Read Samoan Old Version Bible – O LE TUSI PAIA GALUEGA, 14 Bible Online

GALUEGA, 14 - Samoan Old Version Bible – O LE TUSI PAIA bible

GALUEGA, 14

¹Sa i Ikonio i laua, ua ulufale faatasi i le sunako o tagata Iutaia, o upu foi na la lauga a‘i, ua faatuatua ai Iutaia ma Eleni e toatele lava.

²A e peitai o Iutaia le faalogo, ua latou faaoso atu ma faaita atu i loto o tagata o nuu ese i le au uso.

³O le mea lea ua nonofo loa ai i laua, ma tautala faamalosi atu i le afioga a le Alii, ua molimau mai o ia i le upu o lona alofa tunoa, ma ua foai ia faia faailoga ma vavega i o laua lima.

⁴A ua vaeluaina le motu o tagata i le aai; ua ia Iutaia nisi, ua i aposetolo nisi.

⁵Ua taupulepule foi tagata o nuu ese, atoa ma Iutaia ma o latou alii, e faasaua ma fetogi ia te i laua i maa;

⁶ona iloa ai lea o i laua, ona la sosola ai lea i Lusa ma Teipe, o aai ia o Lukaonia, ma nuu e vagavagai;

⁷ua folafola i ai le tala lelei.

⁸Sa nofo foi i Lusa le tasi tagata ua le lavā i ona vae, ua pipili talu lava ona fanau mai, e lei savali lava.

⁹Ua faalogo mai lenei tagata ia Paulo o loo tautala; ua pulatoa atu o ia ia te ia, ua iloa foi ua ia te ia le faatuatua e malolo ai,

¹⁰ua fai atu ma le leo tele, Ina tu sa‘o ia ou vae i luga. Ona oso lea o ia ma savali.

¹¹Ua iloa foi e le motu o tagata le mea ua faia e Paulo, ona alalaga lea, i le gagana a Lukaonia, ua faapea ane, Ua afio ifo atua ia te i tatou ua pei ni tagata.

¹²Ua faaigoa atu foi e i latou ia Panapa, o Seu; a o Paulo, o Hereme ia, auā o ia o le ‘autu o upu.

¹³A o le faitaulaga a Seu, o le na i luma o la latou aai lona malumalu, ua au mai e ia o povi poa ma pale i faitotoa, o le a osi taulaga o ia atoa ma le motu o tagata.

¹⁴Ua faalogo i ai aposetolo, o Panapa ma Paulo, ona la saeia lea o laua ofu, ma feosofi atu i le motu o tagata, o loo alalaga i laua, ua faapea atu,

¹⁵Alii e, se a le mea ua outou fai ai na mea? O tagata lava i maua nei e tutusa ma outou, ua ma folafola atu le tala lelei ia te outou, ia outou lafoai nei mea le aoga, ma liliu mai i le Atua soifua, o le na faia le lagi, ma le lalolagi, ma le sami, ma mea uma lava o i ai;

¹⁶o le na tuufaitalia nuu uma lava o augātagata ua mavae atu, latou te sāvavali i o latou lava ala.

¹⁷E ui lava i lea, ua le tuu e ia o ona faailoga, i lona agalelei mai, ma foai mai o ua mai le lagi ia te i tatou, ma tausaga o fuata a le tau, ma ona ua faamalilie i o tatou loto i le mea e ‘ai ma le olioli.

¹⁸O loo fai atu nei upu, se manū a le mavavao ai i le motu o tagata ia soia le fai taulaga mai ia te i laua.

¹⁹A ua o mai tagata Iutaia mai Anetioka ma Ikonio, ua latou faalalo ane i le motu o tagata, ua uma foi ona fetogi ia Paulo i maa, ona latou toso lea ia te ia i tua o le aai, fa te i latou ua oti o ia.

²⁰Ua vagavagai o ia e le au soo, ona tu lea o ia i luga, ua alu i le aai; o le taeao foi ua la o atu ai ma Panapa i Teipe.

²¹Ua uma foi ona la folafola le tala lelei i lea aai, e toatele ua fai ai ma soo, ona la toe foi lea i Lusa, ma Ikonio, ma Anetioka,

²²ua faamalosi i loto o le au soo, ma apoapoai atu ia tumau i le faatuatua; ua faapea atu foi, O puapuaga e tele e tatau ona tatou sao atu ai i le malo o le Atua.

²³Ua uma ona tofia e i laua o toeaina mo i latou i lea ekalesia ma lea ekalesia, ua tatalo ma anapopogi, ona la tuuina atu lea o i latou i le Alii ua latou faatuatua i ai.

²⁴Ua uma ona la ui ane i Pisitia, ona oo lea i Pafulia.

²⁵Ua la tautala atu foi i le upu i Pereka, ona la o ifo lea i Ataleia;

²⁶ona folau atu ai lea o i laua nei lea mea i Anetioka, sa la o atu ai ina ua tuuina atu ai i laua i le alofa tunoa o le Atua ona o le galuega sa la faia.

²⁷Ua oo foi i laua, ona la faapotopotoina lea o le ekalesia, ma faamatalaina atu mea uma na faia e le Atua e i laua, ma lona faaavanoa le faitotoa o le faatuatua mo nuu ese.

²⁸Ua la nonofo ai foi i po e tele faatasi ma le au soo.