Read Samoan Old Version Bible – O LE TUSI PAIA IOANE, 19 Bible Online

IOANE, 19 - Samoan Old Version Bible – O LE TUSI PAIA bible

IOANE, 19

¹Ona ave lea e Pilato ia Iesu, ua sasa foi ia te ia.

²Ua taataai foi e le ‘au o laau tuitui, ua fai a‘i le pale, ua faaee i lona ao, ua faaofu foi ia te ia i le ofu pāuli.

³Ona latou fai atu lea, Talofa! le tupu o tagata Iutaia. Ua latou po atu foi ia te ia.

⁴Ona toe alu lea o Pilato i fafo, ma fai atu ia te i latou, Faauta, ou te ta‘ita‘iina atu o ia i fafo ia te outou, ina ia outou iloa ou te lei iloa se mea e sala ai o ia.

⁵Ona maliu atu lea o Iesu i fafo, ua pale i le pale tuitui, ma ofu i le ofu pāuli. Ua fai atu foi Pilato ia te i latou, Faauta i le tagata!

⁶Ua vaai atu ia te ia le au ositaulaga sili ma auauna, ona alalaga lea o i latou, ua faapea, Ina faasatauro ia, faasatauro ia. Ua fai atu Pilato ia te i latou, Ina ave ia e outou ia te ia, ma ia outou faasatauroina; auā ou te lei iloa se mea e sala ai o ia.

⁷Ua tali mai Iutaia ia te ia, O ia te i matou le tulafono, e tusa foi i la matou tulafono ona ia oti o ia, auā ua fai o ia e ia ma Alo o le Atua.

⁸Ua faalogo atu Pilato i lea upu, ua atili ai lona mata‘u;

⁹ona toe ulu atu lea o ia i le maota o le alii, ua fai mai ia Iesu, Se fea ea oe? A o Iesu, e lei tali atu lava ia te ia.

¹⁰Ona faapea mai lea o Pilato ia te ia, E te le gagana mai ea ia te au? Po ua e le iloa, o ia te au le pule e faasatauro ia te oe, o ia te au foi le pule e tatala ia te oe?

¹¹Ua tali atu Iesu, E leai sau pule ia te au, ana le tuuina mai ia te oe mai lugā; o le mea lea e tele ai lona leaga na ia tuuina mai a‘u ia te oe.

¹²Talu ai ona saili e Pilato e tatala ia te ia; a ua alalaga Iutaia, ua faapea atu. Afai e te tatalaina lena tagata, e te le alofa ia Kaisara; o sē fia fai ma tupu, e fou o ia ia Kaisara.

¹³Ua faalogo atu Pilato i lea upu, ona ta‘ita‘i lea e ia ia Iesu i fafo; ua nofo foi o ia i le nofoa faamasino i le mea e ta‘ua, o le Paepae, a o le upu Eperu, o Kapata.

¹⁴O le aso o le sauniga o le paseka lea aso, o lona itu aso foi pe ono; ua fai mai o ia ia Iutaia, Faauta i lo outou tupu.

¹⁵A ua alalaga i latou, Ave ese ia, ave ese ia; ina faasatauro ia te ia. Ua faapea mai Pilato ia te i latou. Ou te faasatauro ea i lo outou tupu? Ua tali atu lea au ositaulaga ia te ia. E leai so matou tupu, na o Kaisara.

¹⁶Ona ia tuuina atu lea o ia ia te i latou, ina ia faasatauroina.

¹⁷Ona ave lea o iesu e i latou, ua ta‘ita‘iina atu; ua ave e ia lona satauro, ua maliu atu foi i le mea e ta‘ua. O le mea o i ai le ulupoo, ua igoa i le upu Eperu, o Kolokota.

¹⁸Ua latou faasatauro ia te ia i le a mea, atoa ma isi tagata e toalua faatasi ma ia, o le tasi i le tasi itu, ma le isi i le isi itu, a o i totonu Iesu.

¹⁹Ua tusia foi e Pilato o le tusi faailoga, ma tuu i luga i le satauro; o le upu lenei ua tusia. O IESU LE NASARETA. O LE TUPU O TAGATA IUTAIA.

²⁰Ona faitaulia lea o lea faailoga e Iutaia e toatele, auā o le mea na faasatauroina ai Iesu, e lata ane lea i le aai; ua tusia foi i le upu a Eperu, ma Eleni, ma roma.

