Read Samoan Old Version Bible – O LE TUSI PAIA GALUEGA, 19 Bible Online

GALUEGA, 19 - Samoan Old Version Bible – O LE TUSI PAIA bible

GALUEGA, 19

¹O ona po na i ai Apolo i Korinito, ua tuanai ai e Paulo nuu maualuluga, ona oo lea i Efeso; ua na iloa ai isi soo,

²ona fai atu lea o ia ia te i latou, Na maua ea e outou le Agaga Paia ina ua outou faatuatua? Ua fai mai i latou ia te ia, Na matou le lagona lava po ua foaiina le Agaga Paia.

³Ona fai atu lea o ia ia te i latou, pe na papatisoina outou i le a? Ua fai mai i latou, O le papatisoga a Ioane.

⁴Ona fai atu lea o Paulo, Na papatiso lava Ioane i le papatisoga o le salamo, ua fai atu i le nuu, ia faatuatua i latou i lē mulimuli mai, o le Keriso o Iesu lea.

⁵Ua faalogo ai i latou, ona papatisoina lea i le suafa o le Alii o Iesu.

⁶Ua faaee atu foi e Paulo ona lima ia te i latou, ona oo lea o le Agaga Paia ia te i latou; ona tautala lea i gagana eseese, ma perofeta i latou.

⁷O ia tagata uma, pe toatinoagafulu ma le toalua i latou.

⁸Ua ulufale foi o ia i le sunako, ma lauga faamalosi atu, ma tautalatala, ma faaoleole ia i latou i mea a le malo o le Atua, i masina e tolu.

⁹A ua loto fatu nisi, ma ua le talitonu, o upu leaga mai i lenei lotu i luma o le toatele; ona alu ese lea o ia ia te i latou, ma ua vavae ese le au soo, ua tautalatala o ia i lea aso ma lea aso i le fale a‘oga o le tasi tagata e igoa ia Turano.

¹⁰E lua tausaga na faia lenei mea; o lea na faalogo ai i le afioga a le Alii o Iesu o i latou uma lava e ua nonofo i Asia, o Iutaia atoa ma Eleni.

¹¹Ua faia foi e le Atua vavega sili i lima o Paulo;

¹²o lea ua avea ai solosolo ma ie tali otaota nai lona tino i e mamai, ona mavae ai lea o latou ma‘i, ua ō i fafo foi ia te i latou agaga leaga.

¹³Ona faamalosi lea o isi o le au taulāitu Iutaia, o e na feoai, ua latou ta‘u atu le suafa o le Alii o Iesu i luga i e ua i ai agaga leaga, ua faapea atu, Matou te matuā fai atu ia te outou i le suafa o Iesu, o le ua tala‘iina e Paulo.

¹⁴Ua faia foi lenei mea e nisi tagata o atalii e toafitu o Seva, o le Iutaia, o le faitaulaga sili.

¹⁵A ua tali mai le agaga leaga, ua faapea mai, Ua ou iloa Iesu, ua ou iloa foi Paulo, a o ai ea outou na?

¹⁶Ona oso mai ai lea o le tagata ua i ai le agaga leaga, ua manumalo ia i latou, ua faiaina lava i latou ia te ia; ona sosola ai lea o i latou i fafo o le fale ua le lavalavā ma ua manunua.

¹⁷Ua iloa lenei mea e i latou uma lava e ua nonofo i Efeso, o Iutaia atoa ma Eleni; ona oo lea o le mata‘u ia te i latou uma lava, ua viia foi le suafa o le Alii o Iesu.

¹⁸Ua o mai foi i latou e toatele o e ua faatuatua, ma faaali mai ma ta‘u mai a latou amio.

¹⁹E toatele foi o e na fai togafiti faataulāitu na faapotopoto e i latou a latou tusi, ma susunu ai i luma o tagata uma; ona latou faitau lea i a latou faatusa, ua iloa ai ua lima sefulu o afe o tupe ario.

²⁰O lea ua matuā tupu tele ai ma ua manumalo le afioga a le Alii.

