Read Samoan Old Version Bible – O LE TUSI PAIA IOANE, 13 Bible Online

IOANE, 13 - Samoan Old Version Bible – O LE TUSI PAIA bible

IOANE, 13

¹A o lei oo i le tausamiga o le paseka, ua silafia e Iesu ua oo mai ona po e tuua ai e ia lenei lalolagi, a e maliu atu i le Tamā; ua na alofa i ona tagata o i le lalolagi, ua ia alofa ia i latou ua oo i le gataaga.

²Ua fai le talisuaga, a ua tuu e le tiapolo i le loto o Iuta le Sekara, le atalii o Simona ia faalata ia te ia;

³ua silafia e Iesu ua tuuina mai e le Tamā mea uma lava i ona aao, ua maliu mai foi o ia mai le Atua, o le a toe maliu atu foi o ia i le Atua;

⁴ona tu lea o ia i luga a o fai le talisuaga, ua tuu ese ona ofu, ua tago foi i le ie sōloi, ua fusi ia te ia.

⁵Ona liligi lea e ia o le vai i le ipu e mulumulu ai, ua mulumulu i vae o ona soo, ma sōloi ai i le ie sōloi ua ia fusia ai.

⁶Ona oo atu lea o ia ia Simona Peteru; a ua fai mai o ia ia te ia, Le Alii e, e te mulumulu ea o‘u vae?

⁷Ua tali atu Iesu ia te ia, ua faapea atu, O le mea ou te faia, e te le iloa nei, a e mulimuli ane e te iloa.

⁸Ua fai mai Peteru ia te ia, E te le mulumulu lava o‘u vae e oo i le faavavau. Ua tali atu Iesu ia te ia, Afai ou te le mulumulu ia te oe, e leai sou tofi faatasi ma a‘u.

⁹Ona faapea mai lea o Simona Peteru ia te ia, Le Alii e, aua lava na o o‘u vae, a o o‘u lima foi, atoa ma lo‘u ulu.

¹⁰Ona faapea atu lea o Iesu ia te ia, O le ua taele, ia tau o ona vae, a e mamā uma ai, e le aoga ona mulumulu uma. Ua mamā foi outou, a e le o outou uma lava.

¹¹Auā ua silafia e ia le na te faalataina o ia; o le mea lea na ia fetalai atu ai, Ua le mamā outou uma lava.

¹²Ua uma ona mulumuluina e ia o latou vae, ua tago foi i ona ofu, ma toe taoto, ona faapea atu lea o ia ia te i latou, Ua outou iloa ea le mea ua ou faia ia te outou?

¹³Tou te ta‘ua mai a‘u, o le a‘oa‘o ma le Alii; ua lelei foi la outou e fai mai na, auā o a‘u lava lea.

¹⁴O lenei, afai o a‘u le Alii, ma le a‘oa‘o, ua oa mulumuluina o outou vae, e tatau ona outou femulumuluai o outou vae.

¹⁵Auā ua ou avatu le faaa‘oa‘o ia te outou, e pei ona ou faia ia te outou, ia faapea lava e outou ona fai.

¹⁶E moni, e moni, ou te fai atu ia te outou, e le sili le auauna i lona alii; e le sili foi le ua auina i le e ana le feau.

¹⁷Afai ua outou iloa ia mea, amuia outou pe a outou faia.

¹⁸E le o outou uma ou te fai atu ai, ua ou iloa i latou na ou filifilia; a e peitai ia taunuu ai le Tusi, O le ‘ai faatasi ma a‘u ua aa mai o ia ia te au i lona mulivae.

¹⁹Ou te fai atu nei lava ia te outou, a o lei oo mai, ina ia outou talitonu pe a taunuu, o a‘u lava o ia.

²⁰E moni, e moni, ou te fai atu ia te outou, o lē talia se tasi ou te auina atu, e talia e ia o au; o lē talia foi o a‘u, e talia e ia le ua auina mai a‘u.

²¹Ua fetalai atu e Iesu ia mea, ua ātu ai lona finagalo, ona ta‘utino atu lea o ia, ua faapea atu, E moni, e moni, ou te fai atu ia te outou, e faalataina a‘u e se tasi o outou na.

²²Ona fevaaiai lea o le au soo, ma latou masalosalo pe na fetalai mai o ia ia te ai.

²³Ua taoto ane foi i le fatafata o Iesu le tasi o ona soo, o le ua alofaina e Iesu.

²⁴Ona negonego lea o Simona Peteru ia te ia, e fesili atu po o ai ua ia fetalai i ai.

²⁵Ua faalagolago mai o ia i le fatafata o Iesu, ona fai mai lea ia te ia, Le Alii e, o ai ea?

²⁶Ua tali atu Iesu, O le ou te avatu i ai sina mea e ‘ai pe a uma ona ou fuia, o ia lea. Ona fuifui lea e ia o le mea e ‘ai, ma avatu ia Iuta le Sekara, le atalii o Simona.

²⁷Ua mavae atu le mea e ‘ai, ona uluitinoina lea o lea tagata e Satani, Ona faapea atu lea o Iesu ia te ia, O le mea e te faia, ia vave ia ona fai.

²⁸A e lei iloa e se tasi o i latou sa taooto le mea ua ia fetalai atu ai lea upu ia te ia.

²⁹Auā ua masalo isi ua fetalai atu Iesu, ina ua ia Iuta le ete tupe, Ina faatau mai ia ni mea e tatau ia te i tatou i le tausamiga; pe avatu se mea i e matitiva.

³⁰Ua talia foi e ia le mea e ‘ai, ona alu loa lea o ia i fafo; ua po.

³¹Ua alu ia i fafo, ona faapea atu lea o Iesu, Ua viia nei le Atalii o le tagata, ua viia foi le Atua ia te ia.

³²Afai e viia le Atua ia te ia, e viia foi o ia e le Atua ia te ia lava, e vave foi ona vivii o ia ia te ia.

³³Lo‘u fanau e, e toe itiiti nai aso ou te i ai ia te outou, tou te saili mai ia te au, a e pei ona ou fai atu ia Iutaia, O le mea ou te alu i ai, tou te le mafai ona ō i ai; e faapea foi ona ou fai atu nei ia te outou.

³⁴O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou.

³⁵O le mea lea e iloa ai e tagata uma lava o o‘u soo outou, pe afai ua outou fealofani.

³⁶Ua fai mai Simona Peteru ia te ia, Le Alii e, po o fea e te maliu atu i ai? Ua tali atu Iesu ia te ia, O le mea ou te alu i ai, e te le mafai ona mulimuli atu nei ia te au; a o se aso e te mulimuli atu ai ia te au.

³⁷Ua fai mai Peteru ia te ia. Le Alii e, pe se a le mea ou te le mafai ai ona mulimuli atu nei ia te oe? ou te tuuina atu lo‘u ola ona o oe.

³⁸Ua tali atu Iesu ia te ia. E te tuuina atu ea lou ola ona o a‘u? E moni, e moni, ou te fai atu ia te oe, e le vivini moa, seia e faafiti faatolu mai ia te au.