Read Samoan Old Version Bible – O LE TUSI PAIA TEUTERONOME, 9 Bible Online

TEUTERONOME, 9 - Samoan Old Version Bible – O LE TUSI PAIA bible

TEUTERONOME, 9

¹Isaraelu e, faalogologo mai ia, o le a e sopoia atu Ioritana i ona po nei, ina ia e oo atu e fai mo oe o nuu e sili ona toatele ma le malolosi ia te oe, o aai tetele ua puipuia i pa e oo i le lagi,

²o le nuu malolosi ma le maualuluga, o atalii o Anaki ua e iloa, ma ua e faalogo ai, ua faapea, Po o ai se na te tu atu i luma o atalii o Anaki?

³Ia e iloa foi i le aso nei, o Ieova lou Atua, o ia na te sopomua atu ia te oe, o le afi maamaai o ia, na te faaumatia i latou, na te faatoilaloina foi i latou i ou luma; e te tulia foi i latou, ma vave faaumatia i latou, faapei ona fetalai mai o Ieova ia te oe.

⁴A tulia i latou e Ieova lou Atua ai ou luma, aua e te fai ifo i lou loto, e faapea, O la‘u amiotonu ua faaooina mai ai a‘u e Ieova e fai mo‘u lenei nuu; a o le amio leaga a ia nuu e tulia ai i latou e Ieova ai ou luma.

⁵E le ona o lau amiotonu ma le tonu o lou loto e te alu atu ai e fai mo oe lo latou nuu; a o le amio leaga a ia nuu e tulia ai i latou e Ieova lou Atua ai ou luma, ma ia na faataunuu ai le fetalaiga na tauto ai Ieova i ou tamā, o Aperaamo, o Isaako, ma Iakopo.

⁶Ia e iloa foi e le o lau amiotonu e foaiina atu ai e Ieova lou Atua ia te oe lena nuu lelei e fai mo oe; auā o oe o le nuu e maaa lava ua.

⁷Ia e manatua, aua ne‘i galo ia te oe o mea na e faatupuina ai le toasa o Ieova lou Atua i le vao; e afua mai i le aso na e tuua ai le nuu o Aikupito, e oo lava i lo outou o mai i le mea nei, ua outou fou vale lava ia Ieova.

⁸O i Horepa foi na outou faatupuina le toasa o Ieova, ona toasa ai lea o Ieova ia te outou, na fai a faaumatia outou e ia.

⁹Na ou alu ae i le mauga e talia papamaa, o papa o i ai le feagaiga na osia e Ieova ma outou; ona ou nofo lea i le mauga e fagafulu o ao ma le fagafulu o po, ou te lei ‘ai ai sina mea e ‘ai, ou te lei inu foi sina vai.

¹⁰Ona tuu mai lea e Ieova ia te au o papamaa e lua sa tusia e le aao o le Atua, na i ai upu uma lava sa fetalai mai e Ieova ia te outou i le mauga mai totonu o le afi i le aso na fai ai le faapotopotoga.

¹¹Ua oo i le gataaga o le fagafulu o ao ma le fagafulu o po, ona tuu mai ai lea e Ieova ia te au o papamaa e lua, o papa o i ai le feagaiga.

¹²Ona fetalai mai lea o Ieova ia te au, Tu ia i luga, ia vave ona e alu i lalo ai le mea nei, auā o lou nuu na e aumaia nai Aikupito ua leaga lava i latou; ua vave ona latou o ese nai le ala na ou poloai atu ia te i latou; ua latou faia mo i latou le tupua uamea.

¹³Ua fetalai mai foi Ieova ia te au, ua faapea mai, Ua ou iloa lenei nuu, faauta foi, o le nuu e maaa ua.

¹⁴Tuu mai ia o a‘u, seia ou faaumatia i latou, ma soloiesea lo latou igoa ai le lalolagi, ou te faia foi oe ma tupuga o le nuu e malosi ma le toatele e sili ia te i latou.

¹⁵Ona ou liliu lea, ma ou alu ifo nai le mauga, ua mu foi le mauga i le afi; sa i o‘u lima e lua o papamaa e lua o le feagaiga.

¹⁶Na ou vaai atu, faauta foi, ua outou agasala ia Ieova lo outou Atua, ua outou faia mo outou le tamai povi uamea; ua outou vave o ese i le ala na poloai ai Ieova ia te outou.

¹⁷Ona ou umia lea o papamaa e lua, ma ou lafotuina ai e o‘u lima e lua, ma ou nutimomoia ai i o outou luma.

¹⁸Ona ou faapaū lea i luma o Ieova, faapei ona muai faia, e fagafulu o ao ma le fagafulu o po, ou te lei ‘ai ai sina mea e ‘ai, ou te lei inu foi sina vai, ona o a outou agasala uma lava na outou agasala ai, ina ua faia mea leaga i luma o Ieova e faaonoono ia te ia.

¹⁹Auā na ou fefe i le toatamai ma le toasa tele sa toasa ai Ieova ia te outou ia faaumatia ai outou; a ua faafofoga mai Ieova ia te au i lea foi aso.

²⁰Na toasa tele foi Ieova ia Arona, na fai a fano ai o ia, ona ou faatoga atu foi lea i lea aso mo Arona.

²¹Ona ou tago lea i le mea sa outou agasala ai, o le tamai povi na outou faia, na ou susunuina i le afi, ma a‘u tu‘ininiia, ma a‘u matuā oloina ua ninii e pei o le efuefu, na ou sasaa foi ona efuefu i le vaitafe e tafe ifo i le mauga.

²²Na outou faatupuina foi le toasa o Ieova i Tapara, ma Mase, atoa ma Kiperota-atava.

²³Na aauina atu foi outou e Ieova nai Katesapanea, ua faapea mai, Ia outou o ae e fai mo outou le nuu ua ou avatu ai ia te outou. Ona outou fouvale ai lea i le afioga a Ieova lo outou Atua, ua outou le faatuatua ia te ia, ma outou le faalogo i lona siufofoga.

²⁴Ua outou fouvale ia Ieova talu le aso na ou faatoa iloa ai outou.

²⁵Na ou faapaū i luma o Ieova i ao e fagafulu ma le fagafulu o po faapei ona ou muai faapaū ai; auā na fetalai mai Ieova o le a na faaumatia outou.

²⁶Na ou aioi atu ai ia Ieova, ua faapea atu, Le Alii e, Ieova, aua e te faaumatia lou nuu ma lou tofi na e laveaiina i lou mana, ua e aumaia foi nai Aikupito i le aao malosi.

²⁷Ia e manatua au auauna o Aperaamo, o Isaako, ma Iakopo; aua e te silasila i le faalogogata o lenei nuu, ma a latou amio leaga, ma a latou agasala;

²⁸ne‘i faapea mai le nuu na e au mai ai i matou, Auā ua le mafaia e Ieova ona faaooina i latou i le nuu na ia folafolaina ai ia te i latou, auā foi ua ‘ino‘ino o ia ia te i latou, o le mea lea ua ia avatu ai i latou i le vao e fasioti ai ia te i latou.

²⁹A o lou nuu lava i latou ma lou tofi, o e na e aumaia i lou mana tele ma lou aao faaloaloa.