Read Samoan Old Version Bible – O LE TUSI PAIA GALUEGA, 17 Bible Online

GALUEGA, 17 - Samoan Old Version Bible – O LE TUSI PAIA bible

GALUEGA, 17

¹Ua tuanai Amefipoli ma Apolonia, ona oo lea o i laua i Tesalonia, ua i ai le sunako o tagata Iutaia.

²Ua ulufale foi Paulo ia te i latou, o lana lea masani, e tolu foi sapati ua lauga atu o ia ia te i latou i Tusi,

³ua faamatala ma faasino atu, na tatau ona tiga o le Keriso, ma toe tu mai i e ua oti; ma ua faapea atu, O Iesu lenei ou te folafola atu ai ia te outou, o le Keriso ia.

⁴Ua talitonu mai foi nisi o i latou, ma ua faaopoopoina i latou ia Paulo ma Sila; o Eleni foi o e matatau i le Atua e toatele lava, ma sa‘o tamaitai e toatele foi.

⁵A o Iutaia e le faalogo ua matataua i latou, ua faatasi mai ia te i latou nisi tagata leaga o e tafafao vale, ona faanunununu lea e i latou, ma faapisapisao i le aai; ona feosofi lea i le fale o Iasona, ua saili ia te i laua ia ta‘ita‘iina i fafo i le nuu.

⁶E lei maua i lana, ona fetoso mai lea e i latou ia Iasona ma nisi o le au uso i le au faipule o le nuu, o loo alalaga atu, O tagata nei o e ua faatupu le fouvale i le lalolagi uma, ua latou oo mai foi iinei;

⁷ua talia i latou e Iasona. Ua faatu‘iese foi i latou nei uma lava i poloaiga a Kaisara, ua fai mai, o Iesu o le tasi lea tupu.

⁸Ua latou faatupu ai le atuatuvale i le motu o tagata atoa ma le au faipule o le nuu, o e ua faalogo i nei mea.

⁹Ua tuutotogi i latou ia Iasona ma nisi, ona tuu atu lea ia te i latou e o.

¹⁰Ona momoli atu loa lea e le au uso ia Paulo ma Sila i le po i Perea; ua oo i ai i laua, ona la ulufale lea i le sunako o tagata Iutaia.

¹¹Ua sili ona amio lelei o i latou nei i tagata Tesalonia; auā ua latou talia le upu ma le fiafia tele, ua saili i Tusi i lea aso ma lea aso, pe moni ia mea.

¹²O le mea lea ua talitonu ai i latou e toatele lava, ma sa‘o tamaitai Eleni, atoa ma tane e toatele.

¹³A ua iloa e tagata Iutaia o i Tesalonia, ua folafolaina le afioga a le Atua e Paulo i Perea, ona o atu ai lea o i latou, ma faaoso i le motu o tagata i lea mea.

¹⁴Ona aau atu loa lea e le au uso ia Paulo, a latou o ifo i tai; a ua nonofo ai pea o Sila ma Timoteo.

¹⁵O e na momoli foi ia Paulo ua latou o ma ia i Atenai; ua poloai mai foi ia te i latou e fai atu ia Sila ma Timoteo, ia vave mai lava i laua ia te ia; ona latou foi lea.

¹⁶Ua faatali atu Paulo ia te i laua i Atenai, ua tiga tele ifo lona loto, o matamata o ia i le aai ua tumu i tupua.

¹⁷Ua ia lauga foi i le sunako ia Iutaia ma e o matatau i le Atua, ua tautala foi ma e na feiloai ma ia i le malae i aso fai soo.

¹⁸Ona finafinau mai lea o isi o le au fiapopoto o le itu aiga o Epikuro, ma le itu aiga o Setoiko; ua fai mai foi nisi, Pe ala i se a le fai mai o lenei tagata sii i le lau? a ua fai mai isi, Ai se folafola mai i atua ese; aua ua na folafola atu ia te i latou le tala lelei ia Iesu ma le toe tu mai.

¹⁹Ua ave i latou ia te ia, ua ta‘ita‘i atu i Areopako, ua faapea mai, Se‘i matou iloa pe se a lenei mataupu fou ua e tautala a‘i?

²⁰Auā ua e molia mai nisi mea ese i o matou nei taliga; o lea ua matou fia iloa ai pe se a le uiga o nei mea.

²¹Auā ua leai se isi mea ua faia e tagata Atenai uma atoa ma tagata ese e āumau ai, na ona tala atu ma faalogo mai sina tala faatoa iloa.

²²Ona tu atu ai lea o Paulo i Areopako, ua faapea atu o ia, O outou Atenai e, ua ou iloa i mea uma lava ua sili la outou tapuai i atua.

²³Auā na ou ui ane, ma ou matamata i a outou mea paia, ona ou iloa atu lea o le fata ua tusi i ai, MO LE ATUA E LE ILOA. O lenei, o ia ua outou tapuai i ai ma le le iloa, ou te faailoa atu ai ia te outou.

²⁴O le Atua na faia le lalolagi ma mea uma lava o i ai, ona o le Alii o ia o le lagi ma le lalolagi, e le afio o ia i malumalu e faia e lima;

²⁵e le o lima o tagata e auauna ai ia te ia, peiseai ua mativa o ia i se mea e tasi; o loo foai mai e ia le ola, ma le mānava, ma mea uma lava i le vao mea atoa;

²⁶ua faia foi e ia nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai;

²⁷ina ia latou saili i le Alii, pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi.

²⁸Auā o ia o loo ola ai i tatou, ma gaoioi ai, o loo i ai foi i tatou talu o ia; pei ona fai mai foi e isi o outou fatu pese, Auā o lana fanau i tatou.

²⁹O lenei, ona o le fanau a le Atua i tatou, e le tatau ona tatou manatu ua tusa le Atua i se auro, po o se ario, po o se maa, ua talaiia i le faiva ma le fuafua o le tagata.

³⁰Na faapalepale le Atua i ona po o le vālea; a o loo fetalai mai nei i tagata uma i nuu uma lava ia salamo;

³¹auā ua faatuina e ia le aso e faamasinoina ai le lalolagi ma le tonu, e le tagata ua tofia e ia; o loo faamaoni mai ai e ia i tagata uma lava i lona toe faatu mai ia te ia i e ua oti.

³²Ua faalogo e i latou i le toe tu mai o e ua oti, ona tauemu mai ai lea o isi, a ua fai mai isi, Matou te toe faalogo atu ia te oe i lena upu.

³³Ona alu atu lea o Paulo nai o latou luma.

³⁴A ua pipii mai nisi tagata ia te ia, ma ua talitonu mai; e i ai Taionusio le Areopako, ma le fafine ua igoa ia Tamari, o isi foi faatasi ma i laua.