Read Samoan Old Version Bible – O LE TUSI PAIA TEUTERONOME, 4 Bible Online

TEUTERONOME, 4 - Samoan Old Version Bible – O LE TUSI PAIA bible

TEUTERONOME, 4

¹O lenei, Isaraelu e, faalogologo mai ia i tulafono ma faamasinoga ou te a‘oa‘o atu ai ia te outou tou te faia, ina ia outou ola ai, ina ia outou o atu ai foi, ma fai mo outou le nuu ua foaiina atu ia te outou e Ieova le Atua o outou tamā.

²Aua tou te faaopoopo se upu i upu ou te fai atu ai ia te outou, aua foi tou te aveeseina ai se upu; ina ia outou tausiusi i poloaiga a Ieova lo outou Atua ou te fai atu ai ia te outou.

³Ua outou iloa i o outou mata le mea na faia e Ieova ona o Paalapeoro, auā o tagata uma lava na mulimuli atu ia Paalapeoro ua faaumatia i latou nai ia te oe e Ieova lou Atua.

⁴A o outou e na pipii atu ia Ieova lo outou Atua, o loo ola mai outou uma i le aso nei.

⁵Faauta, na ou a‘oa‘o atu ia te outou i tulafono ma faamasinoga e pei ona poloai mai ai ia te au e Ieova lo‘u Atua, ina ia outou faia faapea i le nuu tou te o atu ai e fai mo outou.

⁶O lenei, ia outou tausiusi i ai, ma ia outou faia, auā o le mea lea tou te popoto ai, ma atamamai ai i luma o nuu e faalogologo i nei tulafono uma; ona faapea ane lea, E moni lava o le nuu popoto ma le atamamai lenei nuu mamalu.

⁷Auā o ifea se nuu mamalu ua latalata i ai lo latou atua, e pei o Ieova lo tatou Atua ua latalata mai i mea uma lava ua tatou valaau atu ai ia te ia?

⁸O ifea foi se nuu mamalu e i ai tulafono ma faamasinoga tonu, e pei o lenei tulafono uma ua ou tuuina atu ia te outou i le aso nei?

⁹Tau ina faaeteete oe ia te oe, ma ia e matuā faaeteete lava ia te oe, ne‘i galo ia te oe nei mea na iloa ai e ou mata, ne‘i te‘a ese ai lou loto i aso uma o lou olaga, a ia e faailoa atu i lau fanau, ma le fanau a lau fanau;

¹⁰faailoa atu le aso na e tu ai i luma o Ieova lou Atua i Horepa, ina o fetalai mai Ieova ia te au, Ina faapotopoto mai ia ia te au le nuu, ia latou faalogologo mai i a‘u upu, ina ia a‘oa‘oina ai i latou, ina ia matatau mai ia te au i aso uma lava latou te ola ai i le fogāeleele, ma ia latou a‘oa‘o ai i a latou fanau.

¹¹Ona outou faalatalata atu lea ma tutū i lalo o le mauga, na mu foi le mauga i le afi, ua oo lava i le lagi; sa i ai foi le pouliuli, ma ao, ma le pogasi.

¹²Ona fetalai mai lea o Ieova ia te outou mai totonu o le afi, ua outou faalogologo i le siufofoga, a ua outou le iloa atu se mea e tino a‘i mai, na o le siufofoga lava.

¹³Ua na faaalia foi ia te outou lana feagaiga na ia poloai mai ai ia te outou tou te faia, o upu ia e sefulu; na ia tusi ai foi i luga o papamaa e lua.

¹⁴Na poloai mai foi Ieova ia te au i ia ona po, e a‘oa‘o atu ia te outou i tulafono ma faamasinoga tou te faia i le nuu tou te o atu i ai e fai mo outou.

¹⁵O lenei, ia matuā faaeteete outou ia te outou, auā na outou le iloa lava se mea na tino a‘i mai i le aso na fetalai mai ai Ieova ia te outou i Horepa ai totonu o le afi.

¹⁶Ne‘i leaga outou ia te outou, ma outou faia mo outou se tupua ua ta, o le faatusa o se tupua e tasi, o le faatusa o se tane, po o se fafine;

¹⁷o se faatusa o se tasi manu e tataa, o se faatusa o se manu lele e lele i lugā,

¹⁸o se faatusa o se tasi mea e totolo i le eleele, po o se faatusa o se tasi i‘a o i le sami i lalo o le laueleele;

¹⁹ne‘i tepa ae foi ou mata i le lagi, ma e iloa le la, ma le masina, ma fetu, o ‘au uma o le lagi, ne‘i tosina ai oe e ifo i ai, ma auauna i ai, o mea ia na tofia mai e Ieova lou Atua i nuu uma o le lalolagi.

²⁰Auā na ave outou e Ieova, ma na aumaia outou ai le ogaumu e tunu ai uamea, nai Aikupito lava, ina ia avea ma nuu e fai mona tofi, pei ona fai i le aso nei.

²¹Na toasa mai foi Ieova ia te au ona o a outou upu, ma na tauto ai ou te le sopoia atu Ioritana, ou te le alu atu foi i le nuu lelei, o le a foai atu ia te oe e Ieova lou Atua e fai mou tofi.

²²Auā e oti a‘u i le nuu nei, ou te le sopoia atu Ioritana; a o outou, tou te sopoia atu, ma fai mo outou lena nuu lelei.

²³Ia outou lava, ne‘i galo ia te outou le feagaiga a Ieova lo outou Atua na ia osia ma outou, ona outou fai lea mo outou se tupua ua ta, o le faatusa lava o se mea e tasi ua vaoia mai ai e Ieova lou Atua.

²⁴Auā o Ieova lou Atua o le afi maamaai ia, o le Atua fuā ia.

