Read Samoan Old Version Bible – O LE TUSI PAIA GALUEGA, 24 Bible Online

GALUEGA, 24 - Samoan Old Version Bible – O LE TUSI PAIA bible

GALUEGA, 24

¹Ua mavae aso e lima, ona alu ifo lea o le faitaulaga sili o Anania, atoa ma toeaina, ma le tasi fai lauga o Titulo le igoa, ua latou faaali atu i le alii mea ua ia Paulo.

²Ua amia o ia, ona afua lea e Titulo ona molia o ia, ua faapea atu, Le alii e Filiki, o loo ia te i matou le filemu tele ona o oe, o loo faia foi mea e ‘au tonu lelei nuu i lau sauniga poto,

³ua matou tali lelei atu ai i aso uma, ma nuu uma, ma le faamanū tele atu.

⁴A e peitai ina ne‘i ou faalavelave pea ia te oe, ou te aioi atu, se‘i e faafofoga mai i lou alofa ia te i matou nai upu itiiti.

⁵Auā ua maua e i matou lenei tagata o le faasoesa, ma le faatupu le fouvale i tagata Iutaia uma i le lalolagi uma, ma le ta‘ita‘i i le itu aiga o le au Nasareta;

⁶na taumafai foi o ia e soli i le malumalu; ua matou pue atu foi ia te ia, na fai a matou faamasino ia te ia e tusa ma la matou tulafono;

⁷a ua oo ane Lusia le alii e pule i ‘au, ma ave ia te ia ma le faamalosi tele nai o matou lima.

⁸Na poloai atu o ia ia te i latou e na molia o ia e o mai ia te oe; o lou faamasino ia te ia e mafai ai ona e silafia lelei mea uma lava ua matou molia ai o ia.

⁹Ua ‘au faatasi ai tagata Iutaia, ua fai atu, ua faapea lava na mea.

¹⁰Ua geno mai le alii ia Paulo e fai mai, ona tali atu lea o ia, Ua ou iloa na tele tausaga o ē faamasino ai i lenei nuu, ua atili ai lo‘u fiafia e faatonuina atu a‘u mea;

¹¹auā ua mafai ona e silafia, ua na o aso e sefulu ma le lua talu ona ou alu ae i Ierusalema e tapuai.

¹²Na le maua foi a‘u e i latou i le malumalu, po o sunako, po o le aai, o finau ma se tasi, po o faanunununu i le motu o tagata;

¹³latou te le mafaia foi ona faamaoni o ia mea ua latou molia ai a‘u.

¹⁴A ou te ta‘utino atu lenei mea ia te oe, ou te auauna i le Atua o matou tamā, e tusa ma le lotu ua ta‘ua e i latou o le lotu ua vavae; o loo talitonu i mea uma lava ua tusia i le tulafono atoa ma le au perofeta;

¹⁵o loo ia te au le faamoemoe i le Atua, ua taofia foi e i latou nei, o le a toe tutū mai e ua oti, o e ua amiotonu atoa ma e ua amioletonu.

¹⁶O le mea lea ou te taumafai ai a‘u, ina ia maua e a‘u le loto fuatia ifo e lelei i le Atua atoa ma tagata, e le aunoa.

¹⁷Ua mavae tausaga e tele, ona ou alu lea e avatu mea alofa i lo‘u nuu atoa ma taulaga.

¹⁸A o faia ia mea, ua iloa a‘u e nisi tagata Iutaia mai Asia, ua faamamāina a‘u i le malumalu; ua le nunu mai tagata, ua leai se pisao.

¹⁹E tusa pe ana iinei o i latou i ou luma, ia molia a‘u, pe a ua i ai sa latou mau ia te au.

²⁰A leai, se‘i fai mai lava i latou nei, pe na iloa e i latou sa‘u amioletonu, ina o ou tu i luma o le fono.

²¹Pe na o lea upu e tasi, na ou alaga atu ai ina o ou tu i o latou luma, O le toe tu mai o e ua oti ua faamasinoina ai a‘u e outou i le aso nei.

²²Ua faalogo Filiki i nei upu, ona faatuai mai lea o ia ia te i latou, ina ua iloa lelei e ia le uiga o lea lotu, ua faapea atu, Pe a maliu mai le alii e pule i ‘au, o Lusia, ou te matuā suesue i a outou mea.

²³Ua na poloai atu foi i le ta‘ita‘i o le toaselau e leoleo atu ia Paulo, a ia fealualuai, ma ia aua le vavao atu i se tasi o lona aiga e auauna atu, pe alu atu ia te ia.

²⁴Ua mavae isi aso, ona o mai lea o Filiki ma Tusila lana avā, o le fafine Iutaia, ma ua aami mai ia Paulo, ia faalogo mai ia te ia i le mataupu a le faatuatua ia Keriso.

²⁵Ua lauga atu o ia i le amiotonu, ma le le gaoiā ma le faamasinoga atali, ona gatete ai lea o Filiki, ua fai mai, Se‘i e alu atu i le aso nei, seia ou maua foi se aso e aunoa, i lo‘u toe aami atu ia te oe.

²⁶Ua faamoemoe foi o ia i ni tupe e foaiina atu e Paulo māna, ina ia tuu atu ai ia te ia e alu; o le mea lea ua atili ai ona aami soo ia te ia, ma tautala ma ia.

²⁷A ua mavae tausaga e lua, ona suia lea o Filiki e Pokio Feso; ua loto foi Filiki e faafiafia ia Iutaia, ona tuu lea e ia ia Paulo o fusifusia.