Read Samoan Old Version Bible – O LE TUSI PAIA GALUEGA, 1 Bible Online

GALUEGA, 1 - Samoan Old Version Bible – O LE TUSI PAIA bible

GALUEGA, 1

¹Teofilo e, na ou tusi le muai tala i mea uma lava na amata ona faia e Iesu ma a‘oa‘o atu,

²e oo i le aso na aveina ae ai o ia, ina ua uma ona poloai atu e le Agaga Paia i le au aposetolo e na filifilia e ia.

³Na faailoa atu foi o ia e ia ia te i latou ua soifua ia, ina ua mavae o lona tiga, ua faamaonia i faailoga faamaoni e tele; e fagafulu po ua iloa ai o ia e i latou, ma na fetalai atu i mea a le malo o le Atua.

⁴Sa faapotopoto foi o i latou ma ia, ona fetalai atu lea o ia ia te i latou, ia le tuua Ierusalema, a ia faatali i le mea na folafolaina e le Tamā, ua outou faalogo ai ia te au.

⁵Auā na papatiso lava Ioane i le vai; a o outou, e papatisoina outou i le Agaga Paia e le tele ni aso e va a‘i.

⁶Ua potopoto i latou, ona latou fesili ai lea ia te ia, ua faapea mai, Le Alii e, o ona po nei ea e te toe fuatai mai ai le malo ia Isaraelu?

⁷A ua fetalai atu o ia ia te i latou, E le tusa ona outou iloa o ona po ma ona tausaga ua tuu e le Tamā i lana lava pule.

⁸A e maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma Iutaia uma lava, ma Samaria, e oo lava i le tulu‘iga o le lalolagi.

⁹Ua fetalai atu ia i ia mea, ona siitia lea o ia, o latou o vaavaai atu; ua avea foi o ia i le ao nai o latou luma.

¹⁰Ua latou tulimatai ae i le lagi, a o afio ae o ia, faauta foi, o tagata e toalua ua tutū mai ia te i latou ma ofu sisina.

¹¹Ua la fai mai, O outou tagata Kalilaia e, se a le mea tou te tutū ai, ma vaavaai i le lagi? O Iesu lena, ua aveina ae nai ia te outou i le lagi, e faapea ona toe afio mai o ia, pei o lona afio atu i le lagi na outou vaavaai i ai.

¹²Ona latou toe foi atu lea i Ierusalema nai le mauga e igoa ia Olive, e latalata lea i Ierusalema, o le savaliga o le sapati lo la va.

¹³Ua latou oo atu, ona o ae lea o i latou i le afeafe aupitoaluga, ua nonofo ai Peteru, ma Iakopo, ma Ioane, ma Aneterea, o Filipo ma Toma, o Patolomaio ma Mataio, o Iakopo le atalii o Alefaio ma Simona le Selote, ma Iuta le uso o Iakopo.

¹⁴Ua finafinau pea i latou nei uma lava ma le loto gatasi i le tatalo ma le aioi, atoa ma fafine, ma Maria le tinā o Iesu, atoa foi ma ona uso.

¹⁵O ona po ia na tulai ai Peteru i luma o le au soo, (o le aofai o igoa o e na i ai po ua toaselau ma le toaluafulu;) ua faapea atu.

¹⁶Sema e, le au uso e, ua tatau ona taunuu o lenei Tusi, sa muai fetalai mai e le Agaga Paia i le fofoga o Tavita ia Iuta, sa fai ma ta‘ita‘i ia te i latou e na pue ia Iesu.

¹⁷Auā na faitauina o ia faatasi ma i matou, na tofia foi o ia i lenei faiva.

¹⁸Na faatau foi e lenei tagata le fanua i le totogi o le amio leaga; na tito foi o ia, ua pa ai lona manava, ua masaa ai i fafo lona gaau uma lava.

¹⁹Ua iloa foi lenei mea e i latou uma ua nonofo i Ierusalema, o le mea lea ua igoa ai lea fanua i la latou lava gagana, o Akeletama, o lona uiga, O le fanua o le toto.

²⁰Auā ua tusia i le tusi o salāmo, Ia tuufua le mea ua nofo ai o ia, aua foi ne‘i ai se mau ai; i le ma lea, Ia fai lona faiva mo se tasi.

²¹O lenei, e tatau ona fai ma molimau faatasi ma i matou nei, i lona toe tu, o se tasi o ia tagata sa feoai ma i tatou i ona po uma lava, a o femaliuai le Alii o Iesu ma i tatou,

²²e afua mai i le papatisoga a Ioane, e oo lava i le aso na aveina ae ai o ia nai ia te i tatou.

²³Ona tuu mai lea e i latou o le toalua, o Iosefa e igoa ia Pasapa, ua igoa foi ia Iuso, atoa ma Matatia.

²⁴Ua tatalo foi i latou, ua faapea atu, Le Alii e, o oe o lē silafia loto o tagata uma lava, ia e faailoa mai po o ai so laua nei ua e filifilia,

²⁵na te maua le tofi o lenei faiva o le aposetolo, na lafoaiina e Iuta ina ia alu o ia i lana lava mea e nofo ai.

²⁶Ona fai ai lea o la la vili, ona faasaga ai lea o le vili ia Matatia; ua faitauina o ia faatasi ma le au aposetolo e toatinoagafulu ma le toatasi.