, ma le tagata ese o ia te oe.

¹²Pe a uma ona avatu e oe o mea uma e sefulu a‘i au mea ua maua mai i lona tolu o tausaga, o le tausaga lea e avatu ai mea e sefulu a‘i, ma ua e avatua i lo sa Levī, ma le tagata ese, ma le ua āumatuā, ma le fafine ua oti lana tane, latou te aai ai ma latou maoona ai i au aai;

¹³ona e fai atu lea i luma o Ieova lou Atua, Ua ou aumaia mea paia nai lo‘u fale, ua ou avatua foi i lo sa Levī, ma le tagata ese, ma le ua āumatuā, ma le fafine ua oti lana tane, e tusa ma au poloaiga uma lava ua e poloai mai ai ia te au; ua ou le tuumavaega i au poloaiga, ua le galo foi ia te au;

¹⁴ou te lei ‘ai ai i lo‘u faanoanoa, ou te lei ave sina ia mea i se mea e leaga ou te lei avatu sina ia mea mo e ua oti; ua ou faalogo i le siufofoga o Ieova lo‘u Atua, ua ou faia e tusa ma mea uma lava ua e poloai mai ai ia te au.

¹⁵Ia e silasila mai mai lou afioaga paia, mai le lagi, ma e faamanuia mai i lou nuu o Isaraelu, ma le laueleele ua e foaiina mai ia te i matou, e faapei ona e tauto ai i o matou tamā, o le nuu o tafe ai le suāsusu ma le meli.

¹⁶O le aso nei ua poloai mai ai Ieova lou Atua ia te oe ia e faia nei tulafono ma faamasinoga; ia e tausi foi i ai, ma e faia ma lou loto atoa ma lou agaga atoa

¹⁷Ua e matuā fai mai i le aso nei o Ieova o lou Atua ia; e te savali foi i ona ala, ma e tausi i ana tulafono, ma ana poloaiga, ma ana faamasinoga, ma e faalogo i lona siufofoga;

¹⁸ua matuā fetalai mai foi Ieova i le aso nei e fai oe mona nuu, o le oloa tāua, e pei ona ia fetalaia mai ia te oe, ina ia e tausi foi i ana poloaiga uma lava,

¹⁹ina ia faasilisiliina foi o oe e ia i nuu uma lava na ia faia, i le viiga, ma le ta‘ua, ma le matagofie; ina ia avea foi oe ma nuu paia ia Ieova lou Atua, e pei ona ia fetalaia mai ai.