Read Samoan Old Version Bible – O LE TUSI PAIA IOANE, 3 Bible Online

IOANE, 3 - Samoan Old Version Bible – O LE TUSI PAIA bible

IOANE, 3

¹O le tasi tagata o lo le au faresaio, o Nikotemo lona igoa, o le tasi lea faipule o Iutaia;

²ua alu ane o ia ia Iesu i le po, ua fai mai ia te ia, Rapi e, ua matou iloa o oe o le a‘oa‘o ua maliu mai mai le Atua; auā e le mafai e se tasi ona fai o ia faailoga e te faia, ana le ia te ia le Atua.

³Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua.

⁴Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tinā, e fanau mai ai?

⁵Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua.

⁶O le ua fanau mai i la le tino, o le tino lea; o le ua fanau mai foi i la le Agaga, o le agaga lea.

⁷Aua e te ofo auā na ou fai atu ia te oe, E ao ina toe fanau mai outou.

⁸E agi le matagi i le mea e loto i ai o ia, e te faalogo foi i lona agi, a e te le iloa le mea na sau ai, ma le mea e alu atu i ai; e faapea i latou uma o e ua fanau mai e le Agaga.

⁹Ua tali mai Nikotemo, ua faapea mai ia te ia, E mafai faapefea ia mea ona fai?

¹⁰Ona tali atu lea o Iesu, ua faapea atu ia te ia, O oe o le a‘oa‘o o Isaraelu, a e te lei iloa ea nei mea?

¹¹E moni, e moni, ou te fai atu ia te oe, matou te tautala i mea ua matou iloa, matou te molimau foi i mea ua matou vaavaai i ai; a e le talia mai e outou la matou mau.

¹²Afai ua ou fai atu ia te outou i mea o i le lalolagi, a e le talitonu mai outou, pe faapefea ona outou talitonu pe a a‘u fai atu ia te outou i mea o i le lagi?

¹³E leai foi se tasi na alu ae i le lagi, na o ia na alu ifo mai le lagi, o le Atalii lea o le tagata o loo i le lagi.

¹⁴E pei ona siitia i luga e Mose o le gata i le vao, e ao ina faapea ona siitia i luga o le Atalii o le tagata;

¹⁵ina ia le fano le tasi e faatuatua ia te ia, a ia maua le ola e faavavau.

¹⁶Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

¹⁷Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.

¹⁸O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua.

¹⁹O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio.

²⁰Auā o i latou uma o e fai mea leaga e ‘ino‘ino i latou i le malamalama, e le o mai foi i le malamalama, ne‘i faailoa a latou amio.

²¹A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.

²²Mulimuli ane, ua maliu atu Iesu ma ona soo i le nuu o Iutaia; ua nofo ai ma i latou, ma papatiso ai.

²³Sa papatiso foi Ioane i Ainona, e lata ane i Salima, aua e tele ai vai: na o mai foi tagata, ua papatisoina ai.

²⁴Auā ona po ia e lei tuuina lava Ioane i le fale puipui.

²⁵Ona fefinauai lea o isi soo o Ioane ma Iutaia i le faamamāina.

²⁶Ua latou o mai ia Ioane, ma fai mai ia te ia, Rapi e, o lē sa oulua i ai ma ia i tala atu o Ioritana, na e molimau i ai, faauta, o loo papatiso ia, ua o atu foi ia te ia tagata uma lava.

²⁷Ona tali atu lea o Ioane, ua faapea atu, E le mafai e le tagata ona ave se mea māna pe a le foaiina mai ia te ia mai le lagi.

²⁸O outou lava o a‘u molimau na ou fai atu, E le o le Keriso a‘u ne‘i: a ua auina mai lava a‘u e muamua ia te ia.

²⁹O le tagata e ana le faatoanofotane, o le faatoafaiavā lea; a o le uo a le faatoafaiavā, e tu mai ma faalogo ia te ia, e tele lona olioli i le leo o le faatoafaiavā; o lea foi ua atoatoa ai lo‘u nei olioli.

³⁰E ao ina tupu pea o ia: peitai a‘u nei, e tauāu ina itiiti o a‘u.

³¹O lē maliu mai mai lugā, e sili o ia i mea uma. O lē mai le lalolagi, o lo le lalolagi lava ia, e tautala foi o ia i la le lalolagi; a o lē maliu mai mai le lagi, e sili o ia i mea uma lava.

³²O mea foi ua na silafia ma faafofoga i ai, o loo molimau o ia i ia lava mea; e leai foi se tasi e talia lana mau.

³³O lē talia lana mau ua na faailoa lana taofi, e faamaoni lava le Atua.

³⁴Auā o le ua auina mai e le Atua, ua fetalai lava ia i le afioga a le Atua; auā e le foai faatatauina le Agaga e le Atua ia te ia.

³⁵E alofa le Tamā ile Alo, ua tuu mai foi mea uma i lona aao.

³⁶O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.