Read Samoan Old Version Bible – O LE TUSI PAIA GALUEGA, 2 Bible Online

GALUEGA, 2 - Samoan Old Version Bible – O LE TUSI PAIA bible

GALUEGA, 2

¹Ua oo atu foi i le aso Penetekoso, sa i ai i latou uma lava i le mea e tasi ma le loto gatasi.

²Ona faafuasei mai lea o le atalii mai le lagi, peiseai o le matagi ua agi tele mai, ua tumu uma ai le fale sa latou nonofo ai.

³Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi.

⁴Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.

⁵Sa nonofo i Ierusalema tagata Iutaia e ua matatau i le Atua, mai nuu uma lava o le lalolagi.

⁶Ua lagona foi lenei taalili, ona faapotopoto mai ai lea o le motu o tagata, ua fememeai, ina ua taitasi ma faalogo atu ia te i latou ua tautala mai i lana lava gagana.

⁷Ua segia uma o latou mauli, ma latou ofo ai, ua fetautalatalai, Faauta, e le o Kalilaia ea i latou uma o e tautala mai nei?

⁸e faapefea foi ona tatou taitasi ma faalogo atu i lana lava gagana na tupu ma ia?

⁹o Patia, ma Metai, ma Elama, ma i latou e nonofo i Mesopotamia, ma Iutaia ma Kapatokia, o i Pono ma Asia,

¹⁰o i Ferukia ma Pafulia, o i Aikupito ma nuu o Lipua ua tuaoi ma Kurene, o e ua āumau foi mai Roma, o Iutaia ma e ua lotu mai,

¹¹o Kereta ma Arapi; ua tatou faalogo atu ia te i latou o loo tautala mai i a tatou lava gagana i vavega o le Atua.

¹²Ua segia o latou mauli uma, ma fememeai i latou, ua fetautalatalai, Se a le uiga o lenei mea?

¹³Peitai o isi, ua tauemu i latou, ua faapea ane, Ua onā nei tagata i le uaina suamalie.

¹⁴Ona tulai lea o Peteru atoa ma le toatinoagafulu ma le toatasi, ua fai atu ma le leo tele, ua faapea atu ia te i latou, Sema e, o outou Iutaia e, atoa foi ma e ua nonofo i Ierusalema uma lava, ia iloa e outou lenei mea, ma ia faafofoga mai i a‘u upu.

¹⁵Auā ua le onā nei tagata, pei ona outou masalosalo i ai; auā o le itu aso e tolu lenei;

¹⁶a o le mea lenei ua fai mai ai e le perofeta o Ioelu,

¹⁷O ona aso e gata ai, o loo faapea mai le Atua, e iu ina ou liligi ifo ai lo‘u Agaga i luga o tagata uma lava; ona perofeta mai lea o outou atalii ma o outou afafine, e iloa faaaliga e o outou taulelea, e fai miti foi o outou toeaina.

¹⁸O ia aso foi ou te liligi ifo ai lo‘u Agaga i luga o a‘u auauna tane, ma a‘u auauna fafine, latou te perofeta mai ai.

¹⁹Ou te faia foi vavega i le lagi i lugā, ma faailoga i le lalolagi i lalo, o le toto, ma le afi, ma le asuasu e faaniutu.

²⁰E muamua ona liua o le la i le pouliuli, ma le masina i le toto, i le oo ai i le aso tele ma le silisili o le Alii.

²¹E iu foi ina faaolaina o i latou uma lava o e valaau atu i le suafa o le Alii.

²²Sema e, o outou Isaraelu e, faalogo mai ia i nei upu; o Iesu o le Nasareta, o le tagata ua faasinoina e le Atua ia te outou i mea mamana, ma vavega, ma faailoga ua faia e le Atua i o outou luma e ia, pei ona outou iloa foi;

²³o ia ua tuuina mai e le pule tonu ma le silafaga a le Atua anamua, na maua o ia e outou, ma outou faamau i le laau ma fasioti i lima o tagata faaletaupulea;

²⁴o ia ua faatuina mai e le Atua, ua na tatala i puapuaga o le oti, auā na le mafai ona taofiina ai o ia.

