Read Samoan Old Version Bible – O LE TUSI PAIA GALUEGA, 16 Bible Online

GALUEGA, 16 - Samoan Old Version Bible – O LE TUSI PAIA bible

GALUEGA, 16

¹Ua oo ifo foi o ia i Teipe ma Lusa; faauta foi, sa i ai le tasi soo, o Timoteo le igoa, o le tama a le fafine Iutaia e faatuatua, a o lona tamā o le Eleni ia;

²ua ta‘uleleia o ia e le au uso i Lusa ma Ikonio.

³Ua manao Paulo la te o ma ia, ona ia peritomeina lea ia te ia, ona o tagata Iutaia o i ia nuu; auā ua iloa e i latou uma lava o le Eleni lona tamā.

⁴Ua ui ane i latou i aai, ma latou tuuina atu ia te i latou tuugafono, na tuu e le au aposetolo ma toeaina o i Ierusalema, latou te tausia.

⁵Ua faamalosia foi ekalesia i le faatuatua, ma ua faatoateleina i lea aso ma lea aso.

⁶Ua mavae ona latou ui ane i Ferukia ma le nuu o Kalatia, a ua vaoia e le Agaga Paia aua latou te tautala i le upu i Asia;

⁷ua oo foi i latou i Musia, ona taumafai ai lea e i latou ona o atu i Pitunia; a ua le mafai le Agaga ona latou o.

⁸Ona ui faatafatafa ane lea o i latou i Musia, ua oo ifo i Teroa.

⁹Ua iloa foi e Paulo le faaaliga i le po; o le tasi tagata Maketonia ua tu mai, ma aioi mai ia te ia, ua faapea mai, Sau ia i Maketonia, ma fesoasoani mai ia te i matou.

¹⁰Ua iloa e ia le faaaliga, ona sauni loa lea o i matou e o atu i Maketonia, ua manatu lava i matou, ua valaauina i matou e le Alii e folafola atu le tala lelei ia te i latou.

¹¹Ona matou tuuvaa ai lea i Teroa, ma folau tonu atu i Samotake, o le taeao foi ua oo ai i Neapoli;

¹²ona toe oo atu ai lea i Filipi, o le muai aai lea o lea itu o Maketonia, o le Kolone; ua matou nonofo foi i lea aai isi aso.

¹³Ua o foi i matou i le aso sapati i tua o le aai i le auvai o le vaitafe, o le mea ua masani ona fai ai o tatalo; ua nonofo foi i matou i lalo, ma tautala atu i fafine e na potopoto ai.

¹⁴Ua faalogo mai foi ia te i matou le tasi fafine ua mata‘u i le Atua, o Litia le igoa, o le faatau ie pāuli, o Tuatira lona nuu; ua tatalaina e le Alii lona loto ia naunau i upu na tautala a‘i Paulo.

¹⁵Ua papatisoina o ia atoa ma lona aiga, ona aioi mai lea o ia, ua faapea mai, Afai ua outou manatu o a‘u o lē faatuatua i le Alii, o mai ia i lo‘u fale, ma nonofo ai. Ua pulutia foi i matou e ia.

¹⁶Ua o atu i matou i le tatalo, ona fetaiai lea ma i matou le tasi auauna teine ua i ai le aitu vavalo, ua na maua oloa e tele ma ona alii i ana valoaga.

¹⁷Ua femulimuliai o ia ia Paulo ma i matou, ma alaga, ua faapea ane, O auauna nei tagata a le Atua silisili ese, latou te tala‘i mai ia te i tatou le ala o le ola.

¹⁸Ua faapea ona fai e ia i aso e tele. A ua tiga Paulo, ua fāliu atu, ma ua fai atu i le aitu, Ou te fai atu ia te oe i le suafa o Iesu Keriso, alu ia i fafo ia te ia. Ona alu ai lea o ia i fafo i lea lava itu aso.