²⁵A oo ina fai o lau fanau, ma ni fanau a lau fanau, a loa foi ona outou mau i le nuu, a leaga outou ia te outou, a outou faia se tupua ua ta, o se faatusa o se mea e tasi, ma faia mea leaga i luma o Ieova lou Atua, e faaonoono ai ia te ia;

²⁶ou te valaau atu i le aso nei i le lagi, ma le lalolagi, e fai ma molimau ia te outou, e vave ona matuā fano outou ai le nuu tou te sopoia atu ai Ioritana e fai mo outou; tou te le nofo tulu‘i ai, a e matuā faaumatia outou.

²⁷E faataapeape e Ieova ia te outou i nuu eseese, e toaitiiti foi ni o outou e totoe i nuu e ta‘ita‘iina ai outou e Ieova;

²⁸tou te auauna ai i atua na faia e lima o tagata, o laau ma maa, o e le vaai, ma latou le faalogologo, latou te le aai, ma latou le sogisogi,

²⁹A e afai tou te toe saili ia Ieova lou Atua i lea mea, ona e maua lea o ia, pe afai e te saili ia te ia ma lou loto atoa ma lou agaga atoa.

³⁰A oo ia te oe le puapuaga, a maua foi oe e ia mea uma lava i aso amuli, afai e te toe foi atu ia Ieova lou Atua, ma e faalogo i lona siufofoga,

³¹(auā o Ieova lou Atua, o le Atua alofa ia,) na te le tuuna oe, na te le faaumatia oe, e le galo foi ia te ia le feagaiga ma ou tamā, na ia tauto ai ia te i latou.

³²Auā ia e suesue i aso anamua na muamua ia te oe, talu le aso na faia ai tagata e le Atua i le lalolagi; ia e suesue foi, ia amata i le tasi tuluiga o le lagi, e oo atu i le tasi tuluiga o le lagi, pe ai se mea e pei o lenei mea tele, pe na faalogoina e se tasi se mea la te tutusa?

³³Pe na faalogologo se nuu i le siufofoga o le Atua ua tŭlei mai i totonu o le afi, faapei ona e faalogologo i ai, a e ola mai pea?

³⁴Pe na sauni ea e le Atua ona afio atu, ma ave mona le tasi nuu ai totonu o le tasi nuu, i tofotofoga, ma faailoga, ma vavega, ma le taua, ma le aao malosi, ma le aao faaloaloa, atoa ma mea matautia tele lava, faapei o mea uma na faia e Ieova lo outou Atua ia te outou i o outou luma i Aikupito?

³⁵Ua faailoaina atu ia te oe ina ia e iloa, o Ieova o ia lava le Atua, e leai se tasi na o ia lava.

³⁶Ua na tŭlei mai lona siufofoga mai le lagi ia lagona e oe, ina ia a‘oa‘o mai o ia ia te oe; na ia faailoa mai foi ia te oe lana afi tele i le lalolagi, na e faalogologo foi i ana afioga ai totonu o le afi.

³⁷Na ia alofaina ou tamā, o le mea lea na ia filifilia ai a latou fanau, ina ua mavae atu i latou, ua na aumaia foi oe i ona luma i lona mana tele nai Aikupito;

³⁸ina ia tulia nai ou luma o nuu e sili ona malolosi ma le toatele ia te oe, ina ia faaoo ia te oe, ma ia avatu lo latou laueleele e fai mou tofi, faapei ona fai i le aso nei.

³⁹Ia e iloa foi i le aso nei, ma ia mafaufau ai lou loto, o Ieova o ia lava le Atua i le lagi i luga, atoa ma le lalolagi nei, e leai lava se tasi.

⁴⁰O lenei, ia e tausiusi i ana tulafono ma ana poloaiga ou te fai atu ai ia te oe i le aso nei, ina ia manuia ai oe ma au fanau pe a mavae atu oe, ina ia e nofo tulu‘i ai i le laueleele ua foai mai ia te oe e Ieova lou Atua i aso uma lava.

⁴¹Ona vavaeeseina lea e Mose o aai e tolu i le itu mai o Ioritana i le mea e alu ae ai le la;

⁴²ina ia sola i ai o le fasioti tagata, o le na te fasioti i lē la te tuaoi ma le le iloa, e lei muai ita foi i ai; a sola foi o ia i se tasi o ia aai, ona ola ai lea o ia.

⁴³O aai ia, o Peseri i le vao i le eleele laugatasi, o sa Reupenā; ma Ramota i Kiliata, o sa Katō; ma Koleni o i Vasana, o sa Manasē.

⁴⁴O le tulafono lenei sa tuuina atu e Mose i le fanauga a Isaraelu;

⁴⁵o mau lava ia, ma tulafono, ma faamasinoga na fai atu ai Mose i le fanauga a Isaraelu ina ua latou o mai nai Aikupito,

⁴⁶i le itu mai o Ioritana i le vanu e feagai ma Petepeoro, i le laueleele o Sekono le tupu o sa Amorī, sa nofo i Hesepona, o ia na fasia e Mose ma le fanauga a Isaraelu ina ua latou o mai mai Aikupito.

⁴⁷Ua latou fai mo latou lona laueleele, ma le laueleele o Oko le tupu o Vasana, o tupu e toalua o sa Amorī i le itu mai o Ioritana i le mea e alu ae ai le la;

⁴⁸e gata mai i Aroeru i le auvai o le alia o Arinona, e gata mai i le mauga o Seona, o Heremoni lea;

⁴⁹ma le eleele laugatasi uma i le itu mai o Ioritana i sasae, e oo lava i le sami o i le eleele laugatasi i lalo o Asetotapeseka.