Read Samoan Old Version Bible – O LE TUSI PAIA TEUTERONOME, 30 Bible Online

TEUTERONOME, 30 - Samoan Old Version Bible – O LE TUSI PAIA bible

TEUTERONOME, 30

¹A oo foi ia te oe o nei mea uma o le manuia ma le malaia, ua ou tuuina atu i ou luma, ma e manatu i ai i nuu uma ua tulia ai oe e Ieova lou Atua,

²ma e toe foi mai ia Ieova lou Atua, o oe ma au fanau, ma lou loto atoa ma lou agaga atoa; ma e faalogo i lona siufofoga i mea uma lava ou te fai atu ai ia te oe i le aso nei;

³ona faaae lea e Ieova lou Atua o lau tafeaga, ma alofa atu ia te oe, ma toe faapotopoto mai ia te oe ai nuu uma ua faataapeapeina ai oe e Ieova lou Atua.

⁴Afai e tulia ni o outou i le tuluiga o le lagi, e faapotopotoina mai ai oe e Ieova lou Atua, na te au mai ai oe;

⁵e faaooina mai foi oe e Ieova lou Atua i le nuu sa fai mou tamā, e fai foi ia mou; na te agalelei foi ia te oe, ma faatoateleina oe ia sili i ou tamā.

⁶E faaperitomeina foi e Ieova lou Atua o lou loto, ma loto o lau fanau, ina ia e alofa atu ia Ieova lou Atua ma lou loto atoa, ma lou agaga atoa, ina ia e ola ai.

⁷E faaee atu foi e Ieova lou Atua o na mala uma i e ita ia te oe, ma e ‘ino‘ino ia te oe, o e faasaua ia te oe;

⁸e te toe foi mai e faalogo i le siufofoga o Ieova, ma e faia ana poloaiga uma ou te fai atu ai ia te oe i le aso nei.

⁹E faateleina foi e Ieova lou Atua ia te oe i mea uma lava e faia i ou lima, o lau fanau, ma fanau a au manu vaefa, ma fua o lou laueleele, ia lelei ai; auā e toe fiafia Ieova ia te oe ina ia lelei ai, e pei ona ia fiafia i ou tamā;

¹⁰pe afai e te faalogo i le siufofoga o Ieova lou Atua, e tausi i ana poloaiga ma ana sauniga ua tusia i le tusi o lenei tulafono; pe afai foi e te foi mai ia Ieova lou Atua ma lou loto atoa, ma lou agaga atoa.

¹¹Auā o lenei poloaiga ou te fai atu ai ia te oe i le aso nei, e le faigata ia te e, oe le mamao foi ia.

¹²E le o i le lagi ia, ina ia e faapea ane, O ai se alu ae i le lagi mo i tatou, e au mai ai ia te i tatou, ina ia tatou falogo i ai, ma ia tatou faia?

¹³E le o i tala atu o le sami ia, ina ia e faapea ane, O ai se sopoia atu le sami mo i tatou, e au mai ai ia te i tatou, ina ia tatou faalogo i ai, ma ia tatou faia?

¹⁴A e matuā lata mai lava le upu ia te oe, o i lou gutu, ma lou loto, ina ia e faia.

¹⁵Faauta mai, ua ou tuuina atu i ou luma i le aso nei o le ola ma le manuia, o le oti foi ma le malaia;

¹⁶i la‘u e fai atu ai ia te oe i le aso nei, ina ia e alofa atu ia Ieova lou Atua, ma e savali i ona ala, ma e tausi i ana poloaiga, ma ana tulafono, ma ana faamasinoga, ina ia e ola ai, ma ia faatoateleina ai; e faamanuia foi Ieova lou Atua ia te oe i le nuu e te alu i ai e fai mou.

¹⁷A e afai e liliu ese lou loto, ma e le faalogo, a e tosina oe, ma e ifo atu i atua ese, ma auauna i ai,

¹⁸ou te faailoa atu ia te outou i le aso nei, e matuā faaumatia outou, e le nofo tulu‘i outou i le laueleele e te sopoia atu ai Ioritana, ma alu i ai e fai mou.

¹⁹Ou te valaau i le lagi ma le lalolagi i le aso nei e fai ma molimau ia te outou, ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau;

²⁰ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia; auā o lou ola ia, ma le na te faafualoaina ou aso; ina ia e mau i le laueleele sa tauto ai Ieova i ou tamā, o Aperaamo, ma Isaako, ma Iakopo, e foaiina atu ia te i latou.