²¹Ona faapea atu lea o le au ositaulaga o Iutaia ia Pilato. Aua e te tusi, O le tupu o tagata Iutaia; a ia faapea, Ua fai mai o ia. O a‘u o le tupu o tagata Iutaia.

²²Ua tali atu Pilato. O le mea ua ou tusia, ua ou tusia lava.

²³Ua faasatauroina Iesu e tagata tau, ona latou ave lea o ona ofu, ua vaefāina, taitasi le tagata tau ma lana mea; i le ma le ofu tino; a e leai se su‘iga i le ofu tino, ua lalaga atoatoa, e afua mai i le pito i luga.

²⁴Ona fetautalatala‘i lea o i latou, Aua tatou te saeia, a se‘i tatou fai ai le vili, po o ai le fai mona; ina ia taunuu ai le Tusi, ua faapea mai, Ua latou tufatufaina o‘u ofu ia te i latou, ua latou faia foi le vili i lo‘u ofu tino. O mea lava ia na faia e tagata tau.

²⁵Sa tutū latalata ane i le satauro o Iesu lona tinā, ma le uso o lona tinā, o Maria le avā a Kalopa, ma Maria le Makatala.

²⁶Ua silasila atu Iesu i lona tinā, ma le soo ua alofaina e ia, ua tutū mai, ona fetalai atu lea o ia i lona tinā, Sena e, faauta, o lau tama.

²⁷Ua faapea atu foi i lea soo, Faauta, o lou tinā. Talu foi lea itu aso ua ave o ia e lea soo i lona aiga.

²⁸Mulimuli ane ua silafia e Iesu ua uma ona taunuu o mea uma, ua ia fetalai ane. Ou te fia inu; ina ia taunuu ai le Tusi.

²⁹Sa i ai foi le fagu ua tumu i le vineta; ua latou fufui le omomi i le vineta, ua tuu i luga i le isopo, ma tuu atu ai i lona fofoga.

³⁰Ua talia le vineta e Iesu, ona fetalai ane lea o ia. Ua taunuu; ua faagaugau lona ao, ona tuuina atu lea o lona agaga.

³¹Ona faatoga atu lea o Iutaia ia Pilato ia gauia o latou vae, ia aveeseina foi i latou, ina ia le tumau pea o tino i luga o satauro i le sapati, auā o le aso o le sauniga lea, (o le aso sili foi lea sapati.)

³²Ona o ane lea o tagata tau, ua gaui i vae o le tasi ma le tasi o e na faasatauroina faatasi ma ia.

³³A ua oo i latou ia Iesu, ua latou iloa ua maliu lava ia, ona le gauia ai lea o ona vae;

³⁴a o le tasi tagata tau ua tutu‘i lona itu i le tao; ona sisina loa mai lea o le toto ma le vai.

³⁵O ia na matamata i ai, ua molimau ai, e moni foi lana mau; ua iloa lava e ia e moni lava lana upu, ina ia outou talitonu ai.

³⁶Auā ua faia ia mea ia taunuu ai le Tusi, E le gauia sona ivi.

³⁷Ua toe faapea foi le tasi Tusi, E vaai atu i latou ia te ia na latou tu‘ia.

³⁸Ua mavae ia mea, ona faanoi atu lea o Iosefa le Arimataia ia Pilato, ina ia ave ese e ia le tino o Iesu; (o ia o le soo o Iesu, a e faalilolilo ona o le fefe ia Iutaia;) ua tuuina mai foi e Pilato. Ona alu ane lea o ia, ua ave le tino o Iesu.

³⁹Ua alu ane foi Nikotemo, o le na muai alu ia Iesu i le po, ua na ave foi le muro fefiloi ma le aloe, po ua selau litara.

⁴⁰Ona la ave lea o le tino o Iesu, ua teuteu i le ie e tanuma‘i atoa ma mea manogi, faapei o le tu a Iutaia i le faataimuaga o le tanuga.

⁴¹Sa i le mea na faasatauroina ai o ia o le fanua; ua i lea fanua foi le tuugamau fou, e lei tuuina ai lava se tasi.

⁴²Ona la tuuina ai lea o Iesu i lea mea, ona o le sauniga a tagata Iutaia; auā ua latalata mai le tuugamau.