Read Samoan Old Version Bible – O LE TUSI PAIA GALUEGA, 12 Bible Online

GALUEGA, 12 - Samoan Old Version Bible – O LE TUSI PAIA bible

GALUEGA, 12

¹O ona po ia na pupue ai e le tupu o Herota nisi o le ekalesia ina ia faasaua i ai.

²Ua na fasioti foi ia Iakopo le uso o Ioane i le pelu.

³Ua iloa foi e ia ua fiafia ai Iutaia, ona faasosolo ai lea ona pue ia Peteru lava. (O ona aso ia o areto e le faafefeteina)

⁴Ua pue ia te ia, ona tuu ai lea i le fale puipui, ma tuuina atu i tagata tau e taitoafā i vasega e fa e leoleo ia te ia; ua manatu ia e ta‘ita‘i ane ia te ia i le nuu pe a mavae le paseka.

⁵O lenei, ua leoleoina Peteru i le fale puipui; a ua faia le tatalo faatauanau i le Atua e le ekalesia mo ia.

⁶Ua oo ina a ta‘ita‘i e Herota ia te ia i fafo, o lea lava po na moe ai Peteru i le va o tagata tau e toalua, ua noanoatia o ia i maea uamea e lua; o leoleo foi i luma o le faitotoa, ua leoleo i latou i le fale puipui.

⁷Faauta foi, o le agelu a le Alii ua tu mai, ua pupula mai foi le malamalama i le fale; ua na ta ia Peteru i lona itu, ma fafagu ia te ia, ua faapea atu, Ina tu ai i luga, ia vave. Ona pauu ifo lea o maoa uamea nai ona lima.

⁸Ua fai atu le agelu ia te ia, Fusi ia ou ofu, ma faamau ifo ou seevae. Ua faapea foi ona faia e ia. Ua na fai atu foi ia te ia, Ina pulupulu ia lou ofu, ma mulimuli mai ia te au.

⁹Ona alu lea o ia i fafo, ua mulimuli atu ia te ia; ua le iloa e ia ua moni le mea ua faia e le agelu; fa te ia ua vaaia le faaaliga.

¹⁰Ua mavae i tua ia te i laua le muai leoleoga ma lona lua, ona oo lea o i laua i le puipui uamea e o atu ai i le aai; ua matala fua lea ia te i laua; ona la o atu lea i fafo, ma savali atu i le ala e tasi; ona tuua loa lea o ia e le agelu.

¹¹Ua faatoa mau manatu ai Peteru, ona faapea lea o ia, Ua ou iloa nei, e moni, ua auina mai e le Alii lana agelu, ma ua laveai mai o ia ia te au ai le lima o Herota, ma le faatuatuaga uma lava o le nuu o Iutaia.

¹²Ua mafaufau ai o ia, ona alu lea i le fale o Maria le tinā o Ioane, ua igoa ia Mareko; e toatele sa faapotopotoina ai, ma latou tatalo.

¹³Ua tu‘itu‘i atu foi Peteru i le puipui o le ala, ona sau lea o le tasi teine, o Rosa le igoa, na te asia mai.

¹⁴Ua iloa foi e ia le leo o Peteru, ua le toina le puipui ona o le olioli, a ua momo‘e i le fale, ma fai atu ua tu mai Peteru i le faitotoa.

¹⁵Ua fai mai i latou ia te ia, Ua e valea. A ua finau atu pea ia, e moni lava. Ona faapea mai lea o i latou, O lana agelu ia.

¹⁶A ua tu‘itu‘i atu pea Peteru; ona tatala lea e i latou, ua iloa atu ia te ia, ona matuā ofo ai lea o i latou.

¹⁷A ua tālo atu o ia i lona lima ia te i latou soia le tautala, ona folafola lea e ia ia te i latou ona ta‘ita‘iina mai e le Alii nai le fale puipui. Ua na fai atu foi, Ia outou tala atu ia mea ia Iakopo ma le au uso. Ona alu atu lea o ia i fafo, ua alu i le tasi mea.

¹⁸Ua ao, ona tele ai lea o le atuatuvale o tagata tau, pe na faapefea Peteru.

¹⁹Ua saili foi e Herota ia te ia, ua le maua, ona faamasino lea o ia i leoleo, ma fai atu ia ta‘ita‘iina i latou ia oti. Ona alu lea o ia nai Iutaia i Kaisareia, ua nofo ai.

²⁰Ua ita tele Herota ia Turo ma Saitonu; a ua latou o mai ia te ia ma le loto gatasi, ua latou faaoleole atu foi ia Pāso lē leoleo i le tofaga o le tupu, ona latou ole atu lea ia toe lelei ma ia; auā na fagaina lo latou nuu e le nuu o le tupu.

²¹O le aso foi na atofaina, ua ofu ai Herota i ona ofu alii, ma nofo i le nofoālii, ua lauga atu ia te i latou.

²²Ona alalaga lea o le nuu, O le siufofoga o se atua, a e le se leo o se tagata.

²³Ona taia loa lea o ia e le agelu a le Alii, auā ua le avatu e ia le viiga i le Atua; ona atiolaina lea o ia i anufe ua oti ai.

²⁴A ua tupu le afioga a le Atua ma ua faateleina.

²⁵Ua toe foi mai Panapa ma Saulo nai Ierusalema, ina ua uma o la la feau, ua latou o mai ma Ioane ua igoa ia Mareko.