Read Samoan Old Version Bible – O LE TUSI PAIA IOANE, 10 Bible Online

IOANE, 10 - Samoan Old Version Bible – O LE TUSI PAIA bible

IOANE, 10

¹E moni, e moni, ou te fai atu ia te outou, o le le ui atu i le faitotoa i totonu o le lotoā mamoe, a e alu ae i ai i se tasi mea, o le gaoi lea ma le fao mea.

²A o lē ui atu i le faitotoa, o le leoleo mamoe lava lea.

³E to mai ia te ia le puipui e le leoleo faitotoa: e faalogo foi mamoe i lona leo: e valaau e ia i ana lava mamoe i o latou igoa; na te ta‘ita‘i atu foi ia te i latou.

⁴Pe a tuuina atu e ia ana lava mamoe, e muamua atu ia i ai; ona mulimuli atu ai lea o mamoe ia te ia, anā ua latou iloa lona leo.

⁵A e le mulimuli atu i latou i se tagata ese, a e sosola ese ia te ia; auā latou te le iloa leo o tagata ese.

⁶Ua fetalai atu Iesu ia te i latou lena faataoto, a e lei lagona e i latou mea ua ia fetalai atu ai ia te i latou.

⁷Ona toe fetalai atu lea o Iesu ia te i latou, E moni, e moni, ou te fai atu ia te outou, o a‘u ne‘i o le faitotoa o mamoe.

⁸O i latou uma e na muamua ia te au, o gaoi i latou ma fao mea; a e lei faalogo mamoe ia te i latou.

⁹O a‘u nei o le faitotoa; afai e ui mai se tasi ia te au, e faaolaina ia, e alu atu ma ulu fafo, e maua foi e ia le mea e ‘ai.

¹⁰O le gaoi, e leai se tasi mea e sau ai na ona ai gaoi, ma fasi, ma faaumatia: ua ou sau ina ia latou maua le ola, ia maua atili ai lava.

¹¹O a‘u le leoleo mamoe lelei; e tuu atu e le leoleo mamoe lelei o lona ola e sui a‘i mamoe.

¹²A o le auauna, e le o le leoleo foi o ia, e le ana le lafu mamoe; ua vaai atu ia i le luko ua sau, ona lafoai lea e ia o mamoe, a e sola; ona puea lea o mamoe e le luko, ma faasalalauina.

¹³E sola le auauna, auā o le auauna lava ia, e le manatu foi o ia i mamoe.

¹⁴O a‘u nei o le leoleo mamoe lelei; ua ou iloa a‘u mamoe, ua iloa foi a‘u e a‘u mamoe;

¹⁵pei ona silafia a‘u e le Tamā ma ou iloa le Tamā. Ou te tuuina atu foi lo‘u ola e sui a‘i mamoe.

¹⁶Ua ia te au foi isi mamoe e le o i lenei lotoā; e tatau ona ou ta‘ita‘iina mai o i latou foi, e faalogo foi i latou i lo‘u leo; ona tasi ai lea o le lafu mamoe, ma le leoleo mamoe e toatasi.

¹⁷O le mea lea e alofa mai ai le Tamā ia te au, auā ou te tuuina atu lo‘u ola, ina ia ou toe au mai ai.

¹⁸E leai se tasi na te aveeseina ia te au, a e peitai a‘u, ou te tuuina atu e a‘u lava. O ia te au le pule e tuuina atu, o ia te au foi le pule e toe au mai ai; ua ou maua lena poloaiga mai lo‘u Tamā.

¹⁹Ona toe vaeluaina lea o Iutaia i ia upu.

²⁰Ua faapea ane nisi o i latou e toatele, Ua ia te ia le temoni, o le vale foi o ia; pe se a le mea tou te faalogologo ai ia te ia?

²¹A ua faapea ane nisi, E le ni upu ia a se tagata ua uluitinoina; e mafai ea e se temoni ona ia faapupulaina mata o tauaso?

²²Ua fai i Ierusalema le tausamiga o le faaulufalega, o ona po foi o le tausaga maalili.

²³Ua femaliuai Iesu i le malumalu i le faapaologa o Solomona.

²⁴Ona vagavagai lea o Iutaia ia te ia, ua latou faapea mai ia te ia, A faaletonu o matou manatu ia te oe seia afea? Afai o oe o le Keriso, ia matuā ta‘utino mai ia te i matou.

²⁵Ua tali atu Iesu ia te i latou, Ua uma ona ou ta‘u atu ia te outou, a ua outou le talitonu mai lava. O galuega ou te faia i le suafa o lo‘u Tamā, e molimau mai ia ia te au.

²⁶A ua outou le talitonu mai lava outou; auā e le ni a‘u mamoe outou, pei ona a‘u fai atu ia te outou.

²⁷O a‘u mamoe e faalogo mai i latou i lo‘u leo, ua ou iloa foi i latou, ua latou mulimuli mai foi ia te au;

²⁸ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo‘u lima.

²⁹O lo‘u Tamā o le na foaiina mai i latou ia te au, e sili o ia i nisi uma lava; e le mafai e se tasi ona faoa i latou i le lima o lo‘u Tamā.

³⁰O a‘u nei ma le Tamā, e tasi lava i maua.

³¹Ona toe fetagofi lea o Iutaia i maa, e fetogi ia te ia.

³²Ona faapea atu lea o Iesu ia te i latou, E tele galuega lelei ua ou faaalia ia te outou mai lo‘u Tamā; o se fea ea o ia galuega tou te fetogi mai ai ia te au.

³³Ua tali mai Iutaia ia te ia, ua faapea mai, E le se galuega lelei matou te fetogi ai oe, a o le upu leaga; auā o oe o le tagata, a ua e fai oe ma Atua.

³⁴Ua tali atu Iesu ia te i latou, E lei tusia ea i la outou tulafono, Na ou fai atu O atua outou?

³⁵Afai na ta‘ua e ia o atua i latou e ua i ai le afioga a le Atua, e le mafai foi ona faaleaogaina le Tusi;

³⁶tou te faapea ea i le ua faapaiaina ma auina mai e le Tamā i le lalolagi, Ua e upu leaga, auā ua ou fai atu, O a‘u nei o le Atalii o le Atua?

³⁷Afai ou te le faia galuega a lo‘u Tamā, aua tou te talitonu mai ia te au.

³⁸A e afai ou te faia, e ui lava ina outou le talitonu mai ia te au, ia outou talitonu i galuega; ina ia iloa e outou, ma ia talitonu, o i totonu ia te au le Tamā, o a‘u foi o i totonu ia te ia.

³⁹Ona toe fia pue lea o i latou ia te ia; a ua maliu ese o ia i o latou lima.

⁴⁰Ua toe maliu ane o ia i tala atu o Ioritana, i le mea na uluai papatiso ai e Ioane; ua nofo foi o ia i lea mea.

⁴¹Ona o mai lea ia te ia o tagata e toatele, ua faapea foi i latou, E leai lava se faailoga na faia e Ioane; a o mea uma na fai mai ai e Ioane ia te ia nei, e moni ia.

⁴²E toatele foi e na talitonu ia te ia i lea mea.