¹⁹Ua iloa foi e ona alii ua alu ese le faatuatuaga e maua ai a latou oloa, ona pupue ai lea e i latou ia Paulo ma Sila, ma fetoso ia te i laua i le malae i luma o alii.

²⁰Ua ta‘ita‘i foi ia te i laua i faamasino, ua faapea atu, Ua matuā faasoesa mai nei tagata, i lo tatou nuu o tagata Iutaia foi i laua,

²¹ua folafola mai foi e i laua o tu e sa ona talia pe faia e i tatou tagata Roma.

²²Ua feosofi mai le motu o tagata ia te i laua, ua saei ese atu e faamasino o laua ofu, ua fai atu foi ia sasa ia te i laua i laau.

²³Ua latou sasa ia te i laua, e tele o la ta, ona tuu atu lea i le fale puipui, ua fai atu i le leoleo o le fale ia leoleo lelei ia te i laua;

²⁴ua oo lea poloaiga, ona tuu atu lea o ia ia te i laua i le potu tuloto, ma faamau i o la vae i laau.

²⁵O le tulua o po ma ao ua tatalo ai ma pepese o Paulo ma Sila i le Atua; ua faalogo foi ia te i laua e ua noanoatia.

²⁶Ona faafuasei mai lea o le mafuie tele, ua luluina ai faavae e le fale puipui; ua toloaina mai ai o puipui uma, ua maunuunu ai foi o latou noanoaga uma lava.

²⁷Ua ala le leoleo o le fale puipui na moe, ua na iloa faitotoa o le fale ua avanoa, ona se‘i lea e ia o le pelu, a fasi o ia e ia, fa te ia ua sosola e na noanoatia,

²⁸A ua alaga Paulo ma le leo tele, ua faapea atu, Aua ne‘i faia e oe se mea e leaga ai oe; auā o iinei i matou uma lava.

²⁹Ona fai atu lea o ia e au mai ni afi, ona oso mai lea o ia, ma faapaū i luma o Paulo ma Sila ma le gatete.

³⁰Ua na aumaia foi i laua i fafo, ua faapea mai, Alii e, se a le mea e tatau ona ou faia ou te ola ai?

³¹Ua fai atu i laua, Ina faatuatua ia i le Alii o Iesu Keriso, e ola ai oe atoa ma lou aiga.

³²Ona la tautala atu loa i le afioga a le Alii ia te ia, ma i latou uma ua i lona fale.

³³Ua na au mai foi ia te i laua i lea lava itu po, ma mulumulu atu o la ta; ona papatisoina loa lea o ia ma lona aiga uma.

³⁴Ua na aveina ae foi ia te i laua i lona fale, ma laulau atu mea e ‘ai, ua olioli o ia ma lona aiga uma, ua faatuatua i le Atua.

³⁵Ua ao, ona aauina mai lea e faamasino o auauna, ua faapea mai, Tuu atu ia o ia tagata ia o.

³⁶Ona fai ane lea e le leoleo o le fale puipui nei upu ia Paulo, Ua aauina mai e faamasino ia tuuina atu oulua ia o; o lenei, o atu ia, ina o ma le manuia.

³⁷A ua fai atu Paulo ia te i latou, Ua sasa mai i latou ia te i maua nei i luma o le nuu a o lei faasalaina, o i maua o tagata Roma, ona latou tuu mai lea ia i maua i le fale puipui; latou te tuu lemu atu nei ea ia te i maua? Aua lava; a o i latou, se‘i o mai lava i latou e avatu ia te i maua i fafo.

³⁸Ona molia lea e auauna o ia upu i faamasino; ona fefefe lea o i latou, ina ua lagona o tagata Roma i laua.

³⁹Ona o mai lea o i latou, ma ole mai ia te i laua, ua avatu foi ia te i laua i fafo, ma aioi mai ia la o ose atu i le aai.

⁴⁰Ona o lea o i laua i fafo o le fale puipui, ua ulufale i sa Litiā; ua feiloai foi ma le au uso, ma la faamafanafana atu ia te i latou, ona ō lea o i laua.