²⁵Auā ua fai mai Tavita ia te ia, Na ou ilo atu le Alii i o‘u luma e le aunoa; auā o i lo‘u itu taumatau o ia, ina ne‘i faagaeetia a‘u.

²⁶O le mea lea ua fiafia ai lo‘u loto, ma olioli ai lo‘u laulaufaiva; e malolo ai foi lo‘u tino ma le faatalitali;

²⁷auā e te le tuua a‘u i le tuugamau; e te le tuu atu foi lou Tagata Paia ia oo i ai le pala.

²⁸Ua e faailoa mai ia te au ala o le ola; e te faatumu mai ia te au i le fiafia i ou luma.

²⁹Sema e, le au uso e, se‘i ou matuā fai atu ia te outou i lea tupuga o Tavita, ua maliu o ia, ua tanumia foi, ua ia i tatou lona tuugamau ua oo mai i ona po nei.

³⁰O lenei foi, auā o le perofeta o ia, ma ua iloa e ia na matuā tauto mai le Atua ia te ia, na te faatuina le Keriso mai lana fanau i la le tino, e tietie ai o ia i lona nofoālii;

³¹ua muai iloa e ia, o lea ua na fai mai ai i le toe tu mai o le Keriso, ua le tuua o ia i le tuugamau, ua le oo foi le pala i lona tino.

³²O Iesu lava lena ua toe faatuina e le Atua; o molimau i matou uma i lena mea.

³³O lenei foi, ona ua siitia o ia i luga e le aao taumatau o le Atua, ma ua maua e ia mai le Tamā o le Agaga Paia na folafolaina, ua liligi ifo ai e ia lenei mea ua outou iloa ma faalogo ai nei.

³⁴Auā e lei alu ae Tavita i le lagi, a ua fai mai o ia, Ua fetalai mai le Alii i lo‘u Alii, Ia e nofo i lo‘u itu taumatau,

³⁵seia ou fai o e ita ia te oe ma mea e tu ai ou vae.

³⁶O lenei foi, ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.

³⁷Ua faalogo mai i latou, ona tuia lea o latou loto, ua latou fai mai ia Peteru ma le au aposetolo uma, Sema e, le au uso e, se a se mea matou te faia?

³⁸Ona fai atu lea o Peteru ia te i latou, Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea.

³⁹Auā o ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua.

⁴⁰O isi upu foi e tele na ia molitino atu ma apoapoai atu ai, ua faapea atu, Ia faaolaina outou ai lenei tupulaga faapiopio.

⁴¹Ona papatisoina lea o e na talia lana upu ma le fiafia; o lea aso foi ua faaopoopoina ai pe tolu afe o tagata.

⁴²Ua tumau pea i latou i le mataupu a le au aposetolo, ma le mafuta faatasi, ma le tofitofiga o le areto, ma talotaloga.

⁴³Ua oo foi le fefe i tagata uma; ua faia foi e le au aposetolo vavega ma faailoga e tele.

⁴⁴Ua faatasia foi e ua faatuatua uma lava, ua tuu tele a latou mea uma lava;

⁴⁵ua faatau atu foi o latou fanua ma oloa, ma ua tufatufa le tau o ia mea i tagata uma, ua faatatau i le mativa o le tagata.

⁴⁶Ua latou nonofo pea ma le loto gatasi i le malumalu i lea aso ma lea aso, ua tofitofi foi le areto i lea fale ma lea fale, ua latou aai a latou mea e ‘ai ma le fiafia ma le loto faamaoni,

⁴⁷ua latou vivii atu i le Atua, ma ua alofaina e le nuu uma lava. Ua faaopoopoina i le ekalesia e le Alii i aso fai soo o e ua faaolaina.