²¹Ua mavae ia mea, ona tuu lea e Paulo i lona loto, a uma ona ui ane i Maketonia ma Akaia, e alu i Ierusalema, ua faapea o ia, A mavae ona ou i ai, e tatau ona ou asiasi i Roma.

²²Ona aauina atu lea e ia i Maketonia tagata e toalua o e na auauna ia te ia, o Timoteo ma Erato, a o ia ua fāi po ona nofo i Asia.

²³O ona po ia ua tupu ai le faanunununu tele ona o lenei lotu.

²⁴Auā o le tasi tagata, o Temetiu le igoa, o lē fai mea ario, le na fai malumalu ario o Tiana, ma ua maua ai le oloa tele mo tufuga;

²⁵ua faapotopoto e ia ia te i latou, atoa ma le au faigaluega i mea faapena, ua fai atu, Soma e, ua outou iloa o lenei faiva ua tatou tamaoaiga ai;

²⁶ua outou iloa foi ma outou faalogo e le gata i Efeso, a ua tāli soo Asia uma lava ona faaliliueseina ai e lena Paulo le vao tagata e toatele i lona ole, ua faapea atu, e le ni atua e ua faia e lima.

²⁷E le gata ona māumau o lo tatou nei faiva, o le a tuulafoaiina, a e peitai e ta‘uleaogaina foi le malumalu o le atua fafine silisili o Tiana, o le a faaumatia foi lona mamalu, o loo tapuai i ai Asia uma lava atoa ma le lalolagi uma.

²⁸Ua faalogo i latou, ona tutumu ai lea o i latou i le felilī, ua alalaga, ua faapea atu, E silisili Tiana o Efeso.

²⁹Ua matuā lolofi mai le aai atoa, ua pupue atu foi ia Kaio ma Aritako, tagata Maketonia, o tagata o le malaga a Paulo, ona feosofi lea o i latou ma le loto gatasi i le fale mataaga.

³⁰Ua fia ulufale atu Paulo i le nuu, a ua le mafafai le au soo.

³¹O isi alii foi o Asia o e na alofa ia te ia, na latou aau atu nisi ia te ia e ole atu, aua le faamalosi ona alu i le fale mataaga.

³²Ua alalaga nisi i le tasi mea, ma nisi i le tasi mea; auā ua soona vevesi le faapotopotoga; ua le iloa foi e le toatele le mea na potopoto ai i latou.

³³Ua faatu atu foi e i latou ia Alesana nai le motu o tagata, ina ua tuuina atu o ia e Iutaia. Ona tālo atu lea o Alesana lona lima, ua na fia faatonu atu i le nuu.

³⁴Ua iloa e i latou o le Iutaia o ia, ona tasi ai lea o latou leo uma lava, pe lua itu aso ua alalaga ai i latou, Ua silisili Tiana o Efeso.

³⁵Ua faafifilemuina le motu o tagata e le tusiupu, ona fai atu lea o ia, Sema e, o outou Efeso e, o ai lea tagata e le iloa o loo auauna lenei aai o Efeso i le malumalu o le atua fafine silisili o Tiana ma le tupua na paū ifo mai ia Seu?

³⁶O lenei, ona ua le mafai ona upueseina o nei mea, e tusa ona outou nonofo sa‘o, ma ia aua le soona fai se mea.

³⁷Auā ua ta‘ita‘i mai e outou nei tagata, e le ni e fao i mea sa, pe upu leaga i latou i lo outou atua fafine.

³⁸O lenei, afai ua ia Temetiu ma lana au tufuga se mau i se tasi, ua tuu aso e fai ai fono, o i ai foi suikonesula; ia momoli ai le tasi i le tasi.

³⁹Peitai ane, afai tou te sue i nisi mea, e faatonuina lea i le fono e tala‘iina.

⁴⁰Auā ne‘i molia i tatou ona o le taalili vale i lenei aso, ina ua leai lava sa tatou upu e mafai ona tatou faatonu atu ai lenei nunu vale.

⁴¹Ua uma atu ia upu, ona faatuūa lea e ia o le faapotopotoga.