Read Samoan Old Version Bible – O LE TUSI PAIA TEUTERONOME, 8 Bible Online

TEUTERONOME, 8 - Samoan Old Version Bible – O LE TUSI PAIA bible

TEUTERONOME, 8

¹O poloaiga uma lava ou te fai atu ai ia te oe i le aso nei ia outou tausi i ai ia faia, ina ia outou ola ai, ma ia faatoateleina ai outou, ma ia outou o atu ma fai mo outou le nuu na tauto ai Ieova i o outou tamā.

²Ia e manatua le ala uma lava na ta‘ita‘iina mai ai oe e Ieova lou Atua i ia tausaga e fagafulu i le vao, ina ia na faatigaina oe, ma tofotofo ai ia te oe, e iloa ai mea o i lou loto, pe e te tausiusi i ana poloaiga pe leai.

³Na ia faatigaina foi oe, ma faalaina oe, ua na fafaga ia te oe i le manai, o le mea na e le iloa, na le iloa foi e ou tamā, ina ia na faailoa atu ia te oe e le na o mea e ‘ai e ola ai tagata, a o mea uma e tŭlei mai i le fofoga o Ieova e ola ai tagata.

⁴Na le pala ou ofu na e ofu ai, o ou vae foi na le fulafula i ia tausaga e fagafulu.

⁵E te iloa foi i lou loto e faapei o se tagata ona aoai i lona atalii, e faapea lava ona aoai o Ieova lou Atua ia te oe.

⁶O lenei, ia e tausiusi i poloaiga a Ieova lou Atua, ina ia e savali i ona ala, ma ia mata‘u ia te ia.

⁷Auā o le a faaooina oe e Ieova lou Atua i le nuu lelei, o le nuu o vaitafe, o vaipuna, atoa ma vai tetele e puna mai i vanu ma mauga;

⁸o le nuu o saito, ma karite, ma vine, ma mati, ma rimoni; o le nuu o i ai le suāuu olive ma le meli.

⁹O le nuu e te ‘ai ai i mea e ‘ai ma le le oge lava, e te le mativa ai i se mea e tasi; o le nuu o uamea ona maa, o ona mauga foi e te eli ai le ‘apa memea.

¹⁰A ē ‘ai, ma ma‘ona ai, ia e faamanu atu ai ia Ieova lou Atua ona o le nuu lelei ua ia avatu ai ia te oe.

¹¹Ia oe, ne‘i galo ia te oe o Ieova lou Atua, i lou le tausi i ana poloaiga, ma ana faamasinoga, ma ana tulafono, ou te fai atu ai ia te oe i le aso nei;

¹²ne‘i e ‘ai, ma e ma‘ona, ma e faia fale lelei, ma nofo ai;

¹³e tupu tele foi lau lafu povi ma lau lafu mamoe, e faateleina foi au ario ma au auro, e faateleina foi au mea uma;

¹⁴ona faamaualugaina ai lea o lou loto, ma e faagalogalo ia Ieova lou Atua o le na aumaia oe nai le nuu o Aikupito, o le mea sa nofo pologa ai;

¹⁵o le na ta‘ita‘i ia te oe i le vao e tele ma le matautia, e i ai gata uogo ma akarava, o le nuu naumati foi, e le o i ai se vai, a ua faapunaina e ia le vai mo oe nai le papa alā;

¹⁶na ia fafaga ia te oe i le manai i le vao, o le mea na le iloa e ou tamā, ina ia na faatigaina oe, ina ia na tofotofo foi ia te oe, e faamanuia ia te oe i ou tausaga amuli;

¹⁷ne‘i e faapea ifo i lou loto, O lo‘u malosi ma le malosi o lo‘u lima ua ou maua mai ai lenei oloa.

¹⁸A ia e manatu ia Ieova lou Atua, auā o ia na te avatua ia te oe le malosi e maua mai ai oloa, ina ia faatumauina ai e ia lana feagaiga na ia tauto ai i ou tamā, pei ona fai i le aso nei.

¹⁹Afai foi e galo ia te oe Ieova lou Atua, ma e mulimuli atu i atua ese, ma e auauna ia i latou, ma e ifo ia te i latou, ou te matuā fai atu ia te outou i le aso nei, e faaumatia lava outou.

²⁰Faapei o nuu e faaumatia e Ieova ai o outou luma, e faapea lava outou ona faaumatia; auā ua outou le mafafai ona faalogo i le siufofoga o Ieova lo outou Atua.